No adda naawatmo nga E-mail a mangibagbaga a nangabakka iti lottery wenno paripa a dika met gimmatang iti tiket, awan mintisna, maysa daytoy a panangallilaw.
Kas iti E-mail a naawatko a nangabakak iti lottery a nakadakamatan ti Microsoft Corporation a kas esponsor, maysa daytoy nga scam. Maysa a klase iti maaw-awagan nga advanced fee fraud.
Iti umuna a panagkita, lehitimo ken awan ti dakes a panggep ti surat no di mangidanon iti napintas a damag. Ngem kuidaw, adda nairaip a pammalbalaibo ket no agdardarasudoska a sumungbat, amangan no daytoy ti pakairaremam.
Umuna, nakawaragawag nga inesponsoran ti Microsoft Corporation, maysa a maresrespeto ken maibilang a maysa kadagiti kabaknangan a kompania iti lubong nga agparpartuat iti hardware ken soft-ware ti computer. Ti akinkukua, ni Bill Gates, ti kabaknangan a tao iti napalpalabas a tawen.
Maikadua, nakalanad ti adres ti departamento a nangisayangkat iti lottery. Maysa a maraem a distrito iti United Kingdom.
Maikatlo, adda a nakamaldit iti uluanan ti surat ti Royal Coat of Arms ti United Kingdom.
Maikapat, addaan iti logo.
Maikalima, nairagpin iti surat ti ladawan dagiti nagab-abaken iti napalabas a raffle bayat ti panangawatda iti premioda.
Maikanem, adda ladawan ti coordinator ti lottery iti mismo a babaen ti surat.
Ngem kas nadakamatmin, aramaten dagiti manangallilaw ti nagan dagiti nalatak a kompania, lehitimo nga organisasion ken dadduma pay a tattao ken agtuturay tapno mapagparangda a lehitimo ken legal ti lottery uray no awan ti pannakainbolbar dagitoy iti maikaniwas nga aramidda.
Tapno malapdan ti pannakaallilaw dagiti tattao, imbatad ti Microsoft babaen ti websitena a saan nga ages-espon-sor iti lottery ken awan a naipasdek a Microsoft Corporation Word Lottery.
Kasta met a palso ti nailanad nga adres daytoy a 61-70 Southampton Row. Nupay adda sumagmamano nga opisina iti nasao a kalsada, awan kadagitoy ti opisina nga agisaysayangkat iti lottery.
Kinuna ti maysa a nakaawat iti umasping nga E-mail a naimaldit ti Royal Coat of Arms ti United Kingdom iti ngatuen ti surat nupay awan ti pakainaiganna iti lottery tapno agparang nga impresibo daytoy.
Malaksid dayta, saan a Takiyyah A’ishah ti pudno a nagan ti nakaladawan a co-coordinator no di Nadia Bakhurji, maysa nga arkitekto iti Saudi Arabia. Iti sabali nga E-mail a naipatpatulod kadagiti sumagmamano a biktima, Mrs. Basheera ti nailanad a nagan ti coordinator.
Mainaig kadagiti nailanad a sabali pay a nangabak iti lottery, agpayso a nangabakda ngem iti sabali a lottery ken naisayangkatda iti sabali a pagilian.
Sabali pay a manglukais iti kinarakaran daytoy a panangallilaw ti linaon ti surat: saan a gapuanan daytoy ti maysa a matalek ken propesional a personnel. Dakkel nga insulto a nagtaud iti maibilang a kadakkelan a kompania iti lubong ti surat a kayariganna agsisinggalut a lupasi ken bamban ti linaonna.
Mainayon ditoy a naipatulod ti surat manipud iti free email account ti Yahoo. Madakamat ditoy a kakumpetensia ti Microsoft ti Yahool. Nakadidillaw ngarud nga aramatenna ti maysa a nainget a kakumpetensiana iti pannakaiwaragawag iti maysa a gannuatna.
Ngem kas nadakamatmin, rinibu dagiti kakastoy nga surat a maipatpatulod kadagiti adda E-mailna iti internet. Dakkel a pirak ti malekleksab dagiti manangallilaw kadagiti mabiktimada a posible pay a pakadadaelan saan laeng ti naganda no di pay ti masakbayan ti pamiliada.
(Maigibusto)
