Footer

SALAYSAY: 70 a tawen a nagsinsinnuratkami (Maudi a paset)

Impasiar ni Ricarda L. Allibang dagiti agassawa a Bill ken Bertha Deihl iti Camp John Hay idi bimmisita dagiti sangailina iti Baguio City idi Pebrero 15, 1982. Inrapit dagiti agassawa a Deihl ti yaayda iti Pilipinas iti panag-tourda tapno laeng agkita dagiti agpagayam.

Impasiar ni Ricarda L. Allibang dagiti agassawa a Bill ken Bertha Deihl iti Camp John Hay idi bimmisita dagiti sangailina iti Baguio City idi Pebrero 15, 1982. Inrapit dagiti agassawa a Deihl ti yaayda iti Pilipinas iti panag-tourda tapno laeng agkita dagiti agpagayam.

Kasta met a sinalsalimetmetak ti retratoda ken ni Bill a naawatko idi Pebrero 23, 1952 a kaduada ti umuna nga anakda, ni Debbie ken ti sabali pay nga anakda a ni David.

Nakitak met ti panaglupos da Debbie ken David babaen dagiti ladawan nga impawpaw-it ni Bertha manipud kinaubingda agingga iti itatapogda iti kinabalasang ken kinabaro ken iti panagasawada.

Agingga ita, ikutko dagitoy a ladawan dagiti annak da Bertha ken Bill, kas ti ladawanda idi Pebrero 2, 1956 nga agtawen laeng ni Debbie iti 4 ken maysa laeng ti tawen ni David. Sabali pay a ladawan nga indulinko ti ladawanda iti abay ti maysa nga aso nga inregalo ni Bertha kadakuada; ken ti napetsaan iti 1962 a retratoda nga agkabsat iti sanguanan ti maysa a sailboat.

Iti maysa a surat kaniak ni Bertha, impakaammona a nangasawan ni Debbie ket ni Jerry Tanderick ti kasimpungalanna.

Simmaruno a nakaawatak iti ladawan da Bertha ken Bill a kaduada da Debbie ken Jerry ken ti apoda a ni Danny.

Sabali laeng ti ladawan dagiti aggasawa a Debbie ken Jerry idi tallon dagiti annakda, da Danny, Marcia ken Jon.

Inkabilko dagiti ladawan iti maysa nga album ket iti panaglabas dagiti tawen, nain-inut a napunno daytoy kadagiti ladawan nga impaw-it ni Bertha.

Uray siak, nagipawpaw-itak met iti retratomi a kinagrupok dagiti annakko. Naammuak nga induldulinna met dagitoy ken inkabilna iti album a kas kaniak.

Ditoy a napaneknekak ti kinapategko metten ken ni Bertha.

Ti suratna a nangipakaammuanna a pimmusayen ni Bill ti kalidayan a surat ni Bertha kaniak.

Insuratko ti pannakipagriknak. Ammok ti marikriknana idi agsurat kaniak mainaig iti ipupusay ni Bill ta napadasakon ti isisina ti dua a patpatgen iti biag. Immuna ni Joy a buridekmi. Sa ni lakay.

Kinunak a dakkel a pukawko ti ipupusay daydi Felix agsipud ta nabatiak a maymaysa a nangisakad iti panagadal dagiti annakmi. Kadagidi a panawen, nakitak ti dakkel a pannakapukolko ti kaawan ti asawa a mangtulong kaniak a mangkibin kadagiti annakmi iti nalinteg ken naraniag a masakbayan. Ngem innayonko a kasta ti biag, masapul nga ituloyna nga akmen ti pagannonganna kas ina dagiti annakna ken lola dagiti apokona.

Ngem uray iti ipupusay ni Bill saan a napugsat ti panagsinnuratmi ken ni Bertha. Ad-adu pay ketdi itan ti impaaymi a tiempomi iti panagsinnuratmi. Kaaduan a topikomi ti bukodmi a pamilia.

“Adun ti appokok,” insurat ni Bertha. Adda pay kanon apona iti second generation.

Siak? Pitoda amin: ni Jasper, nagturpos iti Medical Techno-logy iti St. Louis University ken Fine Arts iti University of the Philippines Baguio, ken agdama a freelance web designer, ken ni Daisy Joy, nagturpos iti Medisina iti University of the Philippines Manila. Isuda ti annak da Rose, ti inaunaan nga anakko, ken Badong, taga-Vigan City, Ilocos Sur.

Ni Ericson nga anak da Howard, ti maikadua nga anakko, ken ni Linda ti Mulanay, Quezon Province.

Ni Kenneth Omar nga anak da Othmar, maikatlo nga anakko, ken ni Delia Pilagan iti Poblacion, Quirino, Ilocos Sur.

Awan ti anak ni Fe, ti buridek, ken ni Max Barber, maysa a Dutch.

Ni Maribeth, Audrey (Potpot), Giyo ken Patrick nga annak da Norma, ti inadaptarko nga apok iti daydi kaanakak a Juaning Pinuay-Lumiwes, ken ni Roy Dadpaas iti Cervantes, Ilocos Sur.

Addan asawa ni Daisy Joy, ni Marlowe, Major ti ranggona ken adda iti Camp Crame, ngem diak ammo no makitak pay ti anakna. Agkakapsutakon ket mariknak nga asidegen ti ipapanawko ditoy a lubong.

Wen, 70 a tawen a nagsin-nuratkami iti pagayamko nga Amerikana. Kalpasan ti 44 a tawen, nagkita ken naginnabrasakami. Mabalin a saankaminton nga agkita pay kalpasan daydi nakallalagip a panagsarakmi ngem ti ammok, agingga iti sibibiagkami a dua, agtultuloyto latta ti panag-sinnuratmi. Agsardengto laeng ti sinnuratmi no awanen ti maysa kadakami. #

(Pimmusay ni Inang Carda idi Marso 17, 2008. Ngem uray awanen, sumagmamano nga aldaw sakbay ti kasangayna idi Hunio 19, maysa a birthday card a naggapu manipud ken ni Bertha ti simmangpet a nangkablaaw kenkuana iti panagkasangayna. SAE)