Footer

SALAYSAY: Eugene Paat: Ti Ilokano Superman

Saan a maun-uni ken tay kunada iti Ingles a soft-spoken. Dayta ni Eugene Paat, agtawen iti duapulo ket tallo ken taga-Barangay Baclig, Cabugao, Ilocos Sur. Malaksid iti nabisked a pammabagina, awan ti panangipagarupmo a maysa a kampeon ni Eugene iti amateur a liga ti mix martial arts.

Idi Disiembre 22, 2008, impakita ni Eugene iti sibubukel a pagilian ti pigsa ti takiag ken sidap ti panunot ni Ilokano iti uneg ti lona kalpasan a patumbaenna ti kinalabanna iti umuna a rikus ti labanda.

Wen, ta saanen a naturpos pay ni Douglas Tambuli, ti dakdakkel ken tangkiran a kinarupakna iti heavyweight division (210 lbs.) ti Philippine Submission Sports League (PSSL) ti nakaiskediul a tallo a rounds (5 a minuto tunggal round) a labanda. Kalpasan ti dua a minutos iti umuna a rikus, insukon ti coach ni Tambuli (Team Crocodile Tape) ti laban kalpasan a lugoban ken dinudog ni Eugene (Team Bgry. Ginebra) ti rupana. Ala ket 5’10” laeng ni Eugene idinto nga agtayag iti 6’2” ti kinalabanna a ni Douglas Tambuli. Ground and pound, maysa nga estilo iti wrestling, ti teknik nga impakat ni Eugene tapno mapadsona ti kinabalubalna.

Ngem sakbay a naglatak ti naganna iti benneg ti mix martial arts, maysa laeng nga ordinario nga agtutubo ni Eugene. Kalpasan a nagturpos iti sekundaria iti Cabugao Institute, saanen a nakapagtuloy iti kolehio gapu iti rigat ti panagbiag. Simmursurot ni Eugene iti amana a mapan agpasuyot iti pagpabunga iti mangga iti ilida a Cabugao. Iti bakante nga orasna, agay-ayam iti basketball.

Idi 2004, babaen ti tulong ti kabsatna a ni Aileen Joy nga agtrabtrabaho idi iti pagilian a Lebanon, napan nagsanay ni Eugene iti Elorde Boxing Gym tapno agbalin koma a boksingero. Ngem saan a nagbayag, isu metten daydi pananggubat ti Israel iti Lebanon isu a nagawid ti kabsatna ket kapilitan nga insardengna ti nagensayo.

Iti panagawidna iti Cabugao, nagsinningedda ken ni Sangguniang Kabataan Federated President Deogracias Jose Victorino “DJ” Savellano. Daytoy ti nangiyam-ammo ken ni Eugene iti agbirbirok idi iti fighterna a ni Ryan Singson. Nagsubli ngarud ni Eugene nga agensayo iti Elorde Boxing Gym, ngem saan a tapno agboksingero no di agbalin a mix martial artist.

Sakbay ti isasabakna iti ring, nainget a panagsanay ti dimmalananna. Adtoy ti iskediul ti training: 6am-8am-jogging/muay thai; 8am-10am-wrestling; 10am-12pm-boxing; 12pm-5pm-panaginana/masahe; 5pm-9pm-jujitsu/graftling.

Aramidenna dayta iti uneg ti innem nga aldaw iti tunggal lawas iti uneg ti dua a bulan. Ti managerna a ni Ryan Singson ti makaammo iti amin a masapulna kas iti bitamina, energy drink, pagsapsapo nga ointment ken dadduma pay.

Adda kadi met gundaway a narigatan iti training? Kinuna ni Eugene a ti karigatan a napadasanna ket ti walo a rounds a nakaidda nga agsarapa iti danog. Walo a rikus nga agpaut iti lima a minutos nga agsarsarapa iti danog tapno maipasagepsep iti panunotna ti “focus” ken husto a hand punch. Nupay kasta, saanna kan a napanunot ti sumuko bayat ti panagsanayna. Ad-adda pay a nangpatibker kenkuna ti suporta ti pamiliana. Iti tunggal itatawagna kadakuada iti selpon, maymaysa laeng ti patigmaanda kenkuana: anusanna ti rigat ta daytoy ti mangitunda kenkuana iti ballaigi. Napalalo a ragsakda idi ipadamagna ti panagkampeonna.

Iti mismo a laban, nakarikna kadi iti sakit a nagkunaanna a mabalin a pakaatiwanna? Maysa a kugtar iti umuna a minuto ti laban ti nangitunda iti pannakaiparusisina ngem kasla kimat a bimmangon ket iti apagdarikmat, pinandagannan ti kabalubalna ket dinan pinalusposan pay.

Mabuya iti You Tube ti sibubukel a labanda. Itype laeng ti Philippine Submission Sports Finals.

Kalpasan ti championship bout a dagus a nakaipasungalngalanna, mapanen ni Eugene iti professional a liga. Iti panaglukat ti baro a season ti FEARLESS, ti nalatak a professional mix arts competition iti Pilipinas a maipabpabuya iti CS9, agay-ayamen daytoy kas pro.

Adu ti agkunkuna a suerte ni Eugene ta saanen a nangrugi iti baba. Addan promoter a nangidiaya kenkuana iti P20,000 tunggal laban.

Saan ketdi nga agpatingga dita ti arapaap ni Eugene. Kayatna ti lumatak a kas iti idolona a ni Chuck Lidel iti Ultimate Fighting Champion (UFC). Kinunana nga agurnong iti pagbasana tapno maituloyna ti agadal.

Di met ipaidam ni Eugene ti talentona. Libre nga isursurona dagiti ubbing iti Cabugao nga agduyos iti boksing. Patigmaan toy kampeon kadakuada: liklikan ti bisio kas iti arak ken sigarilio tapno agballigi iti pagduyosan nga sport.

Sangsangkamaysatayo ngarud ti Kailokuan a mangsurot kadagiti sumaruno a ranget ni Eugene Paat, ti Ilokano Superman.#