SALAYSAY: Ganagan manipud iti rugit ti alinta (Tuloyna)

Ania aya ngamin dagiti pagsayaatan ti panagusar iti ganagan manipud iti vermiculture, kunam Apo mannalon? Dagitoyda: mapaadda ti natural a fungicidal nga epekto kadagiti mula a mangiyadayo iti peste; saan a mangitunda iti pannakauram ken over dosage kadagiti mula; makatengngel iti danum a mamitlo ti kadagsenna iti dagsen ti maipan a rugit ken agtalinaed ti sustansiana iti daga iti uneg ti 5 a tawen; addaan iti auxins – maysa a natural a hormone a mangpapartak iti panagdakkel iti mula; itandudona ti pannakakonserba ti biodiversity; gayyem ti aglawlaw ken mangkissay iti 70% ti marunot a basura a maibelbelleng iti aglawlaw.

Kadagiti interesado itoy a teknolohia a taga-Ilocos Sur, mabalin ti makiuman iti BaRang-ay Demofarm iti Labnig, San Juan. Iti La Union, pasiaren ti research center ti Don Mariano Marcos Memorial State University (DMMSU) iti ili ti Bacnotan. Iti met Ilocos Norte, turongen ti opisina ti Ilocos Agriculture Resources Research and Development Consortium (ILARRDEC) iti ili a Batac.#

Soil conditioner manipud iti taep

Maysa pay a teknolohia nga ar-aramiden da Dr. Soller iti BaRang-ay Demofarm ti panagaramid iti carbonized rice hull wenno tay napadapo a taep tapno agbalin a soil conditioner. Maiwaras ti napadapo a taep iti daga sakbay ti panagmula tapno agserbi a kas energizer dagiti maimula a natnateng ken seedlings.

Idi damo, da Dr. Soller ti mapan agsursor kadagiti rice mills tapno dawatenda dagiti taep. Ita, dagiti pagpabayuanen ti mismo a mapan agitulod iti taep iti demo farm. Apresiaren pay daytoy ti Department of Environment and Natural Resources (DENR) ta malapdan ti panagibelleng dagiti rice mills iti taep kadagiti karayan a mangrugit iti danum ken mangpatay kadagiti lames. Libre nga itedda dagiti taep iti demo farm. No makasapul met dagiti makinkukua iti rice mills iti napadapo a taep, libre nga ited daytoy ti demo farm, kas inlawlawag ni Dr. Soller.

Itoy a tiempo a nanginan ti magatang a ganagan ken agtultuloy a pannakadadaelen ti aglawlaw gapu iti agduduma a kemikal nga us-usaren ti tao, panawenen tapno sublian dagiti nakainsigudan a wagas ti panagtalon. Maksayan ti gastos, makatulong pay iti pannakatagiben ti aglawlaw isu a padasenyo man ketdi dagiti naagapad a teknolohia.#