SALAYSAY: Boksing: brutal nga sport (Maikatlo a paset)

No dagiti trainer ken promoter ti masurot ken uray dagiti minilion nga apisionado iti boksing, kasapulan ti panagsango da Manny Pacquiao ken ni Floyd Mayweather tapno maresolbaren a maminpinsan ti isyo no asino ti pudpudno a pound for pound king iti uneg ti ring.

Kuna ni Freddie Roach a saan a kumpleto ti rekord ni Pacquiao no saanda nga agsango ken ni Floyd Mayweather.

Kasta met ti karit ni Bob Arum ken ni Mayweather: panawenen a sanguenna ni Pacquiao tapno maammuanen ti pudpudno nga ari iti ring.

Daytoy met dagiti ikkis dagiti milion nga agraem kadagiti dua a boksingero. Kayatda a mabuya ti panagrinnapuk da Pacquiao ken Mayweather iti ring. Matirang nakatayo ang totoong hari!

Ngem saantayo a mababalaw ida. No agsango dagiti dua, daytoy ti fight of the century. Daytoyto ti agbalin a klasikal a panagrinnupak ti dua a pound for pound king iti sangalubongan.

Iti biang da Roach ken Bob Arum, kumalkalangiking dagiti pirak a sumrek iti bulsada. Kada Pacquiao ken Mayweather, posible met a daytoy a rupak ti pakaitanggayaan iti kadakkelan nga offer a maited kadakuada, saan laeng iti purse ken pay per view, no di pay agapit ti mangabak iti kangatuan a respeto ken pannakaikur-it ti naganna iti historia ti boksing.

Ala, mabalinmi a kunaen: daytoy koman ti maudi a pannakiboksing ni Manny Pacquiao. Kalpasan daytoy, maabak wenno mangabak, isakbitnan ti glabna ket ipamaysanan ti trabahona kas agilinlinteg.

No denggen ni Pacquiao dagiti miron wenno dagiti umar-arubayan kenkuana, masapul pay a makirinnapok iti ring agsipud ta kapigpigsaan ken kaparpartakanna. Kangrunaan a pangawisda kenkuana ti kalangiking ti awatenna a bayadna ken premiona iti ring.

Kasta met nga adda la ketdi dagiti boksingero a mangtagtagibassit iti kabaelan ni Pacquiao aglalo dagiti boksingero a mabisin la unay iti dayaw. Kayatda la ketdi ti umammal uray sangkailgat iti kinalatak ti Filipino a boksingero. Kayatda laeng ti makibinglay iti panagraem ti sangalubongan kenkuana. Kasta iti aniaman nga sports. Kasta iti aniaman a pagsasalipan. Adu dagiti agpanggep a mangagaw iti trono wenno korona iti kampeon.

Iti biangmi, panawenen nga agretiro iti boksing ni Pacquiao. Kadakami, awanen ti nasken pay a paneknekanna iti ring. Uray no agretiron ita, naikur-iten ni Pacquiao ti balitok a naganna iti libro ti boksing a dinto kabaelan a punasen ti panawen. Narigatton a mapataran (wenno saan payen) ti panangabak ti maysa a boksingero iti koronana iti walo a dibision. Adu dagiti nakagun-oden iti korona iti innem a dibision ngem awan pay ti nagballigi a nangsungkit iti pito ken walo a dibision no di laeng ni Pacquiao.

Daytoy koma ti ipaayan ni Pacquiao iti nauneg a panunot. Agpayso, kapigpigsaanna ita. Adda iti alimpatok. Ubing pay. Kabaelanna nga ibalat asinoman a boksingero a mangkarit iti koronana.

Ngem laglagipenna koma a saan nga agnanayon nga adda iti tuktok.

Adda pagsasaotayo nga asinoman nga umalimpatok, agpababa met laeng.

Urayen kadi pay ni Pacquiao nga adda dumap-aw iti pagtaktakderanna ita a tuktok tapno daytoy ti mangiduron kenkuana nga agsalog?

(Maigibusto)