Footer

SALAYSAY: Begnas Festival: Naipangruna ti Kultura dagiti Tribu iti Ilocos Sur (Tuloyna)

Addaan iti tema nga “Agbiag Ti Kaugalian a Nainsigudan”, naisayangkat ti kaunaan a Begnas Festival ti probinsia ti Ilocos Sur idiay Candon South Central School babaen ti panagsangaili ti Candon City.

Apay a naangay ti Begnas Festival iti bulan ti Oktubre? Inlawlawag ni Bokal Robert Tudayan a ti parambak ket panagyaman iti adu nga apit ken bendision a nalak-am ti probinsia iti daytoy a tawen.  Ket kas nakaugalian nga ar-aramiden dagiti tribu, maisayangkat ti panagrambak babaen ti Begnas.  Maikadua, iti bulan ti Oktubre ti pannakarambak ti pannakapirma iti linteg a mangsaluad kadagiti indigenous people iti Filipinas, gapuna a rumbeng laeng a marambakan iti daytoy a bulan.  Malaksid iti dayta, daytoy metten ti gundaway tapno agsasarak ken agdedenna dagiti kakitkitongan a katribuan ti Ilocos Sur.

Programa iti umuna nga aldaw ken rabii

Iti umuna nga aldaw, kas nadakamaten, nagarbis, ngem saan a daytoy ti nangpaksiat kadagiti tattao.  Adda dagiti abong-abong a naaramid ket ditoy a naglinong dagiti umili.  Nairanta a naaramid dagitoy nga abong-abong a  paglinongan dagiti tattao iti aldaw a katingraraw ti init bayat ti panangimatangda kadagiti nadumaduma a pabuya.

Iti daytoy nga aldaw, naiplastaranen dagiti booth kadagiti produkto dagiti nakipartisipar nga ili.  Produkto a kangrunaan a partuat ken produksion ti ilida, kas koma ti sakupit iti Quirino, maguey products iti Cervantes, agricultural products iti Salcedo, Alilem, ken dadduma pay nga ili, labtang ti Candon City, tapey ti San Emilio ken Lidlidda ken dadduma pay.

Timmabuno iti daytoy a pasken da Deputy Speaker Eric Singson, Gobernador Deogracias Victor Savellano, Vice Governor Jerry Singson, dagiti bokal, mamayor, dagiti pannakabagi ti National Commission on Indigenous People (NCIP) ken dagiti kameng ti tribu iti amin a suli ti probinsia.

Babaen ti panangidaulo ni sigud a mayor Leon Lais, ken maysa a dadaulo ti tribu, naisayangkat ti  ritual ket naited kadagiti mamayor dagiti obaya wenno karne ti baboy a kas tanda ti pannakipasetda iti programa.  Inawat dagiti mamayor ti obaya bayat ti panagsalada iti tadek.  Uray da Congressman Eric Singson ken Gobernador Savellano ket naikkanda met iti obaya.

Kas paset ti ritual, maysa a baboy ti naparti ket  naamiris ti dalemna wenno pidis.  Segun kadagiti dadaulo ti tribu, no nasayaat ti langa ti dalem, napintas ken awan ti dakes a mapasamak bayat ti pannakaangay ti Begnas. 

Kalpasan ti pormal a panangideklara ni Gobernador Savellano  iti umuna a Begnas Ylocos, naaramid ti programa.

Nagbalin a naisangsangayan daytoy nga aldaw ta  impakita  ni  Congressman Singson ti talentona iti drums, kaduana dagiti kameng ti Candon City drummers.

Kalpasan iti ababa a programa, nagturong dagiti bisita iti entrance  kadagiti nadumaduma a booth ket  kinartibda ti ribbon para iti pormal a pannakalukatna.

Adu dagiti produkto a tagilako ngem nadaras a naibus.   Nagpakamakam  dagiti lokal nga opisial kadagiti kanayon a mailako a produktoda.

Kas panangipakitada iti panagmaymaysada, nagtitipon dagiti katribuan a nangan iti  Food Festival.

No tribu kunam, saan  a maaw-awan dagiti nakaugalian nga ay-ayam wenno sports.  Iti malem, naaramid ti makunkuna a Kin-iinayuan danan nabuwabuwa ay kaat di aw-awkey wenno salip iti naduma-duma nga indigenous games nga immatonan  ni Sammy Mendoza, tribal chieftain ti Barangay San Andres, Candon City.

Naray-aw a nagbuya dagiti tattao, taga-baba wenno taga-ngato man, iti ginnuyodan iti tali (tug of war), kinnalaban as kawayan (palo sebo), kadangkadang wenno lumba babaen ti panagaramat iti kawayan, sanggol (arm wrestling), panangpalbot as dagum ay minpipinnal-a wenno threading the needle relay, innagtuan as bangan ay innatunan wenno earthen pot relay, ken panagbayo iti irik (rice pounding).

        (Adda tuloyna)