Salaysay: Buong ti ulo dagiti Youth Gang iti Baguio (Umuna a Paset)

NO sibibiag pay koma ni Dr. Jose Rizal, posible nga uray la agsabat dagiti kidayna gapu iti makitana a mapaspasamak kadagiti agtutubo iti siudad. Adayo unayen ti nagbayanggudawan ti utek dagiti agtutubo. Nagbalinen a bangungot daydiay sirmata ti nailian a bannuar idi a “dagiti agtutubo ti namnama ti pagilian”. Bangungot ti gimong iti agdama a panawen. Maysa a mantsa ti linak ken kappia.

Gagangay laengen kadagiti youth gang ti dinnanogan, pinnatay, binnagsol, pinnaltogan, grinnanadaan no ageenkuentroda. Gagangay laengen kadakuada ti kinnamatan-rinnapok iti aldaw man ken rabii. Kaaduan kadagiti kameng dagiti youth gang dagiti out of school youth, estudiante ti high school ken kolehio. Lallaki ken babbai.  

Ta asino ngamin aya dagitoy a youth gang? Pinoy True Crips, Blood Down Posse, North Side Terrorist, Notorious Underground Crips, Sacramento Tag Crips, Rappers Delta Foundation, Real Pinoy Crips, West Side Terrorists, Sudden Death Gangsters, Mafia Crips, God Mob Carnalis, East Side Thugs, Ragstah, Peer Group Trouble, Souls, Trece Hudas, Selda Trece, Tropang Muslim ken True Brown Style.

Nagan laengen dagiti gangda ket umanayen a mamagsabat kadagiti kiday. Dagiti laengen panagkawkawesda, panagsasao, pannagna ken langa dagiti dadduma ket dimon maespeling ti pagturonganda iti masakbayan. 

Iti laengen umuna a lawas itoy a bulan, Pebrero, adtoy ti listaan dagiti pasamak a nakainbolbaran dagiti inarapaap ni Dr. Jose Rizal a namnama ti pagilian:

1) Natay ni Kenneth Jaramillo, 19, ti La Trinidad Benguet idi pinaltogan ti kameng ti kalabanna a youth gang iti tengnga ti rabii idi Pebrero 3 sadiay Engineer’s Hill (tallon a kameng ti youth gang ti natay ditoy a barangay).

2. Iti dayta met laeng a rabii ti Pebrero 3, magmagna da Arthur Aloot, 21, estudiante, ken dagiti kaduana iti Caranters Street idi malabsanda ti maysa a grupo dagiti youth gang, pagammuan, immalingawngaw ti nagsasaruno a putok, nakusbon ni Aloot a napaltogan iti likud, rupa ken tengngedna.

3) Idi parbangon ti Pebrero 2, maysa nga agtawen iti 15 nga ubing ti nasarakan dagiti polis nga awanan puot kalpasan a binugbog dagiti kameng ti maysa a youth gang a nakaistambay iti Nevada Square .

4) Tengnga ti rabii idi Pebrero 1, maysa nga agtawen iti 15 ken high school student a taga-QM Subdivision ti napan agpaliwa iti Nevada Square, ngem kadissaagna pay laeng iti taxi, pinurok ken binugbogen dagiti nakaistambay a kameng ti maysa a youth gang.

5) Tengnga ti aldaw ti Pebrero 8, maysa nga agtawen iti 17 nga agtutubo a kameng ti youth gang  a Pinoy True Crips ti kinemmeg dagiti polis gapu iti maatap a panangpatayna ken ni Rex Santos, 18, ken kameng ti North Side Terrorist Gang.

Idi 2006 ken 2007, adu a serie dagiti napasamak a pammapatay, pammagsol, rambol a nakairamanan dagiti youth gang. Mairamen ti pannakagranada ti maysa a computer shop a yan ti maysa a grupo ti youth gang a maipagarup nga aramid ti kalabanda met laeng a gang. Nasurok a sangapulo nga agtutubo a di pay simmagpat iti duapulo nga edad ti nasugatan ken  nakadadaelan ti sanikua.

Kas aksionna, nangipaulog ti lokal a gobierno iti “experimental curfew” para kadagiti agtutubo manipud iti alas 7 ti rabii agingga iti alas 5 ti agsapa.  Ngem kasla awan ti maayna  daytoy ta nalaing met nga aglemmeng dagiti  youth gang no adda makitada a polis.

Kadagitoy nga agrurupak a youth gang, maymaysa  met ngarud ti turongenda a lugar no dumtengen ti sumipnget, ti Nevada Square. Iti Biernes, mapno dagiti club dita kadagiti parokianoda nga estudiante iti high school iti nagduduma nga eskuelaan. Iti met Sabado, aduan dagiti estudiante iti kolehio. Kaniakania puesto tunggal gang. Kantiawan, asaran, a gagangay nga agtinnag iti  rinnapok.

        (Adda tuloyna)