Sakbay nga Agtabon ti Initko

Ababa a Nobela ni Jobert M. Pacnis
(Maikadua a paset)

Naburburtiaanak.

“Panggep pay ketdin da Lakay Aldong a pakonbert a sigay ti daklisda.”

“Ta apay?”

“Awanen ti makalapan iti igid. Perdision laeng ti isasalogda. Adu unay ti taona ket di umanay a mapagbibingayan ti maala. ‘Imbag kan’ ti sigay ta uray tallo laeng a tao, mayaten nga isalog.”

Ad-addan a naburburtiaanak. Malagipko la unay, idi sumursurotak pay laeng nga agdaklis, nakaad-adu a maala. Talakitok, maria-maria, talibukno, bilis ken taburkit. Bulong-unas pay no kasta a nalibeg ti danum. No dimi maabotan nga aggagayyem dagiti agdaklis ta nasapada a nagrubuat, pamrayanmi ti agbantak. Tarukoy, kusimay wenno gakka dagiti apanmi. Agkikinnaadukami iti maala. Bayagmi la idi a maibato ti bantak, addan manggutad. Nagdadakkelan ketdin nga usuos kada barraungan dagiti maalami. Makantiawan ti kabassitan iti maala.

Bassit idi ti tallo saludan a maala dagiti agdaklis tunggal pannakaiwayatna. Kanayon a kasla agpiesta ti baybay gapu iti kaadu dagiti tumulong nga agguyod. Pati dagiti bakasionista nga agdidigos, makipagguyguyodda met. Addada pay idi panawen a no agkidar ti billangan, kurang ta lima a traysikel nga agbunag kadagiti madaklis. Gundawayan met no kuan ni nanang ti mamugguong. Mapmapno ti tallo a karambana, aglaon ti tunggal maysa iti lima lata, iti bugguongenna. Sabali laeng ti aggian iti bugbugtong a putikna. Daytoy ti in-inutenmi a prituen wenno kalamansian a sidaen tunggal agsapa. Nanumo ngem napnuan kaipapanan a naglabasan.

“’Maykan, angkel!” impukkaw dagiti ubbing idi mapasungandakami. Kasta unayen a panaglangoylangoyda.

“Sige!” impukkawko.

“Ramanam ‘toy kusimay, angkel,” kinuna ni Rex, ti barito nga anak ni Kasinsin Raul. “Nagimas!

Nangpidutak iti dua manipud iti selopin a pinagikkanna iti ammok lattan a kinalina a kusimay. Binugguak dagitoy iti danum-baybay. Insam-olko kalpasanna. Kas pay laeng idi a nasarangsang ken nananam.

“Makunam, angkel?”

“Naimas a talaga, kaanakan. Kaaduem ti agkali ta gatangekto,” kinunak. Ar-arapaapek ti sinigang a kusimay a nalaokan iti uggot ti kamotit ken kilawen a napettakan iti silit’ sairo. Timbog la ketdi ti dilak.

Nagpakadaak ken ni Kasinsin Charlie. Imbagak nga agwatwatak biit.

“Sige ta bantayak ‘toy balontayo,” kinunana.

Nag-joggingak a nagpadaya. Dakkelen ti nagbaliwan ti aglawlaw. Asideg unayen ti baybay iti pantok. Awanen dagidi pinuon ti niog. Innalan ti baybay? Saan metten a kas idi dagiti pantok. Karuotanen dagitoy.

Nakapay-an dagiti bayyabas, bayuyo ken pandan? Ken ti bakung a kasla puon ti saba ti puonna nga agas dagiti nataengan? Maituno daytoy sakbay a mapadiretsuan a magudua a maitapal iti nalamiisan a paset ti bagi.

Agkaraiwara ketdi dagiti runo iti kadaratan. Nabiit pay siguro a naglayus. Ta no nabayag koman, naibusen dagitoy a pinagluto wenno nagtunuan dagiti mangngalap wenno dagiti agpipiknik.

Nabang-aranak iti panangallop kaniak ti angin-baybay. Ti ketdi pagyamanak, nadalus latta ti danum. Saan a kasla idiay Manila a basura ti isabsabbuag dagiti dalluyon. Nga ayaten latta met a paglangoyan dagiti agindeg iti asideg aglalo no kastoy a panawen ti kalgaw.

Yaman pay, Apo, naitangadko, ta di pay nasumok dagiti kailiak a pagibellengan ti baybay. Ania ket koman a kinarugitna ita!

Ngem apay ngata a kinuna itay ni kasinsin nga awanen ti makalapan iti igid? Nagpatngada ngatan? No awan, apay ngarud a nagadu latta dagiti bilog iti nalabasak a pondoan?

Bu-booommm! Bu-booommm! Bu-booommm!

Nakigtotak. Napasardengak pay iti panag-jogging-ko. Bungbong la ketdi daydiay!

Imbarsakko iti taaw dagiti matak. Nupay kasla gemgemda laeng iti panagkitak, nalawag a masirayak dagiti bilog a naglilinnawlaw. ‘Diay la ketdi ti naggapuan ti kanalbuong!

Napasennaayak. Daytoy la ketdi ti makagapu nga awanen ti madaklisan iti igid. Nastrek gayamen ti bungbong wenno dinamita ditoy ilimi.

Ngem apay a di tiliwen ida dagiti otoridad? Kas met la ngata kadagiti adun a nakobkoberkon a damag a di kabaelan dagiti polis wenno maseknan daytoy ta adda dakkel a tao a makalabanda no kua?

(Maituloyto)