SALAYSAY: Immadayo kadin ti anag ti matrimonia?

Iti bulan ti Disiembre agingga iti Hunio ti naruay nga essem nga itatapog iti naestaduan a panagbiag. Panawen a panagsimpa ken itatallikuden kadagiti aramid a nakaisigudan. Panangsango iti kabarbaro nga agpang ti biag. Kadagiti sutil, abuten ti rikna a pinigergeran ti di maulsan a parbangon kadagiti nalam-ek a bulan. Wenno induron ti rikna iti buangger ti kinapinget kalpasan ti panagapit kadagiti mula iti bangkag, lalona iti lasona ket esseman ti kinaadda koma ti katakunaynay ken kaliwanliwa. Iti ababa a pannao, dimtengen ti panawen a panagasawa.

Ngem ania kadi ti anag ken kaipapanan dagiti maar-aramaynaid itan a seremonias ti matrimonia? Maitutop kadi dagiti “kabaruanan” a wagas para iti ecclesiastical laws? Umno kadi wenno umiso dagiti wayat a panagkallaysa iti ruar ti simbaan? Rumbeng kadi nga idisso ti nakaisigudan a solemnidad ket piduten dagiti umayon a tarigagay iti agdama a panawen? Kasano met dagiti awanan a pulos iti busbosen? Sumagmamano dagitoy kadagiti kangrunaan a saludsod a nasken a tamingen nga umuna ken kasapulan iti sungbat.

Iti panagkunak, immadayon ti anag ti matrimonia iti uray ania nga agpang ti panagbiag, nabaknang man ken awanan. Immadayo gapu iti pannakaipasngay ti panagsusupadi a tarigagay. Panagari dagiti kabarbaro a konsepto a saan nga umayon iti linteg ti pammati.

Pagarigan laengen dagiti adda mabalinda iti biag, adun dagiti kallaysa a saanen nga iti uneg ti simbaan ti pakaangayan ti solemnidad. Adda dagiti maangay iti beach, a dagiti nagkasar ket nakasiorts laeng ta nakatennebda iti danum nga agingga iti siketda. Adda pay dagiti agkasar iti underwater, iti lansad ti baybay a nakaaruat laeng dagiti agpasken iti swim suit ken diving gear. Adda pay dagiti agkasar iti clubhouse wenno otel wenno aniaman a napintas a garden.

Kadagiti babaknang, sa-anen a ti kinasolemnidad ti kallaysa ti umuna no di ti kinaisangsangayan ti panagkasarda.

Kalpasan ti kasar, sumaruno met ti narangya a resepsion. Aglayus ti arak. Nataratar dagiti nagadu a masida ken maserbian dagiti sangaili babaen kadagiti nakauniporme a serbidor ken serbidora.

Umno kadi daytoy a suroten uray no awan daytoy iti annuroten iti ecclesiastical laws wenno ti body of codified laws governing the affairs of a Christian church?

No dadduma, itoy a narigat a paniempo, gapu iti ingangato ti magastos iti idadatag iti matrimonia, adu dagiti agdenna iti ruar ti kallaysa. Dagiti dadduma, agkasarda pay laeng iti mayor, hues ken pastor a naikkan iti annong a mangkasar. Kadagiti awanan, lalo kadagiti nakurapay la unay, agdennada lattan nga awan ti bendision ti simbaan. Rasonda: busbsenda laengen para iti inaldaw a panagbiagda ken iti masakbayan ti busbosenda koma para iti panagkasarda iti simbaan. Itoy a pagteng, saanda laeng a nailaksid iti ikub ti kinaso-lemnidad ti matrimonia no di pay nailaksidda nga inkapilitan iti kaipapanan ti pammatida. Nupay saanda a pagayatan, inkpilitan a mapasamak gapu iti tarigagayda a panagmamaysa.

(Adda tuloyna)