SALAYSAY: Agannad : baka sika ti sumaruno a biktimaen dagiti manangallilaw (Umuna a paset)

Agraira ita dagiti manangallilaw ket adu ti mabikbiktimada gapu iti kinalaingda a mamalballaibo ken mangsukit iti pagkapsutan dagiti biktimada: ti  panaggakupda iti pirak iti apagbiit a tiempo ken iti nadaras a wagas.

Saan ngarud a nakakaskasdaaw nga adda dagiti madamdamagtayo a kakailiantayo a nakapukaw iti nagrigrigatanda a kuarta iti mano a tawen gapu laeng iti awis ti nadaras a yaadu ti kuartada, kas pammatalged dagitoy natagapulotan ti dilada a manangallilaw.

Budol-budol ken Salisi Gang

Sumagmamano nga am-ammomi a nagretiro a mamaestra ti nagbalin a biktima ti budol-budol gang wenno salisi gang. Maymaysa ti nakaawisanda a nagtalek kadagitoy a tattao: ti pammati ken panagtalekda a madoble ti kuartada kas buladas dagiti nangallilaw kadakuada.

Agkakaasping ti kapadasan dagiti nabiktima a mamaestra. Kagapgapuda iti banko a nangiruar iti kuarta ket iti asideg ti banko, dua wenno tallo a babbai wenno lallaki ti umasideg kadakuada ket gayyemenda ti biktima. Maalada ti panagtalek ti biktimaenda agsipud ta ti panagkawes ken panagsaritada, kasla disente dagitoy, nangato ti adalda, ken adda mabalbalinda iti biag. Ngem iti laksid ti biktima, dagitoy ti kangrunaan nga armasda a mangallukoy kadagiti biktimaenda.

Gapu iti kinapasigda, dagus a maalada ti panagtalek ti biktima. Bayat ti panagtutungtongda, madakamat ti grupo nga agbirbirokda iti gatangenda wenno adda negosio a kayatda nga ipasdek ket pamrayanda ti agsaludsod iti biktima no adda am-ammona a makatulong kadakuada. Siempre, malaksid iti sam-it ti panagsasaoda, ipakilapda pay iti biktima ti maysa a bay-on wenno maletin a naglaon iti kuarta a kunada a puonanda. Maallukoy metten ti biktima a mangited iti kuartana agraman alahasna tapno makisugpon iti negosio ti grupo ket kas panagtalek (kano) dagitoy iti biktima, ibatida ti bay-on wenno maletin ta subliendanto apaman a malpasda ti sabali pay a napateg a gagarada iti siudad wenno ili wenno mabirokanda ti sapsapulenda a kanegosio.

Dita a mabatinton ti biktima nga aggamusay iti subsobna ken tumapok a maminpinsan ti arapaapna a makaleksab iti kuarta iti apagbiit. Ad-addanton ti leddaangna no bukitkitenna ti bay-on wenno maletin ket maduktalanna a nagetteng laeng a pappapel dagiti “sangabungkos a kuarta” nga impakita dagiti nangallilaw kenkuana.

Panangallilaw iti text messages

Uray iti text messages, adu dagiti nabiktima iti panangallilaw.

Kastoy ti modus operandi dagiti manglokloko: patulodandaka iti text  message nga agkunkuna a nangabakka iti paripa wenno loteria idinto nga awan met ti malagipmo a nakipartisiparam.

Kadagiti dadduma, dagus a mamatida iti kastoy ket kontakenda ti tao wenno ti numero a nailanad iti text message a tawaganda tapno ammuenda dagiti aramidenda para iti pannakakolektada iti premio wenno inabakda.

Ibaganto ti contact a nakasaganan ti premio a maipatulod ket saludsodenna no ania a nagan ken bank account number ti pangipatulodanna iti premio, sananto iyunay-unay a kasapulan a mangipatulod ti biktima iti kuarta agsipud ta adda buis ti premio sakbay a maalana, kasta met iti mabusbos iti pannakaiyalis ti kuarta iti bank account ti nangabak ken no ania ditan a kasapulan para iti nadaras a pannakaited ti premio.

Kadagiti dadduma, apaman a maammuanda nga adda kuarta nga ipatulodda, saandan nga agtuloy.  Ngem adu latta dagiti mamati ket dagusenda nga ipatulod dagiti imbaga ti contact person a requirements. Agasem met ti ginasut a ribu wenno milion nga agur-uray a kuartada idinto nga awan pay dua ribu a magastoda!  Ngem ditan a mangrugi ti sakit ti uloda.

Kalpasan ti makalawas wenno makabulan a dina met la mapasangpeten ti inabakna, tumawag la ketdi ti biktima iti numero ti contact person ngem awanen ti sumungbat. 

Saan laengen a naminlima a nakaawat toy nagsurat iti kastoy a panangallilaw babaen ti text messages.

Dagiti sumaganad a dua a text messages ti kaudian a naawatna:

D’Auditor’s of Phil. Charity Foundation nform u dat ur celpon no. Won Php 950,000. 2nd prize Winner draw last 06/07/07 call Me Now I’m Atty. Harold N. Lee, per DTI Permit No 6290 Series of 2007 +639053626366

D’ Auditors of the PGMA Charity Foundation inform u dat ur Cp no # Won PHp 950,000 last 07/24/07 Pls call me now I’m Atty. Ricardo G. Reyes Jr. +639278497098

No amirisentayo dagiti dua a text messages, makita ti dakkel a pagkaaspinganda: agpadada a manipud iti auditor ti maysa a foundation, agpada ti premio a kuarta, ken maysa nga abogado ti contact person.  Patalgedan dagitoy ti suspetsa a maymaysa a tao (wenno sindikato) ti naggapuanna uray agsabali ti numero ti selpon a nagpaitulod.

Kaadduanna a maaramat laeng ti sim card para iti dayta a transaksion ket kalpasan a naalan ti contact ti kuarta, ipalladawna daytoyen, mangala manen iti sabali a sim card nga aramatenna a pangkontak iti sumaruno a ballaibuenna.

 (Adda tuloyna)