Footer

SALAYSAY: Ilocos Sur: Most Outsanding Poverty Alleviation Program Implementer (Maudi a paset)

Kagiddan metten ditoy ti panangisayangkat dagiti opisina ti kapitolio ken NLAs kadagiti agduduma a training ken seminars kadagiti barangay officials, barangay workers, agtutubo ken dagiti agindeg a mayat nga agsursuro nga agmasahe ken agtarimaan ti plantsa ken electric fan.

Babaen met iti provincial health office ken boluntario a dodoktor, naigiddan metten a naisayangkat ti libre a medical, surgical ken dental mission iti lugar. Adda metten dagiti agduduma nga agas  ken bitamina a maited kalpasan ti konsultasion. Babaen itoy a wagas, maipaay kadagiti agindeg ti serbisio medikal a saanen a kasapulan pay ti panagturongda iti ospital.

No adda dagiti concerns ken serbisio a kasapulan kadagiti agduduma a dokumento ken pakaseknan ti agrikultura, rehistro ti nagan ken daga, legal a problema ken dadduma pay a serbisio nga iti laeng kabisera a maiprosproseso, adda dagiti booth ti tunggal opisina ken ahensia a madadaan a mangsango kadagiti agkasapulan.

Iti ababa a pannao, maiyakar ti kabisera iti uneg ti maysa nga aldaw nga isasarungkar ti KABSAT kadagiti mapili a lugar. Saan met a mabisinan dagiti makipaset ta adda pay libre a pangaldaw para iti amin a nayon ti sagut ti gobierno probinsial.

Counterpart ti masarungkaran nga LGU ti panangiruarda kadagiti amin a produkto ti ili a gatangen met dagiti amin a dimmanon. Itoy a wagas, maaddaan iti merkado dagiti produkto. 

Immuna a dinanon ti KABSAT ti Boguibog, Salcedo idi Nobiembre 15, 2007; naisaruno ti Kilang, Galimuyod idi Disiembre 17, 2007; Alilem idi Enero 29, itoy a taw-en; Sugpon idi Pebrero 20; Montero, Banayoyo idi Marso 7; Gregorio del Pilar idi April 22; Sigay idi April 23,; Cervantes  idi Hunio 5; Quirino idi Hunio 6; San Emilio idi Hulio 10; Lidlidda idi Hulio 11; Suyo idi Setiembre 29; ken kaudian ti naisayangkat iti Burgos idi Oktubre 16.

Madama metten ti koordinasion ni KABSAT Czar Tirso “Bong” Savellano kadagiti dadduma pay nga ili a nakalinian a danonen ti KABSAT kadagiti sumaganad a bulan.

Ita, adtoyen ti bunga  ti programa  a KABSAT ti gobierno probinsial ti Ilocos Sur. Inawat ni Gob. Savellano ken ti economic team ti kapitolio ti tropeo para iti panangiyalat ti Ilocos Sur iti titulo nga Outstanding LGU Poverty Reduction Program Implementer in Region 1, Provincial Category.  Mangipakita iti kinapasnek ken kinasinsero ti gobernador  a mangpugipog iti kinapanglaw iti probinsiana.

Nakabalubal ti KABSAT ni Gob. DV dagiti programa a Proyektong Makakatulong sa Mamamayan Tungo sa Kaunlaran (PMMTK) ti Ilocos Norte; Operation Rang-ay ti Barangay (ORB) ti La Union ken Gamoray Tan Talongganing Ed (GATE) Pangasinan (Achieving Success and Excellence in Pangasinan)

Ita met laeng a tawen, napadayawan ti Ilocos Sur kas Green Banner Awardee gapu iti programana a pangrupak iti malnutrision kas iti back to basic program, backyard gardening, malunggay planting, livestock upgrading ken dadduma pay. Maysa ngarud a napintas a gasat ti idadateng ti KABSAT iti probinsia  nga Ilocos Sur.#