Sakbay nga Agtabon ti Initko

Ababa a Nobela ni Jobert M. Pacnis
(Maikapito a paset)
AGPALPALPAAK iti kubokubo iti bakrang ti balay kadayta a leppas-pangngaldaw idi mapasungadak ni Konsehal Nardo. Nakapudpudot la ngaruden, suotna pay laeng ti maong a diaketna a namarkaan iti KAGAWAD. Adda iggemna a nalukot a papel.

Kellaat a nalagipko ti napasamakmi ken ni Kapitan Sabas.

Sinabatko. Ngem naunaandakon da Brownie, Marian ken Whitie, ti tallo kadagiti lima nga asomi. Aw-awagak dagitoy iti BMW iti peggesda a mangsabat kadagiti agdadamo a maisar-ong iti balay. Idinto a da Piglat ken Gimpol, kaamoda amin a tao.

“Salaki!” binugtakko da BMW. Dagusda a nagsubli iti sirok ti mangga a pagkukulangtotanda itay.

“Aniat’ maipaayko, konsehal?” inamadko ken ni Konsehal Nardo idi mapagtugawko iti kubokubo.

“Umayko koma ipan daytoy, sir,” inyawatna ti papel nga iggemna.

Binasak.

Subpoena! Ket ni Kapitan Sabas a mismo ti nangireklamo kaniak. Panangbastos iti otoridad ti nakalanad a reklamona.

Asino ngata ngarud ita ti mangdengngeg iti reklamona? Isuna a mismo? Nalabit, dagiti konsehalesna. Agbalinda ngata a patas iti imbestigasion?

Impanamnamak ken ni Konsehal Nardo ti panagpakitak iti barangay hall iti naituding nga oras.

Binagaak dagiti kasinsinko idi makalikud ni Konsehal Nardo. Agpakuyogak kadakuada iti barangay hall ta baka no ania pay ti aramiden ni kapitan no agmaymaysaak laeng. Immannugotda met.

Agsuksukatakon idi mapasungadak da Tata Pistong ken Tata Ikko. Kayatdak kano met a kuyogen. Binagaan la ketdi ida dagiti kasinsinko.

Innemkami amin a nagturong iti barangay hall. Kas ninamnamak, addan ni Kapitan Sabas a nadanonmi iti pangiliten nga opisinana a kaduana dagiti dua a konsehalna. Awan pay ti sekretaria. Nagdakkelan ti ladawan ni Noel iti diding. Kasla banias iti panagkitkitak iti panagisemna.

Ti pay nakadidillaw, awan man la uray maysa a pammadayaw koma met a nakadisplay iti rabaw ti cabinet. Nakataptapok dagiti tawa. Agkubkublang ti pinta ti barangay hall. Masirsirip ti tangatang iti sallabawan. Ti met basketball court iti sango nga agpapaay metten nga auditorium, matmatnagen dagiti ring-na. Agpaypayapay payen dagiti tabla a pannaka-board-na.

Napawingiwingak. Pappapanan laengen ti pundo ti barangay? No awan bombiliana dagiti nalabsanmi nga street lights, nabtaken dagitoy. Ti pamilagan ti barangay, kunam no nagsusungkaan dagiti nuang.

Nairteng dagiti mata ti kapitan a naiturong kaniak. Kasda la kumilaw. Dina man ibaga, kasla damdamagenna no apay nga addada kadduak. Ngem kas nakunak, nalaka, aya, no makapanunot iti dakes ket awan man la ti mangikaluya kaniak?

Pinagtugawnakami. Nagyamanak.

“Apay kadi, kap?” sinaludsod ni Tata Ikko. “Ania ti basol ni Rilo?”

“Diyo kadi pay dinamag kaniana?” awan man la ti panagdayaw ni Kapitan Sabas iti natataeng ngem isuna. “Kinuykuyogyo pay met ngarud!” Nakaun-uneg ti panagangesna. Pinagbayogna pay ti barukongna.

“Kayatmi koma ngarud a sika ti pakaammuanmi, kap,” nababa a timek ni Tata Pistong, “tapno awan ti biasna. Narigat met no ni lattan Rilo ti pakaammuanmi. Siempre, ikalukagna ti bagina.”
“Dayta man aginlalaing a reporter a kapurokanyo! Awan man la ti panagraemna kaniak a kas ama daytoy a barangay!” intebbag ni Kapitan Sabas. No makapatay ti kusilap, itayak pay koma a nagkudaap. Kurangna laengen a disnogennak.

Ngem itay pay a sipsiputak dagiti garawna. Diak met ketdi a kettatan. Iti kinadang-asna sipud pay idi damomi ti agam-ammo, naawanen ti panagraem a rumbeng a maipaay iti kas kenkuana nga ama ti barangay. Ipakpakitana laeng nga awan sursurona.

“Apay, ‘ya?” inunton latta ni Tata Pistong.

Ket inistorianan ti panagpakorientek ken ti diak panagtungpal iti kayatna a mangtiliw iti pagkoriente. Gapu kadayta, nabastos kano.

“Apay ngamin nga iparitmo nga agpakoriente, kap, ket kukuada met ti buyon?”

“Dayta ngarud ti ordinansa ti barangaytayo!”

“Ti ammok, kap,” ni Kasinsin Raul, “saan a sakupen dayta nga ordinansa dagiti piskeria wenno buyon a kukua ti pribado a tao.”

“Nalawag idi,” insupusop ni Kasinsin Charlie, “impakaammoyo dayta nga ordinansa, kap, nga iti waig ken sangka laeng ti pakaipakatanna. Apay ngarud itan?”

“Napalawa ti sakup dayta nga ordinansa!”

“Apay a dimi naammuan, kap?” inallawat ni Kasinsin Badol.

“Ulitek, kap,” insarunok met, “apay a nakunayo a mabalin ti agkoriente no maipakada?”

Napaumel. Kinitana dagiti dua a konsehalna. Agpatulong? Ngem nagtalinaed a nasirait ti ngiwat dagiti konsehalna. Awan masaoda ta ammoda a biddut ti dadauloda? Wenno talaga nga awan ammoda kadagiti linteg?

“Ken apay a di dagiti agbungbong wenno agdinamita ‘ta baybay ti tiliwenyo, kap?” innayonko. “Saankay’ met siguro a tuleng tapno diyo mangngeg dagiti kanalbuong.”

“Ket no awan met luganmi a mangkamat kadakuada,” inrasonna. “Dayoda ket nagpepegges dagiti bilogda.”

“Ngata, kap?” inuntonko. “Segun kadagiti nakapatpatangko, kalugarantay’ met laeng dagiti agbungbungbong. Laeng ta dida matiltiliw ta sibubulsektay’ sa met? Wenno…? Narigat laeng ket ti agat-atap.”

“Naglaingkan nga agsao! Adda ebidensiam?”

“Mangngalapen dagiti nagtimek, kap…”

(Adda tuloyna)