Sakbay nga Agtabon ti Initko

Ababa a Nobela ni Jobert M. Pacnis
(Maika-14 a paset)

MADANDANAGAN da tatang ken nanang a nasangpetak kadayta a pangngaldaw. Maysa kano nga owner type jeep a nagkarga iti uppat a lallaki ti agsublisubli iti lipit iti amianan ti balay. Awan kan’ pay ti plate number daytoy.

“Nabigbigyo dagiti nakalugan, tatang?” sinaludsodko.

“Saan,” kinunana. “Ita laeng a makitak dagidiay.”

“Barok, daytoyen ‘di pagdandanagak. Imbaon la ketdi ti sindikato dagidiay. Umaydaka sisiimen. Wenno isurbey no kasano a lib-atendaka.” Uray la intigerger ni nanang.

Napaangesak laeng iti nauneg.

“Aglusuloskan iti trabahom, barok,” innayonna idi dinak nauray nga agtimek.

Napaumelak. Ngem ketdi, bukbuklen ti panunotko dagiti rumbeng nga aramidek.

“No ngata agpalamiiska pay laeng iti ‘yan da angkelmo a Tasio?” insuhestion ni tatang. Taga-kabangibang a probinsia da Angkel Tasio. Kabsat ni tatang ni Anti Ana nga asawana.

“Saan a mabalin, ‘tang,” kinunak. “’Ray sadino ti ‘yanko, ammok a dinakto inggaan ti sindikato. Paset daytoyen ti trabahok ket masapul ngarud a sanguek.”

“Ngem, barok…”

“Nanang, ibagak manen, karaip ti peggad ti trabahok. Ket kas nakunak, agbatbatayak laeng iti kinapudno. Maawatandak koma…”

Tung-ed laeng ti insungbatda.

Nagsubliak iti radio station iti alas dos ta adda ikamakamko a report. Agtangepen ti sipnget idi rummuarak iti pasdek.

Pampanurnorekon ti haywey idi madlawak ti owner-type jeep a sumarsaruno kaniak. Napakebbaak. Daytoy kadi ti nakita da tatang ken nanang?

Tapno masiguradok ti agay-ay-ayam iti panunotko, insikkok iti kanto nga umuneg iti maysa nga ili a malabsak. Rummuarakto met laeng iti bangir a kanto.

Ngem sinurotdak latta!

Insardengko ti motorsiklok iti pasdek iti sango ti istasion dagiti polis. Nagsardeng ti owner iti agarup tallo gasut a metro iti ‘yanko. Maysa kadagiti naglugan ti dimsaag (wenno nagindidissaag?) ket napan gimmatang (wenno nagingagatang?) iti kantina iti batogda.

No ngata agpulongak kadagiti polis? Ngem baka diak pay la nakadandanon iti opisinada, insiweten a pimmanaw dagiti ipulongko? Ngem no met mapanda kitaen dagiti ibagbagak ket mapaneknekanda a saan gayam a siak ti sursurotenda, ania laengen ti kunada kaniak?

Innalak ti selponko. Tawagak laengen ti gayyemko. Ngem busy ti CP-na. Inteksko lattan.

Duapulo minuto pay ti kaadayo ti ilimi. Tineksak met dagiti nangikari iti tulongda. Imbagak ti agdama a situasionko.

Idi diak mauray nga agabante ti owner, sinakayak ti luganko ket insiwetkon ti nagpataray. Nakaangesak ti nalukay ta lima minutos ngatan nga agpatpataray ngem awanen a sumarsaruno ti lugan. Saan met la siguro a siak ti rantada.

Ngem uray la naganit-it ti prenok idi makagtengak iti pagpikoran a sumang-at iti bantay ta kellaat lattan nga adda kotse a nangbalangan iti dalanko. Napardas dagiti simmaruno a napasamak. Dua kadagiti nakalugan ti kasla kimat a rimmuar iti kotse.

Ibueltak koma ti motorsiklok ngem nakabalangan gayamen iti likudak ti owner.

Pinaturongandak iti kalibre .45 dagiti dua. Sintimek, pinalekdak idi maasitgandak.

Nagsipnget ti panagkitak.

NAKAPUOTAK iti pannakaisuyat ti nalamiis a danum iti rupak. Nakarakedak gayam iti poste iti abay dagiti nabuntuon a kaykayo. Panagkunak, bodega ‘toy nakaipanak. Adda pay dagiti tugtugaw ken lamisaan a nalasanglasang.

Babaen ti lawag ti bombilia, naanninawak a pito dagiti mangbambantay kaniak. Dua ti adda iti ridaw a madama ti payubyobda ken panangitangguap iti marka demonio. Uppat met dagiti agiinnipis iti lamisaan iti sanguanak, lima ngata a metro ti kaadayoda. Maikapito ti nangsuyat iti rupak.

“Nakariingka gayamen, ‘tiong,” inrungiit ti maysa kadagiti agiinnipis.

“Nasiaat met tapno marugiamon ti agkararag, ‘tiong!” impasaruno ti maikadua nga adda piglat iti pingpingna. Ken adu pay iti bagina. Nalawag a makita ta nakauksob daytoy. Nagnaan la ketdi ti tadem. Binagkongda? Wenno tinagbatda?

Ubbing pay dagiti bantayko iti tantiak. Apaglabes la ngata a beinteda. Lampongda ket iti pay laeng umuna a pannakakitak kadakuada, saandan a mapagpiaran. Wenno dimon mapanunot nga adda pay kinaimbag nga aramidenda iti biagda.

“’Tiong, rugiamon a kasarita ni Satanas,” inlaaw ti adda iti ruangan. “Mano la nga orasen, mapankan iti sidongna.” Pimgaak iti kasta unay.

Tallo laeng ti tawa iti yanmi. Saggaysa iti makanigid ken makanawan ket ti maikatlo ti adda iti likudak. Naaramid dagitoy iti liso a marmarpi itan. Madanog la siguro bassit, matnagen dagitoy.

Pinagkalmak ti bagik. Masapul nga adda pigsak a sumango iti drug lord. Ammok, isu ti adda iti likudan amin dagitoy.

“Ket rugiamon, a, ‘tiong,” kinuna ti maikadua iti ruangan. “Ta denggenmi man no makadanon met laeng iti impierno ti kararagmo.”

Diak impadlaw ti panagkullayawko. Nadlawak ketdi a di matimtimek ti nangsuyat kaniak. Nakatakder pay laeng daytoy iti makannawanko.

“Tata, pakomustaamto ni Lucy, ha?” inggarakgak met ni Piglat.

Inobserbak ti bagik. Nupay nasakit pay laeng ti napalek nga ulok itay, nagsubli ketdin ti pigsak.

Sadino ngata daytoy nangipananda kaniak? Diosko, sikan ti makaammo kaniak.

Komusta metten da tatang ken nanang. Naammuanda ngatan ti napasamakko?
Nakangngegak iti ungor ti dimteng a lugan.

“Addan ni Boss!” impukkaw ti maysa kadagiti guardia.

Nagsardeng met dagiti agiinnipis ket sinabatda ti dimteng. Nabati ti nangsuyat kaniak.

“P-pakawanendak, sir,” kinunana. Nagtakder iti sanguanak. “Idi pay laeng a kayatko ti umikkat iti grupo. Ngem awan ti maaramidak. Patayenda ngamin ti pamiliak,” inseriosona.

“Maawatanka, barok. Ti napateg, nautobmo dagiti biddutmo. Agkararagka iti Dios tapno tulongannaka. Ta isu ti…”

“Bravo! Bravo! Bravo!” naipalakpak iti ruangan.

Ni Noel ti dimteng! Husto ti atapko. Ket kaduana pay ni Kapitan Sabas! Pudno gayam a maysa kadagiti asoaso.

(Adda tuloyna)