Footer

SALAYSAY: Industria ti tabako, saanen a sunset industry (Umuna iti dua a paset)

Iti napalabas a sangapulo a tawen wenno nasursurok pay, nagsuek ti industria ti tabako iti pagilian. Maigapu daytoy iti panagpababa ti kalidad dagiti napartuat a binulong lalo dagiti natakuatan a naimula kadagiti salty a daga. Dandani saan met a nagkuti ti presio ti tabako iti laksid ti napardas a panagpangato ti presio dagiti farm inputs kas iti ganagan ken pestisidio. Gapu iti daytoy, adu nga agmulmula iti tabako ti nadismaya ket nagmulada iti mais, mani, ken natnateng imbes a tabako. In-inut ngarud a nagsuek ti industria ti tabako ket nabansagan payen a “sunset” industry.

Tapno masalbar ti industria ti tabako, nagbirok dagiti opisial dagiti tobacco producing provinces  a pakaibilangan ti Ilocos Sur, Ilocos Norte, La Union ken Pangasinan iti solusion iti problema. Iti tobacco tripartite conference a naangay itay Nobiembre 2007, indauluan da Ilocos Sur Governor Deogracias Victor  Savellano ken Dip. Eric Singson dagiti mannalon iti tabako a simmango kadagiti negosiante ken agparpatuat iti sigarilio tapno kiddawenda ti nainkalintegan a panagpangato ti floor price ti tabako.

Iti komputasion nga impresentar ni Nestor Rodriguez, spokesman dagiti mannalon,  umabot iti P100,000 ti gastosda iti tunggal ektaria a mulaanda. Indawatda a P22.46 ti rumbeng a ngumatuan ti floor price ti tabako tapno adda  maganansiada.

Iti sabali a bangir, impresentar ni Rodolfo Salanga, presidente ti grupo dagiti tobacco traders, ti bukodda a komputasion iti gastosda iti panangibiaheda kadagiti gatangenda a tabako ken pasueldo dagiti empleado.

Kalpasan ti namitlo a panagsasangoda, natinong a ngumato iti P10 ti floor price ti tabako. Kadagiti mannalon, dakkel unayen daytoy a maituon iti presio tapno adda maganabda iti panagmulada iti tabako. Iti pakasaritaan ti tobacco tripartite conference, daytoy pay laeng ti kadakkelan a ngimmatuan ti floor price ti tabako ta kadagiti naglabas a tawen, singkuenta sentimos agingga iti piso laeng ti maipatpatong no kasdiay nga idawat dagiti mannalon a maingato ti presio ti produktoda.

Itay nabiit, iti naangay a consultative meeting ti Regional Development Council Region I a dinar-ayan dagiti ahensia nga adda pakainaiganna iti agrikultura, impresentar ni National Tobacco Administrator Carlitos Encarnacion ti nagbalin a taray ti tabako itay napalabas a tobacco season. Iti imparangna a data, immabot iti 23.73 milion a kilo ti nairekord dagiti tobacco traders a nagatangda nga agpateg iti P1.33 bilion. Aganay met a P51.24 a milion ti naiparuar ti ahensia para iti production assistance ket 38,786 a farmer-cooperators ti nabenepisiaran para iti pannakasukay ti 25,319.55 nga ektaria ti daga. Iti ingangato ti presio ti tabako, adu manen a mannalon ti maguyugoy nga agsubli nga agmula iti daytoy a produkto.

Segun iti data, nagtalinaed a parikut ti nakaro nga importasion. Iti nairekord a leaf shiftment a 73.38 a milion a kilo, mapan laeng nga 8.38 milion a kilo ti naiyeksport idinto a 68 milion kilos ti inangkat ti pagilian.

        (Adda tuloyna)