SALAYSAY: Baro a Tawen: tiempo a mapabaro ti kinaasino

Mangabaruanan. Dayta ti kangrunaan a kaipapanan ti panangpasangbay ken panangsarabo a naannayas ti kabarbaro a tawen. Mangabaruanan a kas iti kinaadda ti napabaro a gannuat a sumango a sipipinget iti dangadang ti biag. Ta saan kadi nga amin a tignay ket buklen ti pannakidangadang? Nga amin nga addang ket agturong iti awanan kaaspingna a panangdaliasat kadaytoy a lubong? Isu a tunggal gannuat ket kasapulan ti napabaro a namnama. Ket itoy nga idadateng ti baro a tawen, nasken a mapabaro ti kinaasino, saan laeng nga iti isip ken panggep no di ket karaman ti ibubunga ti puso iti nagpaiduma a kaipapanan. Daytoy koma ti isaisip a tarigagayan ti amin.

No intay lagipen ti napalabas wenno naglabas a tawen, ken usigen a nalaing ti nagdalanantayo, maamiristayo a saan laeng a ti tawen ti nasken nga agpabaro wenno mangabaruanan no di pay uray datayo a mismo. Usigentayo koma a nalaing dagiti aramid, tignay ken panggeptayo ket pagdadasigentayo ti kinapategda. Amirisentayo a nalaing ti kinapateg ti kinaaniada, dagiti nasken nga idianan weno isardengtayo. Amirisentayo a nalaing dagiti nagkamtudan ken nagliwayantayo, karaman dagiti nagbiddutantayo. Amirisentayo dagiti awan kaes-eskanna a banag a timmaud, pinataud wenno pinarnuaytayo para iti awan kaitutopanna nga addang. Amirisentayo dagiti intungtungkua wenno intantantayo nga aramiden nga idi agangay ket nabaybay-andan wenno saantayon nga inkaskaso. Ket manipud kadagitoy, maarisittayo dagiti kapkapnekantayo a piduten para iti sabali manen a bulig ti namnama ken dur-as. Ta saan kadi a ti mangabaruanan ket pannakaipasngay ti baro a namnama?

Ngarud, pasantakentayo ti baro a namnama itoy a kabarbaro a tawen. Idiantayo koma dagiti pampanunot a mangipaay iti tubeng iti panagdur-astayo. Idiantayo dagiti aramid a maikanniwas iti kinatalinaay. Idiantayo dagiti panggep a mangiduron iti asinoman a kumammet iti saan a nasayaat nga addang.

Panunotentayo ti amin. Panunotentayo ti masakbayan. Napateg la unay ti masakbayan, ta isu dayta ti rason no apay nga addatayo nga agdaldaliasat ken makidangdangadang iti biag. Pasantakentayo ti baro a namnama a mangiburay kadatayo iti pigsa ken saldet. Ti karirikna a saan a panagbuteng iti masungadan a dugudog, saan a panagbuteng iti sumangbay a sipnget no di ket ti panagtaeng koma kadatayo ti kinasaldet ken kinapinget ken kinaandur iti panagdaliasattayo iti biag. Dayta ti tartarigagayan ti amin.

Annugotentayo man wenno saan, kalpasan ti amin, dagiti amin a nagtaud iti daytoy a lubong ket mabati met laeng iti daytoy a lubong. Awan ti maitugot iti ‘papanan’ kalpasan iti ungto wenno ngudo ti dalan. No aniaka a simmangbay isu met laeng ti kinaaniam a pumanaw. Ngem agtalinaed ti raniag ti intukitmo a nagan. Dayta ti pakalaglagipan dagiti pinanawam ken wanawanan dagiti mayat nga agurnong kadagiti intukitmo a bukel ti kinaasino. Iti daytoy a panangpalubostayo iti nalakayanen a tawen, palubosantayo met ti daan a kinaasino. Ket iti panangpasangbay iti ubing a tawen, pasangbayentayo met ti kabarbaro a talged ti kaimudingan. Pabaruentayo manen ti rikna. Pabaruentayo manen ti kinatao ken kinaasino iti imatang ti sabali, lalona unay iti imatang ti Mannakabalin.

Ngarud, awan sabali pay nga inkam tarigagayan no di ragsak ken dur-as koma ti agari kadagiti amin a puspuso iti panangpasangbay ti baro a tawen. Iyebkasmi ngarud iti tunggal maysa ti nabara unay ken nabunga a baro a tawenyo amin! #