SALAYSAY: Abel Iluko, kasapulanna ti pannakasappuyot (Maudi a paset)

Nagasat ti Caoayan ta base iti naudi a surbey, adda pay laeng 112 nga umaabel ditoy. Ti makadakes, agpapadan dagitoy a nataengan. Segun ken ni Leonardo Quiocho, agpapaay a Community Affairs Officer/Tourism Coordinator ti Caoayan, iti laksid a maitan-tandudon ti dadduma pay a mabalin a pakaiyusaran ti abel kas iti panagbalinna a kurtina, placemat, abbong ti lamisaan, labakara, shawl, supot ti pungan, pitaka, ken mausar kas gown, tallo a banag ti natakuatanda no apay nga agtultuloy ti panagrigat ti industria : kurang ti marketing strategy tapno maiyam-ammo ti abel Iluko iti ruar ti probinsia ken pagilian; kurang ti mausar a material iti panagaramid iti abel gapu iti kinangina ti magatang a sag-ot ken ti kaawan interes dagiti agtutubo nga agsursuro nga agabel. Toy maikatlo ti pagam-amkanda ta no saan a maipasublat ti industria iti sumaruno a henerasion amangan no maitanem daytoy.

Idi Nobiembre 16 a kaaldawan ti Abante Caoayan Town Fiesta, sangsangkamaysa dagiti Caoayeños a nangisubli iti kinarangrang ti partuatda nga abel Iluko. Inangayda ti maysa a salip nga inawaganda iti Search for Ilocos Sur Abel Iluko Super Models 2009, kaunaan a maangay iti ili ken uray pay iti sibubukel a probinsia. Ditoy nga inrampa dagiti napili a modelo manipud iti sangapulo ket pito a barangay ti Caoayan dagiti bado ken gown a naaramid manipud iti abel. Naggapu kadagiti barangay dagiti agtutubo a nangirampa kadagiti pagan-anay tapno maipariknada kadagitoy ti kinapateg daytoy a tela iti kinataoda. Dagitoy metten ti nakaammo iti kolor, disenio ken klase ti abel nga inusarda kas panangipakitada iti kinamanagpartuatda ken mangipasimudaag a “very versatile” ti abel iluko.

Namindua a nagrampa dagiti modelo para iti casual ken formal attire. Iti pumarbangon, naiwaragawag kas Binibining Abel Iluko Supermodel ni Jackie Lou Gallardo ti Barangay Nansuagao. Agtawen daytoy iti 22, graduado iti kurso a Nursing iti University of Northern Philippines. Inyalatna pay ti special awards a Miss Congeniality ken Best in Casual Attire. Idi mapagsaludsodan no ania ti maaramidanna tapno maipromotna ti abel iluko, siiisem nga insungbatna a dakkel ti maitulong ti naynay a panangusarna itoy tapno maitandudo ti produkto ti ilina. Innayonna a guyugoyenna dagiti padana nga agtutubo tapno agusarda met itoy a tela ket maysa a wagas ti pannakisalipna tapno maipakitana no kasano kapintas dagiti aruaten a naaramid manipud itoy a tela.

Napili met a parehana kas Ginoong Abel Iluko Supermodel ti taga-Barangay Don Alejandro Quirolgico a Kristopher Tugade. Agtawen daytoy iti 20 ken madama a mangal-ala iti kurso a Bachelor of Science in Information Technology iti Divine Word College of Vigan. Naiyawat pay kenkuana ti special awards a Best in Casual Wear ken Best in Formal Attire.

Iti kina-runner up, napili kas Ginoo ken Binibining Karawayan da Kurt Kenneth Aspacio ti Barangay Callaguip ken Sherlyl Abad ti Barangay Anonang Menor.

Inyalat met ni JR Quindipan ti Barangay Don Dimas ti Mr. Congeniality ken Sheryl Abad ti Barangay Anonang Menor ti Best in Formal Attire.

Tapno mataginayon daytoy a programa ti Caoayan, pinirmaan ni Mayor Tugade ti Executive Order No. 9 series of 2009 a mangibilbilin nga agbalin a paset ti tinawen a panagpiesta ti ili ti pannakaangay ti Search for Ilocos Sur Abel Iluko Super Models. Inaprobaran metten ti konseho ti ili iti panangidaulo ni Bise Mayor Gemma Padaong ti maysa a resolution a mangideklara iti nasao a pasalip kas bukod a konsepto ti ili a Caoayan ket saan a mabalin a tuladen ti sabali nga ili a saan nga agpakada nga umuna iti LGU. Inggiddan metten ti konseho a pinadayawan babaen ti maysa a resolusion ni Timoteo Parungao ti Barangay Naguilian kas panangbigbigda iti nagapuananna iti pannakataginayon ti abel Iluko. Itay napalabas a Setiembre 28, napadayawan isuna ken ti produktona nga abel kas Most Outstanding OTOP/SME iti provincial ken regional level. Maysa ni Timoteo kadagiti sumagmamano a di pay unay nataengan nga agduyos nga agabel iti laksid a lalaki daytoy.

Iti biang ti gobierno probinsial, imparuar ni Gob. Deogracias Victor “DV” Savellano ti P500,000 a naipaay iti Ilocos Sur Association of Abel Weavers tapno daytoy ti usarenda nga agangkat iti sag-ot (bulk buying) a mausar iti panagabel. Babaen itoy a wagas makalaka dagiti umaabel iti panaggatangda. Maysa pay ketdi ti abel Iluko kadagiti paborito ti gobernador nga itandudo. Tinawen nga esponsoran ti gobierno probinsial ti “Tawid ken Partuat”, maysa a lawas a trade fair a maang-angay iti SM Megamall. Ditoy a mailako dagiti produkto ti probinsia a pakairamanan ti abel. Maysa kadagiti tampok nga atraksion ditoy ti abel Iluko fashion show a no sadino mismo a dagiti opisiales ti probinsia a pakairamanan da Gob. Savellano, Deputy National Security Adviser Luis “Chavit” Singson, Deputy House Speaker Eric Singson, Cong. Ronald Singson, Cong. Vincent “Bingbong” Crisologo, Health and Wellness icon Cory Quirino, mamayor ken dadduma pay nga opisial malaksid kadagiti modelo manipud iti Kamanilaan a nangirampa kadagiti agduduma ti diseniona nga abel.

Pudno, ar-aramiden dagiti opisial ti kabaelanda tapno agtultuloy ti abel iluko. Mamati dagitoy a saan a matmatay daytoy nga industria no di ket nailibay laeng a masapul a kalbiten tapno umabante. Abante Abel Iluko!#