Footer

SALAYSAY: Di nakappapati: natay, simrek iti trabahona

Di nakappapati ngem pudno! Daytoy ti makuna a pudpudno a ghost employee. Amaya, makapakintayeg  daytoy a naipadamag a napan nagtrabaho daydi sekretario ti sangguniang panlalawigan Noel Sabog  iti provincial capitol ti Benguet Province.

Naatake ket natay ni Sabog idi Pebrero daytoy a tawen. Ngem ti nakakaskasdaaw, simrek pay laeng iti trabahona.

Kasano a naammuan a simrek ti nagawan iti trabahona? Babaen ti biometric machine nga us-usaren dagiti empleado a kas panagrehistroda iti iseserrekda iti opisina babaen ti finger printing. Computer based ti biometric machine ket daytoy ti nangsukat kadagiti daan a bundy clock. Iparabawmo laengen dayta kanawan a tangan ti imam ket agrehistron a sika dayta. Saan a mabalin a mapalsipika ta awan ti agpapada a thumbmark. Kadagiti dadduma, ti sibubukel a dakulap iti idisso iti screen.

Agrehistro iti biometric machine ti  kinaasino ti empleado ken ti oras nga  iseserrek ken iruruarna. No agtsek ti dadaulo iti personnel division iti oras ti iseserrek dagiti amin nga empleado, iyimprintana laeng daytan iti naka-networking a kompiuter ket mabasan ti nagan ken oras dagiti simrek iti las-ud ti kinse nga aldaw.

Ngem nasdaaw laengen ni Dean Marc Monang iti personnel office idi natakuatanna a nagrehistro iti entries ti ar-aramatenna a kompiuter a simrek daydi sangguniang panlalawigan secretary Sabog iti 12:31:53 p.m. idi Agosto 25 daytoy a tawen. Awan ti agpapada a fingerprint, isu a saan a mabalin nga aramiden ti sabali a tao, kinuna ni Monang.

Daydi abogado Noel Sabog ti maysa a kadagiti opisial a naikkan iti pammadayaw idi napan a tawen iti 20 years in service (kas sekretario iti SP). Ngem apay a nagsubli?

Kinuna ti simmukat kenkuana a nalipatanda kano a kinablaawan idi nagbertdey ken kayatna nga  ipalagip a saanna a nalpas dagiti papelesna iti GSIS iti inna koma panagretiro, banag a nalabit a kayatna nga iparikna ti pannarabay kadagiti pinanawanna a mangipagpagna iti claim.

Intugkelan dagiti kaopisinaan ni Sabog  iti kandela ken inkararaganda ti nagawan.

Saan a nakapappapati a pasamak, ngem pudno. Datdatlag ti lubong dagiti natayen ta mastrekda ti kompiuter wenno kabaelanda pay laeng ti agkompiuter.#