Footer

SALAYSAY: Ania ti isagutmo iti Aldaw dagiti Puso, Mahal?

Madanonan manen ti Pebrero 14, aldaw a naisangsangayan kadagiti addaan iti kaayan-ayat wenno kaliwanliwa. Aldaw a panangited iti napateg a sagut ken ni ay-ayaten.

Ania ti isagutmo ken ni ay-ayatem?

Nagadu dita.  Suroten ti kaaduan. In na in. Sagutan ni ‘love’ iti nalabaga a balloon a sinanpuso a naikabil iti ababa nga stick. Makaay-ayo daytoy ta addaan pay iti nalabaga a laso. Adu ti kastoy a lako iti bangketa ken nakaad-adu ti gumatang. Nalaklaka nga adayo daytoy ngem ti rosas ken tsokolate.

Uray dagiti awanan iti kaayan-ayat, agbirbirok, wenno saan pay laeng a nakasibbol iti nasam-it a ‘wen’, gumatangda met iti sagutda iti daytoy nga aldaw tapno maipakita nga adda isagutanda. Kadagiti dadduma, tapno makaliklikda  iti makaipas-rikna a surdo gapu iti panagmaymaysada kadaytoy nga aldaw.

Mabalin met a sagutam ni ‘love’ iti libre nga e-card with matching love song tapno inton buybuyaenna ti graphics ken dengdenggenna ti ayug ni ayat, maitayok met ti riknana iti kaulpan ket lalo pay nga innaka ipateg. Adu itan dagiti napipintas a graphics dagiti e-cards. Uray man duapulo ti isagutmo ta libre met. No awan ti kabukbukodam a kompiuter,  mapanka iti computer shop.

Iti agdama a panawen, kadagiti nagduduma a social networking site ken virtual community a kas iti Facebook, Twitter, ken dadduma pay dagiti venue a kangrunaan a pangiyebkasan ti kumarayo a rikna ken ni ‘love’. Manmanon dagiti agtutubo ken young adults nga awan accountsna iti internet. Kadagiti met agun-unnoy pay laeng, mabalin latta uray kasano kaatiddog ti mensahe ni ayat nga ipostena iti internet. Kadagiti agsapsapul wenno agbambanniit, mabalinda nga iraman a ka-networking asinoman a magustuanda. At least, adda kabinnulatsingda itoy nga aldaw.

Wenno saan, ibagam iti patpatgem wenno magustuam a bisitaenna ti accountsna iti youtube wenno iti myspace ket presto, adda sadiayen ti paboritoyo a kansion ken adda payen dedikasionna iti comments. No agkompiuter, daytan ti patokarenna kasta met kenka. Agsinnukatkayonto metten kadagiti sweet messages ket kasla nag-date-kayon a dua iti “Lover’s Park” iti virtual community.

Wenno saan, kablaawam ni ‘love’ babaen ti text message wenno tawagam iti selpon ket kasaritam a mismon. Uray no agpatpatnagkayon nga aggin-innarasaas uray ta adu met dagiti promo kadagitoy a tiempo. Iti “unlimited text”  uray kinse pesos laeng, agpatpatnagen ti panagsinnungbatyo iti text messages.

Idi un-unana a panawen,  tallo a nalabaga a rosas ti sagut ni manong baro ken ni manang balasang. Kadagiti dadduma, malaksid ti tallo a nalabaga a rosas, adda pay matching chocolates wenno sweet candies.  Ngem kadagitoy nga aldaw, saanen nga uso dayta  three red roses. Uso ita kadagiti flower shops ti maysa a nakalablabbaga a rosas a napalawlawan iti rumimatrimat a babatting a sabsabong ti baby’s breath. Aw-awaganda daytoy a klase ti flower arrangement iti “signature rose.” Adda pay naigalut a tarheta a pangisuratan iti mensahe-ni-ayat.

Adtoy ngarud dagiti sumagmamano a ballakad iti panagpili iti isagut a sabong ken ay-ayaten:

1) Ti maris ti sagut. Kangrunaan iti amin ti marisna. No daydiay ngamin nakusnaw wenno nagkupas ti marisna, amangan  no ipagarup ni love a nagkupasen ti panagayatmo. Namaymayat met laeng a buyaen ti narangrang ngem ti nalusiaw. Iparang ti narangrang ti napigsa, nabileg ken natan-ok a panagayat.

2) Estilo ken disenio. Kasapulan ti estilo ken disenio iti isagutmo. No estilo ken disenio, kayatna a sawen, sika dayta. Maysa a simbolo. Bungonem iti plastik, karton, botelia, lupot wenno ania? With matching card kadi? Adda pay kaduana a singsing? Wenno sabong lattan a tinukkolmo a dimo pay inugasan ken inikkat dagiti siitna ken dagiti kimpet a pitak wenno kuton? Kasapulan met ti estilo ken disenio iti isagut ta sika a mismo ti kaipapanan ti sagut.

3) Tema. Adda met tema  ti itedmo a sagut. Masapul a saan a wardiwardi ti itedmo. Ta ti tema ti mangdegdeg iti naidumduma a ragsak iti umawat iti sagut. Maysa a nabileg a banag nga ad-adda a mangparagsak iti ay-ayaten nga umawat iti sagut.

Ania koma dagiti tema? No ania ti pagduyosanna, isu ti ikabilmo. Kas dagiti magustuanna, ti paboritona nga sports, ti theme songyo a dua, ti paboritoyo a kolor wenno motif.

No magustuan ni love ti tema, tumukno sadi langit ti panangiyebkasna met kenka ti panagyamanna ken “panangikuddotna” iti nalaus a panagayatna. Sigurado, ikarina pay a siksika laeng ti biagna, ita ken iti agnanayon.

4) Kinapateg. Saan a makabael amin a gumatang iti nangingina a bouquet wenno flower arrangement, lalo ket 500% ti ngumatuan ti presio ti sabong iti Valentine’s Day. Uray no nalaka ti gatangem no napintas daytoy, uray maymaysa no isu, mabalin latta basta narangrang, addaan iti tema, estilo ken disenio.

Tunggal Valentine’ Day, kasapulan a sagutam ni love.  Ania ti panggepmo ita nga aldaw nga ited kenkuana?

Laglagipem a saan a ti kinangina ti sagutmo kenkuana ti nasken;  kangrunaan iti amin, nagtaud dita kaunggan ti pusom dayta a sagutmo. Saan a ti nangina a material a sagut ti importante no di ti kinapudnom nga agayat.#