Sakit a dengue, nakontrol iti San Emilio

SAN EMILIO, Ilocos Sur – Nakontrol met laengen ti sakit a dengue ditoy, segun iti opisial ti salun-at ditoy.

Kinuna ni Dr. Sherly Luna, doktor ti rural health unit, a saanen a nanayonan pay ti kaso ti dengue kadagiti napalabas a lawas.

Dua ti natay ken nakurang a limapulo ti nagsakit iti dengue ditoy nga ili kadagiti napalabas a bulan manipud Mayo, nangruna ti Barangay Tiagan ken Lancuas.

Kas paset ti naing-inget a kampaniana maikontra iti dengue, nagisayangkat ti RHU ken dagiti agtuturay iti panagipakbo kadagiti posible a pagitlogan ti lamok, fogging operation, ken information dissemination nangruna iti panagdaldalus ditoy.#