Footer

Saksi kadagiti pammapatay, mabutengda nga agsao

CABUGAO, Ilocos Sur – Awan pay makalawas kalpasan dagiti nagsasaganad a pammapatay ditoy, naisayangkat ti reshuffle dagiti hepe ti polis a pakairamanan ti COP ditoy. 

Nupay kasta, saan nga imbaga ti provincial police office no adda pakainaigan dagiti pammapatay iti pannakasukat ni P/Sr. Insp. William Nerona kas hepe ti polis ditoy.

Ni P/Chief Insp. Satur Idiong ti nangsukat ken ni Nerona. Naggapu ni Idiong iti Cervantes municipal police office.

Idi Hulio 13, Biernes, nagsaruno a napapatay da Rolly Corrales, 36, naasawaan, residente ti Barangay Quezon ken Denden Solis, residente ti Barangay Lubong Darao, ken Ricardo “Ambong” Somera.

Ngem linagidaw ni Nerona ti kaawan ti agsaksi mainaig iti nagsaruno a pammaltog a nakatayan ti tallo a tattao.

Kinuna ni Nerona nga adda dagiti nakakita kadagiti pammaltog ngem awan ti lumtuad a mangited iti impormasion tapno maammuan ti kinaasino dagiti nagisayangkat iti krimen.

“Mabutengda nga agsao,” kinuna ni Nerona idinto nga inyunay-unayna a lumtuad koma dagiti nakasaksi kadagiti pammapatay.

Kiniddawna kadagiti kakailianna nga “ikkatentayo koma ti politika kadagitoy a gundaway tapno saan a bumara.”

 Iti inisial nga inbestigasion ti polis, napan imminum iti saggaysada a beer da Corrales ken Solis iti Mary Ann’s Store kas nakairuamanda iti minalem sakbayda nga agawid.

Agluganda koman iti chopchop a motorsikloda idi immasideg ti gunman sana dineppelan a pinaltogan.

Nagsagrap iti sugat ni Corrales iti ulo ken bagina a nakatayanna a sigida.

Naitaray ni Solis iti Pira Clinic and Hospital ngem natay bayat ti pannakatamingna.

Nakarekobre dagiti polis iti 6 a kapsula a nagtaud iti cal. 45 iti crime scene.

Kabayatanna, natay bayat ti pannakaagasna iti Suero Clinic and Hospital ditoy ni Ricardo “Ambong” Somera gapu iti sugatna iti abaga a simrekan ti bala sa simmalpot iti kilikilina.

Madama nga agiinom da Somera ken sumagmamano a kakaduana a pakairamanan da Konsehal Dodie Santella, Carlito Corpuz, Elmo Lopez ken maysa a Masong Somera iti tienda ti anak ti natay iti Barangay Bonifacio ditoy idi pinaltopaltogan dagiti suspek a naglugan iti XRM ti Land Cruiser a nakaparking iti sanguanan ti tienda.

Iti pannakiuman kenkuana ti media sakbay ti pannakasukatna, kinuna ni Nerona nga awan a talaga ti target dagiti suspetsa ket natamaan ni Ambong Somera iti bala a simmalput iti plywood a pannakalinged ti pagin-inumanda.

Kinuna ni Nerona nga adda saksi iti pammaltog ket nakuna daytoy a naglugan dagiti suspetsa iti nangisit nga XRM a motorsiklo.

Nupay kasta, di nabigbig ti saksi dagiti nakakallugong a gunmen a nagaruat iti camouflage uniform.

“Narigat pay nga ibaga nga adda pakainaigan dagiti pammaltog iti politika,” nakuna ni Nerona idi madamag no politika ti adda iti likudan dagiti pammapatay.

“Agtultuloy ti inbestigasion, satayto la ammon no aglawagen,” kinuna ni Nerona.

Maal-alimadamad a mapan ni Nerona iti Vigan City kas deputy chief of police.#