SALAYSAY: Ballaag iti Nasinged a Langenlangen (Maudi a paset)

Kas iti napasamak iti anak ti maysa a gayyemmi. Awagantayo laengen iti Nato.

Kakaisuna nga anak ni Nato. Nangato nga opisial iti militar ti amana. Disiplinarian. Adu dagiti maiparit nga aramidenna, iti man ruar wenno uneg ti pagtaenganda. Adda oras a kaaddana iti ruar. No alas saisen, masapul nga addan iti uneg ti balay. Madusa no saan nga agtungpal babaen ti saanna a panangrabii wenno maikkatan ti inaldaw nga alawansna.

Maiparit ti makibarkada, ti sumimsim iti arak, agsigarilio.

Ngem ti saan nga ammo ti ama, adda ibubusor ti anakna kadagitoy nga ipakpakatna a pangdisiplina kenkuana.

Kalpasan ti pangrabii, kunam no mapanen maturog ni Nato. Ngem aglibas babaen ti ikakalumbitinna iti tali a bumaba. Sarakenna dagiti barkadana ket mapanda aggiinom iti videoke bar wenno beerhouse. Ditoy ti pangib-ibbusanna iti alawansna.

Naulit-ulit daytoy. Maysa a rabii, adda nakaengkuentro ti grupoda a sabali a grupo. Nagrarambolda. Idi makadanon dagiti polis, tallo ti napasag. Maysa kadakuada ni Nato.

Saan a patien ti amana nga adda iti kalkalsada ni Nato iti rabii. Iti panagkitana, dakes nga anak ni Nato. Ti dina ammo, isu ti nangiduron iti anakna a makibarkada. Iti barkada ti nakasapulan ni Nato iti pammateg a dina narikna iti amana. Ti makadakes, dakes a barkada ti nakaisawsawanna nga ad-adda laeng a nakailumlomanna iti pannakaisagmak.

Adu dagiti annak a nagtungpal iti dakes a bisio ken makailuod a droga gapu iti risiris a naparnuay iti uneg ti pagtaenganda gapu iti panangipapilit dagiti nagannak dagiti pagrukodan a saanen a rumbeng nga ipakatda kadagiti annakda a dimmakkel iti aglawlaw a maisupadi unay kadakuada idi isuda ti ubbing.

Adu dagiti teenagers wenno menor de edad ti nagtalaw iti pagtaenganda wenno nagbalin a sedsed ti kalsada iti denna dagiti gagayyemda gapu ta opresibo ken awan mariknada a pammateg ken ayat iti uneg ti pagtaenganda. Ti rigat kadagiti nagannak, ipapilitda ti kayatda iti pammatida a pagsayaatan dagiti annakda, ngem ti kinapudnona, ad-adda laeng a mangipaay iti risiris wenno ibubusor kadagiti annakda.

Masapul nga annugoten dagiti nagannak a dumteng ti panawen a rugian metten dagiti annakda a bangonen ti biag a kayatda, a gaudan ti bukodda a bilog a mangballasiw iti taaw nga agturong iti bukodda a kaikarian. Kasapulan nga annugoten dagiti nagannak, nupay makasugat daytoy, a saanen a daydi gaddilan pay nga ubing ni Mary nga anakda no di maysan a naan-anay a balasang, wenno saanen a daydi agbutbuteg pay nga ubing ni Joseph, no di maysan a baro, addaanen dagitoy dua iti kabukbukodanda a panunot, nataengandan nga agdesision aglalo kadagiti banag a pakaseknan iti direksion a turongenda iti biag.

Dakkel a biddut iti biang dagiti nagannak ti panangibilangda pay laeng kadagiti annakda a saan pay a naan-anay a “natangkenan” ken inosenteda pay a sumango kadagiti “narusanger a realidad” ti biag. Kadakuada, kasapulan pay laeng dagiti annakda ti seguridad ken salaknibda tapno maiyadayoda kadagiti riribuk, pannakapaay ken pannaupay. Ngem saanda a maaklon nga iti kinasobra ti panangprotektarda kadagiti annakda, ad-adda ketdi a mangipaayda iti pannakadadael wenno pannakadangir kadagitoy.

Ti koma panunoten dagiti nagannak, saanda a kanayon nga adda lattan iti likudan dagiti annakda, madadaan a mangted iti salaknib kadakuada iti sanguanan ti peggad wenno pannakairubo. Kasanon no awandanton iti daytoy a biag? Kasanon no agmaymaysanton ti anakda iti kabakiran ti biag nga awan ti namnamaennan a dadakkelna a mangispal kenkuana kadagiti narungsot nga “ayup”? Gapu iti sobra a pannalaknibda iti annakda, agbalinto laeng daytoy a nalaka a mabutbuteng ken maparukma no maipasungalngal uray iti saan unay a nadagsen a problema wenno parikut. Agsipud ta nairuamda a masalsalakniban, aggudengguddengdanto a mangiwayat kadagiti desision wenno pamuspusan tapno marisut ti problemada. Saandanto a makatakder iti bukodda a dapan ken gauden ti bukodda a bilog tapno surotenda ti bukodda a biag.

No laeng koma makita dagiti nagannak dagiti annakda a kas uniko nga indibidual nga addaan iti bukod a kasapulan, interes, amak, arapaap ken dadduma pay, bumassit dagiti risiris iti relasion ti nagannak ken ti anak.

Saan a kasta kalaka ti panagpatanor iti anak. No nagbiddut ti nagannak iti panangpatanorna iti anak, dagitinto ubbing ti agsagrap iti dayta a biddut a posible a pakadadaelan ti biagna.#