Footer

SALAYSAY: Dua a klase ti gayyem

Prov. 18:24

Adda panaggayyem a saan nga agbayag; adda met gagayyem a nadekdekket pay ngem kabsat.

Kas iti pakasaritaan da Lorelie ken Janet. Ni Lorelie, naayat unay kadagiti gagayyemna. Saan a napili iti gayyemna. Gayyem ti asinoman, aniaman ti katataona.

Natalek unay ni Lorelie ken ni Janet. Paturogen, pakanenna iti balayna. Kasla kabsat ti panangibilangna itoy a gayyemna.

Maysa nga aldaw a napan naggroseria ni Lorelie, nabati ni Janet a matmaturog. Idi sumangpet ni Lorelie, nagkullayaw pay ta awan metten dagiti iduldulinna nga alahas ken kuarta! Awan metten ni Janet. Nagsangsangit piman ni Lorelie. Dina impagarup a takawan ti imbilangna a nasinged a gayyemna.

Ngem saan a dayta ti gapu nga inlunod ni Lorelie ti gayyemna. Nalawag kenkuana ti nailanad iti Bibilia: Bendisionanyo dagiti mangidadanes kadakayo (Roma 12:14); diyo supapakan iti dakes. Ikagumaanyo ketdi nga aramiden ti kinaimbag iti imatang ti tao. (Roma 12:17)

Saan a nangipila iti kaso ni Lorelie. Linipatna lattan ti napasamak.

Iti sabali a bangir, nagkaubingan da Luis ken Mario. Nakurapay ni Luis idinto a baknang ni Mario. Idi agbaro ken nataengandan, dimmakkel ti giwang iti nagbaetan da  Mario ken ni Luis a kinaubinganna. Siempre ta saan nga agkatukad ti panagbiagda. Mannalon ni Luis idinto a negosiante ni Mario.

Nagsakit ni Mario iti kidney. Kanayon ti dialisisna. Imbal dagiti saka, bagi ken rupana.  Rummuar-sumrek iti ospital. Kimmayakay payen dagiti dadduma a gagayyemna.

Ngem saan nga immadayo ni Luis. Masansan a binisitana toy masakit a gayyemna. Makasangsangit ni Mario ta dina pay kayat ti matay agsipud ta ubbing pay dagiti annakda ken Anabelle.

Indiaya ni Luis ti maysa a kidneyna. Idi naeksamen, agpada ti tissue ken texture ti kidneyda. Ket naaramid ti operasion.

Naimbagan ni Mario. Indiayana ti dakkel a gatad ken ni Luis.

“Awan katukadna a pirak ti pannakigayyemko. No makigayyemak, saan laeng a gayyem iti sao, no di pay iti aramid ken panunotko. Isu a diak maawat dayta ididiayam a kuarta. Ta no inawatko, kasla awan metten ti kaes-eskan ti panagkaubinganta,” kinuna ni Luis.

Napasangit ni Mario. Nalagipna a nagkurang itoy gayyemna. Nagliway gapu iti adu a pakakumikomanna.

Kadagitoy dua a pakasaritaan iti biag, mangiladawanda iti napudno ken di napudno a gayyem. Iparangna ti kinaadda ti kabaelan ti tao nga agpanunot iti umno iti laksid ti kinamaterialistiko iti agdama a panawen. No adda mangliput a gayyem, saan a nasken a tutopan, saan a bumaba iti level ti kapanunotanna. Ta no inaramidmo daytoy, kaska la metten timmapuak iti gayonggayong ti nariribuk a panagbiag.

Ti napudno a gayyem, ikutna ti maregmeg a balitok a dinto kabaelan a pagkupasen dagiti rituer ti biag.

Ayat ti kabibilgan iti amin. Ti ayat ti mamagbalin iti tao nga ingget bileg, dinto kabaelan a parmeken ti kinadakes a mangipaay kenkuana iti dadagsen ti biag.#