SALAYSAY: Immadayo kadin ti anag ti matrimonia? (Maudi a paset)

Iti daytoy a punto no utoben a nalaing, mailadawan ti kinaadda ti dakkel a giwang ti addaan ken awanan. Mailaksid ti awanan iti kaipapanan a rumbeng koma nga agpaay kadakuada.

Nalawag a naidagadag iti Canon law wenno iti bagi dagiti linteg ken regulasion nga inaramid wenno inadaptar ti eklesiastikal nga otoridad para iti gobierno dagiti Kristiano nga organisasion ken dagiti kamkamengna a kasapulan nga iti uneg ti simbaan a maangay ti kallaysa a saan ket nga iti uray sadino la ditan a kayat ti agpasken. No ti kayat dagitoy ti masurot, mailaksid la ketdi iti napudpudno a sakramento ti panagmaymaysa. Maawanan iti anag ken kaipapanan. Ket saan a masigurado ti kinasolemnidadna ti responsibilidaId a naipatong wenno naiputong kadagiti abaga dagiti nagkallaysa ta limmaksidda iti nakaisigudan nga annuroten.

Nupay adda naituding a kalaksidan ti amin, a kas iti pagayatan ti ‘in periculo mortis’ wenno iti kaso a naisangsangayan, kas iti kangitingitan ti biag ken patay ti maseknan a nobia wenno ti nobio, mapalugodan dayta a panggep no agngangabit ti uray asino kadagiti maseknan, ti nobio man wenno ti nobia wenno isuda a dua. Ngem no adda a sitatalinaay dagiti maseknan ken awan ti lapped, nasaysayaat met laeng nga angayenda ti panagtiponda babaen ti matrimonia iti simbaan. Dayta koma ti masurot. Saan koma nga isukat ti kinangayed ti altar kadagiti buya a para laeng iti mata, wenno kadagiti buya a mangpabussog iti ego.

Utoben koma a nalaing ti simbaan daytoy a banag tapno maipaay ti umiso a solusion. Daytay solusion a magaw-at tapno saan a mailaksid ti tarigagay dagiti awanan nga agdennada a sangapamilia nga adda bendision ti simbaan.

Kayatmi ngarud nga ibatad ti ikakanunong ken panangpadayawmi kadagiti programa nga isaysayangkat dagiti lokal a gobierno babaen ti pannakitinnulong ti simbaan ken dagiti gunglo a kas iti Catholic Women’s Club, Rotary Club, Pastoral Council, ken dadduma pay a gunglo-sibiko tapno maikkan iti gundaway dagiti agdendennan ken addaan payen iti annak nga agkallaysa iti sidong ti simbaan.

Ditoy Vigan City, tinawen nga angayen ti gobierno ti siudad ti mass wedding babaen ti panagkikinnamayet ti simbaan, ken maysa a gunglo dagiti babbai ken iti pannakitinnulong ti city social welfare and development ken lokal a sibil a registrar ditoy siudad.

Tunggal Marso a pannakaselebrar ti Women’s Month ti pannakaangay ti mass wedding. Idi napan a tawen, nasurok a sangagasut nga agdendennan wenno agliblib-in ti nagkasar iti Katedral ni San Pablo ket timmakder nga esponsor iti kallaysa dagiti city officials nga indauluan ni Mayor Eva Marie S. Medina, Vice Mayor Franz Ranches ken dagiti amin dagiti konsehal.

Kalpasan ti kasar, ti pay gobierno ti siudad ti nangipaay iti nabaknang a pangngaldaw kadagiti kakaskasar ken regalo.

Tattay laeng Disiembre 28, 2009, nangesponsor manen ti Vigan City government iti mass wedding kadagiti 125 a couples ket kas iti inar-aramidnan iti napalabas, dagiti city officials ti nagbalin a ninong ken ninang dagiti nagkallaysa ken impaayanda ida iti pangngaldaw malaksid laeng iti regalo.

Maysa a nasagraduan a banag ti itatadog iti matrimonia. Kasapulan ngarud a maaramid ti panagtipon ti dua nga agpimpinnateg iti babaen ti bendision ti simbaan.

Ngem no maminsan, ti saan a pannakagaw-at kadagiti intuding nga annuroten ken paglintegan ti kangrunaan a rason iti panangibbet kadagiti annongen. Daytoy koma ti ipangruna ti simbaan a lapdan.#