sinursuran-banner-sqSinursuranNi Jobert M. Pacnis

Ti sakripisio ti maysa nga ina

BABAI, addayta ti anakmo…

Maipalagip manen daytoy ita a panawen ti Kuaresma. Maysa kadagiti Maudi a Pito a Balikas ni Kristo Hesus idi addan a silalansa iti krus sadiay Bantay Kalbario. Silalansa, sibibissayot tapno subbotenna ti basol ti Lubong… dagiti tao a nasukir ken natangken unay ti uloda.

Iti dayta a panagrigrigatna iti krus, nasaona pay laeng daytoy iti maysa nga ina, a kadua ti inana iti abay ti nakabitinanna a krus, a saan a ti kasasaadna ti inna inyasug.

Ipamatmat daytoy a balikas ni Kristo no kasano ti kinapateg ti maysa nga ina. Masapul koma a maaddaantayo iti nasiken a langenlangen iti inatayo, wenno iti sibubukel a pamilia.

Mayannatup ita a pagmennamennaan daytoy a banag gapu kadagiti mapaspasamak iti agdama. Saan a limed kadatayo dagitoy.

Addada ita annak a kabaelanda a di taliawen dagiti nagannakda. A basbastosenda. A dida ipangpangag wenno dengdenggen. Addada annak nga isuda payen ti mangkettel iti biag a nagtaudanda.

Nakaledleddaang a panunoten dagitoy. Kalpasan ti siam a bulan nga inimet ti ina ti anakna iti saklulona, mano a tawento pay la daytoy a taptapayaen, sapsapuyoten para iti nasayaat a panagdakkelna. Apaman a dumakkel, adda manen dita ti akem a masapul a maitedna nga umno dagiti kasapulanna, manipud iti kawes, taraon agingga iti panagadalna. Ipaay ti ina amin dagitoy, iti pannakibadang ti ama, ta paset ti kinainana.

Nga uray la malipatanna ti bukodna a bagi! Ti napateg, maiturongna ti anakna iti pagsayaatan daytoy.

Saan ngarud a magatadan ti sakripisio ti maysa nga ina.

Aglalo kadagitoy a panawen! Mabalin a madamagtayo no apay.

Iti nagduduma a rason, adu a pagtaengan ita ti marakrakrak. Mabati ti ina a mangkita iti pagimbagan dagiti annakna. Kadawyan daytoy a buya no kasta nga agsina dagiti agassawa. Mabati ti anak wenno annak iti sidong ti ina. Kakaasinto daytoy a mangisakad iti aginaldaw a panagbiagda.

Ngem saanto a pulos a maimatangan iti isusuko ti maysa nga ina. Kasla mannakigubat nga awan aatrasanna kadagiti masagangna a parikut wenno pagdagsenan ti biag. Sititibker a makibalubal para iti anakna… para kadagiti annakna.

Ti pay yanna nga adat, adda pay ti aglawlaw a kalaban ti maysa nga ina iti panangpadakkelna iti anak wenno annakna.

Nabileg ti barkada a mangisagmak kadagiti ubbing. Inayon ditan ti social media a pagtaytayyekan ita ti lubong dagiti ubbing. Maaramidda dagiti banag nga idi panawen ti panagdakkel ni ina, awan dagitoy. Addada laeng a tumultulong kadagiti aramid iti pagtaengan.

Ngem ita? Mano nga oras ti busbosen ti maysa nga ubing a mangmanmanipular iti gadietna? Saan met ngarud a mabalin nga awananda ita iti kastoy a ramit. Masapulda iti panagadalda. Ta nupay makuna a modular ti wagas ti panagbasada, masapulda latta ti selpon tapno dida maudi iti klaseda. Aglalo no kasta nga adda ikannawag dagiti titserda.

Masapul latta dagiti ubbing ti gadiet para iti panagsukisokda iti internet. Ken kas katulongan a mangpabaknang iti isipda—a dida maudi kadagiti mapaspasamak iti gimong ken itinto iseserrekda iti panggedan.

Kapilitan nga isakripisio manen ti maysa nga ina a paaddaen dagitoy a ramit para kadagiti annakna.

Ti laeng nakaledleddaang, segun met laeng iti panagadal, adu nga annak/ubbing ti maiyaw-awan. Para iti sabali a banag ti pangusaranda kadagiti ramit. Kanawan-kanigid dagiti agtitiktok. Saan met ketdi a dakes daytoy ta adda met talento a mapabaknang itoy nga app. Laeng, adu unay nga oras ti masaysayang gapu itoy nga aramid. Saanen a mapengdan dagiti annak ti riknada ket adun dagiti maliplipatanda iti katitiktok.

Kangrunaan ditan dagiti akemda iti pagtaengan. Ken ti klaseda. Imbes a sanguenda nga ileppas dagiti modules-da, ti met agtiktok ti pakakumikomanda.

No dillawen ida dagiti innada, ta naynay met nga awan dagiti amma gapu iti trabaho wenno ti kaaddadan iti sabali a denna, dagitoy pay ti makapungtot. Kadaksan ti amin, mapagsawanda pay dagiti innada.

Maysa a kita ti kinabastos a nakakalkaldaang a panunoten. Adu ti agiinnaddayo a rikna gapu iti sabali ti pannakausarna dagiti app iti social media. Marakrakrak dagidi langenlangen nga impatawid pay kadatayo dagiti appotayo.

Makapailiw ngarud dagidi aldaw a kasla di kompleto ti agmalem no saan nga agsasango dagiti agkakasolaran, agkakapurokan iti tianggi ti purok. Dita nga agpapatangda kadagiti napaspasamak kadagiti napananda— a naynay a kadagiti nanggedanda. Itoy a panagpapatang, a mabuyogan iti pananglidok iti sangkabassit a makaulaw, patpatibkeranda ti langenlangen iti nagbabaetanda.

Ngem ita, uray agkakabbalay, adayon a makapagpapatangda. Gapu laeng iti sabali a pannakausar dagiti ramit-elektroniko!

Ngem ti maysa nga ina, saan latta nga agpulkok a mangbagbaga kadagiti annakna. Nupay masaksaktanen ti riknana! Akemna dayta ket ikagumaanna nga annongen.

Maidawat la koma ngarud kadagiti annak a dida lumbes iti linia. Panunotenda koma ti sakripisio dagiti innada.

Rumbeng koma laeng nga ipamatmat met dagiti annak ti panangipategda kadagiti innada. Idawdawat daytoy ni Kristo iti panagtutuokna iti krus. Patgantayo koma ti kiddawna.

Kunada ngarud, maisakripisio, malipatan ti anak ti inana ngem pulos a dinto maisakripisio wenno malipatan ti ina ti anakna. Iti kinadakkel ti panagayatna itoy, aramidenna amin uray pakaisagmakanna. Idi laengen ibuangna daytoy, panangipusta daytan iti bukodna a biag.

No apay a malipatan dagiti annak! A kasla awan ti utangda a naimbag a nakem. Utang a di pulos singsingiren ti maysa nga ina. Maipalagip man ti maysa a post iti social media. Inlista kano ti masuron unayen nga anak dagiti utang ti inana iti inaldaw. Mangrugi iti panagdalus iti balay, panaglaba, panaginnaw ken dadduma pay. Prinesioanna dagitoy.

Ngem ania ti sungbat ti ina? Siningirka kadi, anak, manipud idi inimetka iti siam a bulan? Idi ipasngayka? Idi pinadakkelka? Ita ikagkagumaanka a makaadal?

Iti aglawlawtayo, adda la ketdi met nakaledleddaang a mapaspasamak iti nagbaetan ti maysa nga ina ken anak. Wenno iti mismo a pagtaengantayo. Dagitoy koma ti mapasardeng. Ket paset ti tunggal maysa kadatayo iti dayta a pannakapasardeng.

Kadagiti annak, timudenda koma ti araraw ni Kristo iti Bantay Kalbario. Dayawen ken ipategda koma dagiti nagannak kadakuada. Saanda nga abalbalay nga awanan iti rikna. Taoda a rumbeng a respetuen. Uray kunaen a di maipapaay amin dagitoy dagiti kasapulan, ina ket inadanto latta. Siuutang ti tumunggal maysa kadakuada.

Laglagipen, dumtengto met ti panawen nga agbalin nga ina (wenno ama). No saan a kayat a malak-amanto dagiti iparparikna, ipakpakita kadakuada, agbalin ngarud a manakem nga anak.

Anak, addayta ti inam…

Anianto ngatan a nagragsak ti aglawlaw, ti Lubong, no ayat ti adda iti nagbabaetan dagiti kameng ti pamilia!

Ket saan a masayang ti panagrigrigat ni Kristo iti krus. ●