SALAYSAY: Dagiti Tagilako iti Kalsada – Part Two

Wen agpayso ta kunam. Mayat a supusop a pagsapulan ti panaglako iti igid ti kalsada, ngem nasaysayaat no biangan ken tulongan ida ti local government tapno adda seguridad para ken ni aglaklako ken ni gumatang…” daytoy ti sungbat ti maysa a kamannurat iti Hawaii iti salaysaytayo (Tawid, June 22-28, 2009) maipanggep iti kapaliiwantayo maipapan kadagiti tagilako iti kalsada.

Napintas a suhestion. Ngem ti makunami, ar-aramiden met ti gobierno ti biangna a tumulong kadagiti agkasapulan iti pannarabay ken teknolohia. Ar-aramiden met dagiti mayat a tumapog iti negosio ti akemda. Agdanggayda a mangitag-ay iti kasapulan nga idudur-as ti produkto wenno negosioda.

Ti laeng kuestion, sumagmamano kadagitoy nga aglaklako ken agnegnegosio ti saan pay a nakaraman iti tulong wenno di nakadilamot iti kasapulan a teknolohia para iti produktoda. Ania kadi ti rason? Saan nga organisado dagitoy. Awananda iti kapabilidad a mamagkaysa iti bagbagida para iti nalawlawa a konsepto ti inda panagrang-ay. Wenno dida pay ngata napanunot a ti panagtitipkelda a kas maysa nga organisasion ket addang tapno dumur-asda.

Tumultulong ti gobierno kadagiti umasideg. Pagarigan laengen ti bibingkaan iti Bantay, Ilocos Sur, adda naiserbi kadakuada a teknolohia ken panagadal sakbay a limmawa ken dimmakkel ti negosioda. Saan laeng a pinansial a tulong ti inted ti Department of Science and Technology no di pay timmulong iti pannakaipakete ken pannakailako ti produkto dagitoy a bibingkaan. Tatta nakadurdur-asdan ket paborito dagiti sangaili ken turista dagiti produktoda a gatangen nga ipasarabo kadagiti patpatgenda.

Iti Pangasinan, naisurotak iti naminsan a panagbisita kadagiti grantee ti mushroom culture. wenno moderno a panagpatanor iti uong. Naisuro nga immuna kadagiti grantee no kasano ti agpatanor iti semilia, agisagana iti pagmulaan, mangpreparar kadagiti kasapulan, ken teknolohia no kasano ti agibotelia ken agidelata, ken karamanen ti assistance para iti market ti produkto. Adda daytoy iti igid ti kalsada iti Balungao, Pangasinan nga agturong iti Nueva Ecija.

Adda pay agar-aramid iti bakya (Wen, di pay natay ti bakya) iti igid ti kalsada iti ili ti Laoac iti met laeng Pangasinan.. Iti ili ti Sison, adu met dagiti government-assisted a cottage industries, kas iti pagaramidan iti muebles kadagiti antique shops ken ti aquaculture ditoy met laeng nga ili ken kabangibangna. Tumultulong met ti gobierno iti kaadduan kadagiti agar-aramid iti makmakan.

Adu met ti tinulongan ti Department of Trade and Industry iti Ilocos Sur, kas kadagiti agar-aramid iti kornik ken kalamay iti Candon, ti agar-aramid iti basket iti Suyo a maidispley iti Tagudin, ken dagiti agab-abel.

Lumawlawan ti cottage industries, fish and prawn culture, sericulture, panagpatanor kadagiti masetas, panagtaraken iti dingo, pagaramidan kadagiti muebles, ken dadduma pay babaen ti panagbadang ti gobierno ken pribado a sektor para iti idudur-as.

Simple laeng ti teknik ti panagrang-ay. Saan a kuestion no nababa wenno nangato ti adalmo. Kangrunaan iti amin, kasapulan ti panagsalukag. Ta ti kinasalukag ti tao ti dakkel a badangna a rumang-ay.#