Footer

SALAYSAY: Begnas Festival: Naipangruna ti Kultura dagiti Tribu iti Ilocos Sur (Maudi a paset)

Iti rabii, naaramid ti Min-iinnayo Is Nan Nainsigudan Ay Ayuwen wenno kompetision dagiti kadaanan a kankanta. Iti daytoy a programa, saan laeng a dagiti kankanta dagiti tribtribu, kas koma dagiti dayyeng, duayya ken salidummay ti nangngegan no di pay dagiti aweng manipud iti instrumento kas koma ti kalaleng wenno nose flute.

Iti daytoy met la a rabii, naangay ti talent portion dagiti sangapulo ket innem a kandidata ti Baggak Ti Daya a nakisalipan dagiti kalibnosan a babbalasang dagiti nadumaduma a tribu .

Maikadua nga aldaw

Naangay ti Cultural Ensemble Competition iti maikadua nga aldaw. Naipabuya dagiti tradisional a salsala ken kankanta dagiti ili a dominaran dagiti tribtribu a pakairamanan dagiti addaan iti tugot ti Kankanaey, Tingguian, Bago ken Itneg.

Reprep dagiti nagdadarison iti Candon tapno agbuya kadagiti sala ken kankanta ket uray dagiti bisita a naggapu iti Cultural Center of the Philippines, National Commission on Culture and the Arts, Department of Education ken dadduma pay nga ahensia ti turay, saanda a nailinged ti panagdayawda iti nabaknang a kultura a salsalimetmetan dagiti nadumaduma a tribu iti Ilocos Sur.

Nabara ti sipsipat dagiti tattao iti Sikep ti Bago Tribe nga impabuya ti Candon City, Epas ti Kankanaey nga imparang ti Cervantes, Kaon ti San Emilio, Ilocos Sur, Guyugoy ti Sigay, ti Lueb ti Tingguian ti Galimuyod, Sapit ti Gregorio del Pilar, Sabusab ti Alilem ken dadduma pay a kadaanan a sala.

Napnek dagiti tattao a nagbuya kadagiti nadumaduma a sala ti tadek, dagiti musika manipud kadagiti instrumento a naaramid iti kawayan, kayo, ken ti umal-allangogan a gangsa. Nabara pay ti panangawat dagiti agbuya kadagiti dance-drama a naipakatan iti choreography, kanta ken sala dagiti kannawidan ken ug-ugali dagiti tribtribu.

Uray nalabesen ti pangaldaw, diretso latta dagiti pabuya ken saan a nagkir-in dagiti tattao iti yanda a kasla saanda a narikna ti bisin.

Iti karabianna, napili ti Miss Baggak ti Daya 2008.

Naballaetan ti programa kadagiti kanta dagiti bisita nga artista. Nangipangeg met ni Congressman Eric Singson iti samiweng ti kabambantayan.

Risiris ti panagpili iti reyna. Nagparada dagiti kandidata a nagaruat iti tribal attire, swimsuit ken iti abel gown ket in-inut a nakerrasan ti sangapulo ket innem a kandidata iti tallo laengen a finalist.

Napili a Miss Baggak Ti Daya 2008 ni Cherry Ann Pineda, taga-Salcedo, Ilocos Sur, first runner-up ti kandidata ti Santa Cruz ken 2nd runner-up ti kandidata ti Gregorio del Pilar.

Maikatlo nga aldaw

Chorale competition ti naangay iti maikatlo nga aldaw. Partisipante ditoy dagiti makunkuna a non-IP dominated nga ili.

Nangegan manen dagiti kansion a salidummay, duayya ken dadduma pay a samiweng

Iti malemna ti pannakaiyawat koma dagiti premio dagiti nangabak iti nadumaduma a kompetision. Ngem kas immun-una a nadakamat, napigsa ti pammati nga adda dakkel a pakainaigan dagiti gangsa iti panagtudona iti tribal festival iti maysa a lugar. Nairanrana wenno saan, simmangbay ti bayakabak.

Nupay kasta, makuna a balligi ti umuna a Begnas Festival ti probinsia ti Ilocos Sur. Nangruna ta dakkel ti suporta nga inted da Gobernador Savellano ken House Deputy Speaker Eric Singson ken ti administrasion ni Candon City Mayor Allen Singson iti daytoy a programa.

Kinapudnona agingga ita, iti kaltaang ti rabii, kasla mangmangegko pay laeng dagiti dayyeng ti salidummay ken ti patit ti gangsa. Kasla makitkitak pay laeng dagiti naparagsit a garaw dagiti saka ken nalap-it a siket bayat ti panangdanggay dagiti kameng ti tribu iti tadek..

Maipasiguradok nga agbuyaakto manen agsipud ta inkari dagiti agtuturay iti probinsia a dakdakkelto a pagteng ti maikadua a Begnas Festival a maangay met la iti siudad ti Candon.#

SALAYSAY: Begnas Festival: Naipangruna ti Kultura dagiti Tribu iti Ilocos Sur (Maudi a paset)

Iti rabii, naaramid ti Min-iinnayo Is Nan Nainsigudan Ay Ayuwen wenno kompetision dagiti kadaanan a kankanta. Iti daytoy a programa, saan laeng a dagiti kankanta dagiti tribtribu, kas koma dagiti dayyeng, duayya ken salidummay ti nangngegan no di pay dagiti aweng manipud iti instrumento kas koma ti kalaleng wenno nose flute.
Continue Reading →