Footer

SALAYSAY: Cell site towers, makaited iti problema iti salun-at? (Maudi a paset)

Ti Kadakkelan nga Issue

Makunan a nadepdep ti issue ti salun-at no ibasar ti nagtaud iti DOH ken ti WHO. Ngem saan a maipapan iti salun-at no di iti buis ti agdama ken kabarbaraan nga issue kadagitoy a cell site tower.

Million no di pay ket minilmillion ti kitkitaen dagitoy a cellular companies iti mismo a nakaipasdekan ti towerda. Ngem sadino kadi ti pagbubuisan dagitoy a kompania? Iti Makati City. Nalawag ngarud a naatiw ti mismo a host (ili) ti nakaipasdekan ti tower.

Saan nga umanay a rason dagiti environmental compliance ti DENR, National Telecommunications Commission permits, Air Transportation Office, sertipikasion manipud iti DOH a mayat ti maysa a host nga ili nga agipatakder lattan dagitoy a kompania iti torreda. Nasken a panunotenda a negosio daytoy.

No negosio daytoy, nasken ngarud a mangala dagitoy a kompania iti business permitda ken nasken nga agbayadda iti realty tax iti tinawen. 

Kastoy ti issue iti Abra idi pinarikpan ni Bangued Mayor Dominic Valera dagiti amin a cell sites ti Globe ken Smart gapu ta saanda nga agbaybayad iti buis. Agnegnegosio dagitoy a higante a a kompania iti maysa a lugar ket rumbeng laeng nga agbayadda iti buis.

Kinuna ni municipal treasurer ti Bangued, Isabelo Belisario, Jr., nga amin nga agnegosio iti aniaman a kita ti negosio ket nasken a mangala pay nga umuna iti business permit, kas sagudayen ti kalintegan dagiti local government units (LGUs) a maaddaanda iti pamastrekan. Kasapulan pay nga agbayad dagitoy a higante a kompania iti real property tax agsipud ta ipatakderda ti towerda iti maysa a lote.

Sadiay Bauko, Mt. Province, babaen ti municipal government's revenue generating program ken in line iti national government's fiscal reform measures, agbayad dagitoy a higante a kompania iti buis.

Kastoy man ti mabasa iti Bauko Municipal Ordinance Number 011-A:  “…imposes an annual fee for the operation and maintenance of all commercial cell sites, antenna, towers and other telecommunication relay station facilities within the town of Bauko.

“Communication companies with cell sites and relay station towers of over 15 meters in height will pay an annual fee of P50,000 while antennas or base towers for UHF, VHF or disks will pay P25,000.

Exempted from the annual fees are communication facilities that are being used by the municipal government.”

Limmaksiden dayta 15 a metro iti 12.5 a metro a distansia nga inkeddeng ti DOH a kaadayo tapno di maapektaran ti salun-at. 

Addaan iti 29,382 nga agindeg ti ili ti Bauko,  kaaduan iti populasion iti Mt. Province. Sumarsaruno laeng ti capital town ti Bontoc nga addaan iti 24,798 nga agindeg.

Ad-adda a maipatakder dagiti towers kadagiti strategic nga area wenno kadagiti kaaduan iti populasion a yan ti possible market. Ditoy a maikonsentret ti pannakapapigsa ti signal no di man kapipigsaan a signal tapno ad-adu ti  maallukoy a suki wenno agaramat iti produkto ken serbisio ti kompania. 

Saan laeng a dagiti tallo a cellular giants ti nasken nga agbuis (koma) iti Vigan wenno iti Ilocos Sur no di ket dagiti pay dadduma nga agar-aramat iti antenna a kas iti nadakamat iti municipal ordinance ti Bauko.

Tumulad koma ti Vigan City (wenno ti probinsia) kadagiti ili ti Bangued, Abra ken Bauko, Mt. Province a panangbuis kadagitoy a cell site tower ken kaarngina a teknolohia. Usaren koma ti mandatos ti LGU a kas mangpataud iti ad-adu pay a pamastrekan ti siudad (Vigan) ta nadardaras met laeng ti panagdur-as ken nalaklaka nga amang ti panangidanon kadagiti basic services kadagiti umili no adda kanayonan a pangalaan iti pundo.

Buisan koma dagiti makabael nga agbuis a saan ket a dagiti makurkurangan ken awanan iti isaang.#