Footer

Baya-o: Balitok a Tugot ti Puli (Maikadua iti tallo a paset)

Dagiti ingpen ditoy ket nakakonekta iti pimmusay a kas sandi ti  lagip, ayat ken iliw iti agnanayonen a kinaawanna iti denna. Itoy a punto, ti relasion ti ‘immunan’ ken dagiti ‘nabati’ ket ad-adda pay nga  umamnut ken tumibker. Saan laeng nga agtaud iti ngiwat ti ayat no di pay naigamer iti dara nga agtaltalaytay kadagiti laslasag.

Adda nakaisangratan daytoy nga oral arts. Saan amin a nakamassayag ket maipaayan iti baya-o.

“The baya-o on the other hand, is done during vigils. It is however done if the dead is either an old man or old woman with children.” [4]

Saan amin a natay ket maipaayan iti baya-o. Saan a para kadagiti ubbing, agtutubo ken agkabannuag. Para laeng kadagiti nataengan. Baketen daydi Inang Carda iti edadna nga 85.

Ti bayao ket pakaadawan kadagiti tagipatgen (virtues) nga insursuro ti nakamassayag – pammagbaga, pammilin, pannursuro – dagiti linaon iti muging ken iti puso. Maysa a natakneng a wagas iti edukasion ti panangiyallatiw manen dagitoy a  tagipatgen (babaen ti baya-o) kadagiti dumdumngeg lalo kadagiti ub-ubbing ken agtutubo. Lumasag a wagas no di man mailaok a linabag iti dara nga agtalaytay kadagiti ur-urat.   “The baya-o extolled the virtues of the dead and sought his blessings for the community and for those who shared resources and efforts to usher the passing of the dead back to the world of their departed ancestors.” [5]

Sumagmamano laeng nga aldaw ti massayag. Saan nga agbayag. “The wake could last from three days to a week. Unnecessary noises and playing of gongs are prohibited. The only sound you will hear is the baya-o, a traditional chant performed by the elders to scold or praise the dead. [6]

Kas iti dung-aw ni Ilokano wenno ti badiw ni Ibaloi, adda latta laok ti baya-o a pammilin iti nakamassayag: (1) agtultuloy a pannarabay; (2) panangibabaet iti Namarsua; (3) ipaayna koma ti talna kadagiti pinanawanna

“The chant varies from humming, murmuring, wailing, and ends with a shout and a thud of a foot. The chant also served as a plea to the dead not to return to haunt the living, and help them instead to lead a prosperous life.” [7]

Kadagupan iti pananganalisar iti napagtitipon a kon-teksto dagiti naibaya-o iti massayag ni Inang Carda, adtoy dagiti nasirip a napagtitipon a linaon:

  1. Kararag
  2. Panaganinaw (mirror image)
  3. Ti kinapateg ti nakaparsuaan
  4. Ti tagipatgen ken kinapateg ti edukasion
  5. Pammagbaga
  6. Panangiyallawat ti kultura

Naiyebkas ti baya-o iti naratibo babaen kadagitoy wagas: naikansion, naidaniw, naisarita, anekdota, panamagdilig ken sarsarita.

Nupay kasta, inamin ni Domogan a narigat ti agbaya-o, ket kinunana: “Narigat-rigat piman ti agbaya-o …ti mang-rhyme…” Naglaok a Kankanaey ken Iluko wenno agbinnales ti imbaya-ona. Ket tapno di atiddog la unay, inestoriana dagiti dadduma a paset.

  1. Nakapokus iti panagyaman ken bendision. Panagyaman iti Mannakabalin kadagiti amin a naiburay ken naawat a parabur. Para kadagiti naulila ken pinanawan ti kiddaw a bendision. Ken para iti isasaklang ti pimmusay iti sakaanan ti Namarsua: “Ket agbiag koma iti biag awan patingganan ti palsua a namati ti isnan ken Sika… ti kangrunaan a kararagmi itattan… Amami a nainlalangitan, ta ragsak koma ken mailisida iti disglasia dagiti pinanawan…sika  koma Ama  nailangitan iti mangkitakitan kadaidan…ta kas koma ti nasayaat a sursuro nga insuro ti pimmusay kadaidan… ti maimulat’ kapanunot kadagiti appona ken pinanawan… ”

  2. Panaganinaw. Mirror image wenno reflection. Kastoy ti imbaya-o ni Domogan: “Daytoy anti, saan laeng a mismo a dagiti annakna ti dinungdungngona, saan laeng a ti pamiliana, no di pay ket dagiti sabsabali nga annak…isu a nasayaat a pagtuladan…nasayaat a pagsarmingan….isu a ti kararagtayo, ti Ama koma ti pakibiaganna iti agnanayon…”

Kalpasan itoy, inistoria ti raconteur a no saan a ti pammagbaga ti pimmusay, saan koma a nakapag-abogado (ken mayor ken representative ti Baguio iti kapamitlonan  daras). Anti ti pangawagna. Maestrana iti Grade four. Linagipna ti panawen nga inda panagiskuela. “Kaeskuelaak idi da Fe ken Othmar…” kinunana, dagiti annak ni Inang Carda ti kayatna a sawen. Manang, ti panangawagna ken ni Manang Rose. Inestoriana pay dagiti dadduma a mannursuro a nangadal kadakuada sadiay Angaki (Quirino, Ilocos Sur itan). “Adu ti ligligatna piman idi kadakami…ken isnan anusna…isu a tinungpatungpalmi dagiti pammagbagana ket 80% kadakami amin nga ada-anna iti titulado…”

Kadagidi a panawen, dakkel unayen dayta a ratio nga 80% iti laksid ti kasulinek ti lugar ti kabambantayan. Saan laeng a ti siled a pagadalan ti agkurang no di pay ti mannursuro. Ket ditoy, inestoria ni Domogan ti panaggiddan a panangisuro ti pimmusay iti Grade three ken Grade four. “Liniblibu ay isnan natulonganna…”

(Maigibusto)