Sakbay nga Agtabon ti Initko

Ababa a Nobela ni Jobert M. Pacnis
(Maika-16 a paset)

NARIKNAK ti pannakaiyadayo ti naidennes a paltog iti pispisko. Saan a siak ti napuntaan?

Immulagatko dagiti matak. Dua kadagiti agiinnipis itay ti nakadata iti sanguanak. Nadigosda iti bukodna a dara! Ni kapitan, kimleb iti suli.

Sharp shooter la ketdi ti nangtira kadakuada.. Napatangadak. Agyamanak, Diosko, naitanamitimko. Kunak la ketdin no siak ti napuntaan iti kanalbuong.

Awanen ni Noel iti nagtakderanna itay. Naglemmeng la ketdi.

Ngem asino dagiti dimteng? Dagiti polis? Dagiti soldado? Asino? Kasano a nasurotandak ditoy?

Agsisinnungbat latta dagiti kanalbuong. Kumaribuson dagiti nabati iti uneg. Maysamaysa ti nagsapul iti paglingedanna. Ni kapitan, inyar-arudokna ti nagturong iti bassit a ridaw iti kannawan.

Nariknak ti pannakaukarkar dagiti galutko. Ti nangsuyat kaniak iti danum!

Nagyamanak kenkuana.

Ngem nakitanakami ni Piglat a nakalemmeng itan iti abay ti tawa iti kannawan. Pinaputokannakami. Pinardasak nga insuyo ti bagik iti pempen dagiti kayo. Nakariknaak iti nabara nga immagibas iti kanawan nga abagak. Simmaniit. Ammok lattan a napuntaanak idi agsayasay ti dara.

Naimatangak ketdi ti pannakatuang ti nangtulong kaniak. Ammok lattan a natamaan. Nagkuripaspas daytoy sakbay a nagtalna.

Nangemkemak. Ngem awan maaramidak. Awan man la a pulos ti igamko nga isarang koma iti grupo ni Piglat.

Immasideg ni Piglat iti naglemmengak. Ap-apputek ti sugatko tapno di unay agsayasay ti dara. Siguraduenna siguro a natayakon. Nakatutok ti igamna iti ‘yanko. Kinarawak ti paniok ket pinardasak nga imbedbed iti sugatko.

Kinellaatko. Inwalinko ti imana a nakaiggem iti paltog sa pinasabtak iti nakilnet a disnog ti darangidongna. Nagwarsi iti dara. Naibbatanna ti igamna.

Nagplastar. Inaributantannak iti danog. Ngem nagling-iak laeng a nanglisi kadagitoy. Kinugtarannak. Innalak dayta a gundaway. Nagkul-obak sa sinippadongko. Naawanen iti balanse.

Pinardasak ti timmakder ket pinasarunnuak iti straight kick ti barukongna. Naudatal a kasla tukak.

Innalak ti naiwarsi nga armasna. Pinidutko pay ti pinangpungoda kaniak. Ginalutak dagiti ima ken sakana.

Nagranipak manen dagiti igam. Imsiag dagiti kakadua ni Piglat. Nagnada iti bassit a ridaw a rimmuaran itay ni Kapitan Sabas!

Agmaymaysaakon iti uneg. Inkeddengko a surotek ni kapitan. Ngem masapul nga agannadak ta addada pay tao ni Noel iti ruar.

“Sumukokayon!” nai-megaphone iti baet dagiti kanalbuong. “Taga-NBI-kami! Awan met laeng ti mamaay ti pannakilabanyo!”

Nakariknaak iti talged. Ngem kasano a natuntonandak?

Siaannadak a rimmuar iti bassit a ridaw. Dua a bangkay ti nalabsak iti ruar. Pinaliiwko ti aglawlaw. Naglingedak iti puon ti kayo.

Nadlawak nga adda nagkuti iti kasamekan iti masanguanak. Tao la ketdi. Sinalikawkawak; napnuan annad. Inin-inayadko nga inasitgan. Tumalangkiaw iti masanguananna. Idi makaasidegak, linagtok a dinisnog. Nagangek. Diak pay napnek. Kinugtarak ti bakrangna. Napakleb. Permi nga asugna. Pinadatak. Ni Kapitan Sabas!

“Nagpullokan, kap!” kinunak. Impaturongko kenkuana ti igam ni Piglat.

“Pangngaasim, dinak a papatayen! Bay-am ketdi a makalibasak, agbayadak kenka uray mano,” naalana pay laeng a kinuna.

Kinatawaak laeng. “Diak masapul ti kuartam, kap! Ammok a nagtaud dayta iti nangisit nga aramidmo!”

Nagkirpa dagiti putok. Simmuko ngatan dagiti tao ni Noel? Wenno naibusdan? Komusta metten ni Noel? Napaltogan ket natayen? Wenno nakalibas?

Idi masiguradok nga awanen ti peggad, rimmuarkami ken ni kapitan. Pinagbalinko a kalasagko. Narigaten no adda pay laeng kalaban iti asideg ket matiambaannak.

“Gayyem!” naipukkaw.

Ni Sherwin! Ti gayyemko a head ti NBI iti kabisera!

Nagtaray nga immasideg kadakami.

“Agyamanak, gayyem,” kinunak.

“’Nia ket ni gayyemen. Kasla awan ti nagkadkaduaanta.”

Dati met laeng a reporter ni Sherwin. Nakadduak idi ‘diay Manila. Ngem nauman sa ta idi kuan, nadamagko laengen a simrek nga ahente ti NBI. Adun dagiti kaso nga inyum-umanko kenkuana— a dina nagpangaduaan ti nangtulong kaniak. Tallo tawenen a naidestino ditoy probinsiami.

“Ni Noel?” sinaludsodko idi maposasan dagiti taona ni kapitan. Impandan iti luganda.

“Naglibas. Ngem dika agdanag, kinamaten dagiti dadduma a taok.”