Sakbay nga Agtabon ti Initko

Ababa a Nobela ni Jobert M. Pacnis
(Maikatlo a paset)

Nagsubliak iti yan da kasinsin. Narusepakon iti ling-et. Dagus a sinapul dagiti matak ni kasinsin. Agpagpagna iti mataptapliakan ti dalluyon. Inasitgak.

“Daydiay kadi ti rason, kasinsin?” inamadko.

Nagtung-ed. “Aduda dagita,” napait a timekna. “Tallopuloda amin.”

“Apay a di agreklamo dagiti mangngalap?”

“Pagipulonganda koma?”

“Ni kapitan… ni mayor… kadagiti polis!”

Napangilangil. “Idi damo, tiliwen met pay laeng ida dagiti polis. Ngem ita…” inlibbina.

“Ta apay?”

“Damagmi a kimmappengen ni hepe iti adda iti likudan dayta ilegal a panagkalap. Nakisosio. Uray pay ni kapitan!”

“’Sino dayta a tao?”

“Dakkel a tao. Politiko.” Nagtalatalangkiaw ta amkenna siguro no adda makangngeg iti patanganmi. Imbagana ti atapda.

“Ania?”

“Dakkel nga ebidensia dagita,” intudona dagiti barangay nga agpapaigiden. Nalpasdan a kinapot dagiti nabungbongda.

“Pagkunaam, kasinsin?”

“Mingmingam, miraem a nalaing ti naipinta nga inisial iti bakrang dagiti barangay. Adda kad’ pay sabali nga aginisial iti kasta?” Ket nalagipko ti kunana a “dakkel a tao.”

Nariknak, kasla adda bimmangon a gura iti kaunggak. Isuda pay a mangituray ti mangyun-una iti kinikillo nga aramid. Dida la ketdin mapnek nga agak-akup iti pondo dagiti proyekto nga isaysayangkatda. Ita, pati pagbibiagan dagiti babassit, agawenda pay.

“Dimo latta koman sawsawen iti sabali ti nakunak, kasinsin.”

“Apay?”

“Adu ti aso iti aglawlaw!”

Napaangesak iti nauneg. Kastoy kadin ti Cabaybay ita? Kasano ngarud a dumur-as ita dagiti babassit a mangngalap no adda dagitoy a kita dagiti lider?

Idiay siudad, normalen a damag kadagiti estasion ti radio wenno telebision, uray payen kadagiti pagiwarnak, ti kinatiri dagiti lider. Ti panagkautda iti kaha ti gobierno. Ti panangirurumenda kadagiti nakakaasi la ngaruden a kailian. Ita, mapaspasamak met gayamen ditoy.

“Saan laeng a dagita ti mapaliiwmo iti panaglabas dagiti aldaw, kasinsin,” pinangburak ni Kasinsin Charlie iti pinagulimekko. “’Ton agtanoy, ad-adu pay ti maduktalam…”

Agsaludsodak koma pay ngem isu met nga agpukkaw dagiti kadduami.

“Intan,” inyawisna. “Nakasaganan ti taraon.”

Kawaw ti ulok uray idi agmermeriendakamin. Sumekseksek iti panunotko ti naimatangak itay kasta metten ti naestoria ni kasinsin. No agtultuloy ti kastoy nga aramid, saan nga adayo a mapasamak nga uray iti tengnga, awanton ti makalapan. Ta madadaelen dagiti pagitlogan dagiti ikan.

Napasennaayak laengen.

Kalpasan a nakameriendaak, nagpakuyogak ken ni Kasinsin Charlie iti pondo dagiti bilog. Mapankami man ketdi gumatang iti ikan a pangaldawmi.

Apaghusto a nakasang-at ti maysa a barangay a nadanonmi iti pondo. Tinan-awak ti kutit daytoy. Urayak la napamusiig a nakaimatang kadagiti ikan. Mabagbagisanda. Naala la ketdi daytoy ti bungbong!

Diak la koma gumatangen ngem siguradoak a di umanay ti balonmi nga igado iti kinaadumi. Inkissiimko ken ni Kasinsin Charlie a pilienna dagiti di unay napakaruan nga ikan a gatangenna.

“Ne, ‘sino ti kadduam, Charlie?” adda dangdang-as ti agarup kataebko a lalaki a nagdamag ken ni kasinsin. Napigket ti panangkitana kaniak. Agarup agkatayagkami iti lima kadapan ket innem a pulgada a takderko. Dakdakkel ti bagina a namsek iti taba ta kasta unay a butitna; saan a kas kaniak a namnamsek dagiti maselko. Long hair; naatap dagiti matana.

“Ni kasinsinko a Rilo, kap,” insungbat ni kasinsin. “Nabiit pay a simmangpet a naggapu ‘diay Manila.”

Nagtungtung-ed ti naawagan iti kap. Pinababa-pinangatonak a miningmingan.

“Saan met laeng a makabudo?” dinamag ti kapitan a di nangisina iti panagkitana kaniak.

“Saan, kap,” alisto a sungbat ni kasinsin.

“Naimbag nga agsapayo, kap,” indaydayawko. Inyam-ammok ti bagik.

“Sika gayam ti anak da Berto ken Pinang,” intungtung-edna kalpasanna. “’Tay reporter nga aglatlatak iti Kamaynilaan…” immusiigna.

Diak nagtimtimek. Mariknak, kasla nadagsen ti darana kaniak.

“Apay, ania ti nagawidam?” awan latta ti as-asinna. “Umayka met agkalap?” inkusilapna. “Agkalap iti damag?”

“Saan, kap,” insungbatko. Intedko ken ni kasinsin ti bayad ti inlasinna a tallo a kilo a talibukno.

Binayadan a dagus ni kasinsin ti innalana. Nagpakadakami a dagus.

“Apay a diak mairupaan ni kapitan, kasinsin?” inamadko idi maakadayokami iti pondo.

“Naikamkamang laeng ditoy ni Kapitan Sabas, kasinsin. Tagasentro. Anak ni Engr. Usamil ti asawana.” Ti kabaknangan ditoy Cabuyonan a barangaymi ti kayatna a sawen. “Putot ni Abogado Daquigan. Agannadka, madlawko ket madi ti papangremanna kenka.”
(Maituloyto)