Footer

SALAYSAY: Indayon ni Lagip: Lawag iti Nasipnget a Dalan (Maudi a paset)

Immanges iti nauneg ni Lyn. Diak nagtimtimek. Inurayko ti sumaruno a balikasna.

“Ita, masaksakiten ni nanang. Ngem saan nga agmaymaysa. Addakami nga agkakabsat a mangaywan kenkuana. Daytoy ti pangipariknaanmi kenkuana nga ipatpategmi. Nga uray bukodmi a ragsak, itedmi kenkuana, isu a nakautanganmi iti agdama a nam-ay a sagsagrapenmi.”

Nabayag a nagulimek. Nasiputak ti panangideppelna ti tammudona iti suli ti matana.

Madamdama, inisemannak ni Lyn. Pinikpikko ti bukotna kas panangipariknak ti panagraemko kenkuana.

“Agyamanak, manong,” insungbatna. “Maragsakannak a nakakita kenka ket iti uray bassit a tiempo, adda tao a nangipalgakak iti agdama a kaririknak.”

“Nagasatkayo ta adda inayo a mangipatpateg kadakayo,” nakunak. “Wen, itan ti panangipakitayo ti pangipategyo kenkuana, ita ta kasapulannakayo iti tiempo a nakapsuten.”

Linamanok ni Lyn. Naraniagen dagiti matana. Diak ammo, ngem nakariknaak iti naisangsangayan a pigsa iti dayta a darikmat.

Nangparaak iti taksi. Nagpaitulodak iti puseg ti siudad. Iti sanguanan ti Sagada Lunch ti dimsaagak.

Naglayonak iti uneg ti panganan. Naranaak ti maysa a kabagian ni baket.

Mabisinak ket dagus a naibbus ti inorderko a taraon. Ngem idi iyawatko ti bayad ti kinnanko, saan nga inawat ti kabagian ni baket.

“Ba’amon, ading, awan met sabsabali kadatayo,” kinuna ti babai a kabagian ni baket. 

Nagyamanak ket nakitungtongak kenkuana. Nagpakadaak kalpasanna.

Sinitsitak ti sumungad a taxi.  Nagpaitulodak iti BGH.

Awanen dagiti agur-uray iti sirok ti saleng.  Awan metten ni Lyn. Nalabit a nagsublin iti siled ni nanangna.

Imbulosko ti nauneg a sennaay. Mabalin a saankamin nga agkita pay ken ni Lyn.

Matmaturog ni baket a nadanonko. Bimmessag iti panangdayas kenkuana ti agpababan nga init.

Ngem saan a nailaksid kaniak ti ik-ikutanna pay laeng a kinalapsat, saguday a nabayag a binirbirokko iti maysa a babai.

Nagsubli iti panunotko ni Lyn. Nairanrana ngata ti panagsarakmi? Wenno maysa a pamuspusan ti Dios tapno pumigsa, bumileg pay ti panangipategko iti kasimpungalak?

Minatmatak manen ni baket. Iti dayta a kanito, nagyamanak iti Dios ta iti tiempo a kasapulak met iti natibtibker a pakinakem ken pigsa, dimteng ni Lyn a kasla maysa a baggak a nangsilnag iti dalanko.

Inaprosak ti rupa ni baket. Iti umuna a gundaway, naasut iti barukongko ti maysa a kararag: Dios a mannakabalin, mamatiak a dimo ipalubos a mapukawko ti babai nga ipatpategko iti biag!

Idi agmulagatak, nakitak a matmatmatannak gayam ni baket.

“Agkarkararagka, lakay? Milagro!” umis-isem a nagkuna. “Nalaingakon.  Nasayaaten ti panagriknak.”

Diak nagawidan nga inapungol ni baket, Manong Danny. Kaslaak ubing a nagsangit iti barukongna.

Ngem saan a liday no di ragsak ti nariknak. Agsipud ta ditoy a naamirisko a napatpateg ni baket ngem uray ginumpo a kinabaknang iti lubong.

Ala, ditoyen, Manong Danny, ti gibus ti maysa a pagteng iti biagko, ordinario a pagteng ngem kangayedan a pasamak iti biagko.

Agyamanak unay.

                                                                            Antonio