SALAYSAY: Agannad: baka sika ti sumaruno a biktimaen dagiti manangallilaw (Maikatlo a paset)

Panangallilaw iti internet

Agraira ita dagiti panangallilaw iti internet. Makaguyugoy dagiti pangawis dagiti manangallilaw. Saan laengen a ribu a kuarta ti pangbalballaiboda kadagiti biktimada no di minilion a doliar wenno pounds. Wen, kaka, ulitentayo: minilion a doliar wenno pounds!

Nadumaduma ti pangawagda iti daytoy a panangallilaw: spam, scam, confidence trick wenno con. Adu dagiti mabiktima gapu ta naibinggas iti tao ti kinagamrudna ken iti pananggammatna kadagiti nadaras a panguartaan uray iti mapagduaduaan a wagas wenno maikaniwas iti linteg ti pannakagun-odna.

Iti itatapog laengen daytoy a tawen, agsasaruno ti maaw-awatmi iti e-mailmi a surat manipud kadagiti dimi am-ammo a tattao a naggapu iti lugar a dimi ammo no sadino ti pakasarakanda iti mapa ti lubong.

Kas iti maysa a Dr. Alhaji Isufu a nangiyam-ammo iti bagina a  director in-charge ti auditing department ti INTERNATIONAL BANK OF Africa (IBA), Burkina Faso, Africa, West Coast Branch.

Iti e-mail ni Isufu, impalgakna a maysa nga agnagan iti Morris Thompson, Amerikano a gold consultant/contractor iti Burkina Faso West African Solid Gold Corporation, ti nangideposito (fixed deposit) iti US$29,000,000.00 para iti makatawen iti bankoda.

Iti panag-mature ti deposito, pinatulodanda (kano) ni Thompson iti surat ngem awan ti sungbatna. Naduktalanda a natay ni Thompson iti aksidente ti eroplano ngem awan ti kabagianna a mang-claim iti depositona iti banko. Insingasingna a daytoy nagsurat ti agtakder a claimant iti nasao a deposito.

Manipud met iti opisina ti maysa a Hama Amadou, chief auditor incharge ti African Development Bank (ADB), Ouagadougou Burkina Faso, West Africa ti naggapuan ti sabali pay nga e-mail a naiturong iti nagsurat.

Iti daytoy a gundaway, $19,300,000.00 ti napanawan ti maysa a depositor iti nasao a banko a nadesgrasia iti plane crash ket alaen ti gobierno no awan ti claimant iti las-ud ti lima a tawen. Daytoy met nanumo a biang ti kayatna nga agparang a claimant.

Iti sabali nga e-mail manipud ken ni Mr. Malaki Ahmed, director, auditing and accounting section, Bank of Africa (BOA), Ouagadougou Burkina-Faso, West Africa, nasukalanna ti maysa a deposito a $7,200,000.00 iti account ti maysa a ganggannaet a customer a natay idi Septiembre 11, 2001 idi inatake dagiti terorista ti World Trade Center nga awan ti next of kin ti nagdeposito.

Iti sabali a bangir, agpatpatulong ni Mr. Ahmed Hassan, foreign remittance manager, Bank of Africa (BOA), Ouagadougou Burkina Faso  para iti pannakaiyalis ti $22.5 milion a nakadeposito iti nasao a banko.

Nakaawatkami pay iti e-mail manipud iti maysa a Mr. Colins Morgan, auditing and accountant manager ti Bank of Africa (BOA), Ouagadougou, Republic of Burkina Faso.

Nakadiskobre kano ni Morgan iti  $10,500,000.00 a deposito ti maysa a natay iti plane crash.

Sabali pay nga account/audit manager ti Banque De Habitat Au Burkina Faso (BHBF), Ouagadougou Burkina Faso, ni Aminu Suleman,  ti nakaduktal met iti $9,500.000.00 a deposito a napanawan ti maysa a tao a natay idi naikras ti eroplano a naglugananna.

Iti met email ni Saldik Akbar ti Ouagoudougou Burkina Faso, maysa a Dr. Ravindra F. Shah, Amerikano a doktor ken industrialista ti nakabati iti deposito nga agdagup iti S39,500,000.00 kalpasan a naikras ti eroplano a naglugananna iti itatabunona iti kasar a naangay iti Boston.

Manipud ken ni Dr. Nelson Kwame, auditing and accounting manager ti Groupe Bank of Africa, adda deposito a $25,000,000 iti banko a pagpapaayanna a nakasagana a maiyaon no kayat toy nagsurat ti agparang a next of kin ni Mr. Andreas Schranner manipud Munich, Germany a natay iti plane crash idi July 2000.

Opisial met laeng iti Bank of Africa, Ouagadougou Burkina-Faso, maysa nga agnagan iti James Komo ti nangipatulod iti e-mail a nangisingasinganna ti panagparang ti nagsurat a kas kabagian da Mr. Andras Schranner a karaman iti natay iti plane crash idi July 31, 2000 tapno maiyaon ti depositona a $15,500,000.00 sakbay a maited iti gobierno ta maungpoten ti innem a tawen a pawayway para iti pannakatunton ti nasao a kuarta.

Segun ken ni Martin Rodger, solicitor ti Falcon Chambers, London, UK ken personal nga abogado ni Mr. Christian Eich, presidente/CEO ti Tranfield Worley Company,  malaksid iti 1,700,000 pounds sterling a nakadeposito iti maysa a banko iti London, United Kingdom adda pay stocks nga agpateg iti 3.9 milion iti nagan ni Eich  a napanawanna idi  natay agraman pamiliana iti pannakaikras ti Air France idi Hulio 31, 2000 ket agur-uray daytoy a maiyaon iti kanito nga agparang ti kaasitgan a kabagianna.

Iti emailna, impalgak ni Dr. John Eze Okeafor, manager iti Unity Bank Plc Nigeria, nga adda “domiciliary account” manipud pay idi Mayo 2000 ni Mr. Mark G. Hopkins,  ganggannaet nga oil consultant/contractor iti pagilianna a Nigeria nga agbalor iti $15,000,000.00 ket agpeligro daytoy a maipan iti gobierno no awan ti mangtunton nga asideg a kabagianna.

Toy met la autor ti kursonadana nga agparang a kabagian ti nagawan.

(Adda tuloyna)