SALAYSAY: Davelyn Ancheta Quijano; baro a presidente ti SNHSAAH

Aiea, Hawaii- Nagkaykaysaan a pinili dagiti kamkameng ti Sinait National High School Alumni Association of Hawaii (NHSAAH) ni Davelyn Ancheta Quijano a sumaruno a presidente ti gunglo iti eleksionda idi Disiembre 6, 2009 ditoy.

Kadua ni Quijano a nabutosan da Gus Concepcion, umuna a bise presidente; Anabel Rafanan, maikadua a bise presidente, Antonio Ipalari, recording secretary; Dolly Willing, corresponding secretary; Julie Guzman, tesorera; Larry Peralta, auditor; Estrella Taong ken Natividad Lived, parairakurak.

Dagiti sumaganad dagiti direktor: Abbie Peralta, Ador Quijano, Rogelio Idica, Solomon Pada, Ester Cabacungan, Leonila Degala, Angelina Idica, Carlos Rafanan, Rudi Mangrubang. Mamagbaga da Manuel Cabacungan, Estrella Taong, ken Amado Yoro.

Maisagsagana ti instolasion a panagsapata dagitoy iti maysanto a programa.

Nabangon ti SNHSAAH idi Hulio 16, 1995 kas non profit organization ket partner organization iti Annak Ti Sinait Iti Hawaii, agpada a kameng iti Sinaitenians International & Global Network [SIGN]. iti Ilocos Surian Assn of Hawaii, Oahu Filipino Community Council and the United Filipino Council of Hawaii.

Asino ni Davelyn Ancheta Quijano?

Maysa a Real Estate professional ket empleado iti Home 808, LLC. Kameng kadagiti sumaganad: Filipino Chamber of Commerce, Sinait National High School Alumni, Annak Ti Sinait Iti Hawaii, Honolulu Board of Realtors, National Association of Realtors. Dagiti paggaayatna a paglinglingayan: golf, dancing, swimming, reading (romance and comics), sewing and designs, gardening ken cooking.

Agdama a Mrs. Ilocos Surian Association of Hawaii, 2008-2010, naiyanak ni Davelyn idiay Pug-os, Sinait, Ilocos Sur. Nagturpos iti Sinait National High idi 1978, sa intuloyna iti Waialua High School apaman a nakasangpet ditoy Hawaii. Nangala iti Accounting Course iti Leeward Community College idi 1980-1982; John Stapleton Real Estate School 2000, Licensed Real Estate Agent; University of Phoenix, Business Administration 2004.

Aktibo a tumultulong kadagiti proyekto a pamataudan iti pondo para iti pagsayaatan ti gunglo ken ili, aglalo iti para iti medical ken dental mission.

“The most important event that touched my heart was being a part of the medical mission to my hometown, Sinait and the Province of Ilocos Sur,” kinuna ni Davelyn.

Innayonna a kas volunteer, nangibati iti kinapakumbaba ken pannakapnek iti pannakakitana ti panagdayaw dagiti naipaayan iti serbisio a kailianda.

Uppat ti annakda ken ni Ador Farinas Quijano, da Allen, Jairemie, Janere and Allysen ken dua ti appokoda. Agnaedda a sangapamilia iti Ewa Beach, Hawaii.#