Footer

SALAYSAY: ITI INDAYON NI LAGIP: Adda Naituding a Kaikarian (Maikapat a paset)

Immasideg ni Tatang. Dinamagna no ania ti gagara dagiti soldado.

“Paayabannakayo ni Heneral Villanueva idiay resthousena idiay Becques ta kayatnakayo a makita, Tata,” insungbat ti maysa a soldado.

“Ni General Villanueva?” rimmaniag ti rupa ni Tatang.

Naammuak a kinaklaseanna iti sekundaria ni Heneral Villanueva. Aganay uppat a pulo a tawen a dida nagkita manipud nagturposda iti high school.

Kimmuyogkami kadagiti soldado a nagturong iti resthouse ti heneral. Naipatakder ti balay-paginanaanna iti igid ti baybay. Naatepan iti bulong ti nipa ti kalainganna iti kadakkel a resthouse. Iti lauden ti patakder,  iti pagaayaman a namulaan iti Bermuda grass, nalawag a mabuya ti pakabuklan ti baybay Tsina. Iti dayaen ti resthouse, adda patakder a nakaidispleyan dagiti alikamen ni Heneral Villanueva, kas  daydi paltogna idi damona ti sumrek ti serbisio iti Philippine Army ken dagiti naawatna a citation award ken pammadayaw manipud nagraduar iti Philippine Military Academy iti Baguio City  agingga a nagbalin a Chief of Staff of the Armed Forces of the Philippines.

Idi agkita da Tatang ken ni Heneral Villanueva,  kasla da agkabsat a naginnarakupd iti nairut.

“Ket kumusta, Cardo, ania ti trabahom ita?” sinaludsod ti heneral.

“Kua… agtalon laeng,” arimbainen ti amak a simmungbat.

“Well, nasayaat a pagsapulan dayta ta nadalus!” nagayek-ek ti heneral. “Ket ‘toy barom, ania met ti trabahona?”

“Tumultulong kaniak nga agtalon.”

“Ania ti nalpasmo a kursom, barok?” sinaludsodna kaniak.

“One year basic seaman laeng, sir,” sidadayawak a simmungbat.

“Ah… kayatmo ti agseaman?”

“Wen koma, sir,”

“Agurayka ta saludsodek ken ni Col. Borbon no adda am-ammona a shipping line,” kinuna ni Heneral Villanueva. Ti junior officerna a kaduana a simmangpet iti dayta a rabii ti dakdakamatenna.

Insungbat daytoy nga adda ammona a kompania ti barko nga agbibiahe iti inter-islands ti pagilian.

“Urayen, sir,” sinippawko a dagus.

Adda tinawagan ti colonel. Apagbiit laeng ti panagpatangda.

“Agimpakikan ta inton bigat, makikuyogka kadakami nga agpa-Manila,” kinunana.

Anian a ragsakko a nakangngeg iti imbalikas ni colonel, Manong Danny. Dandani diak nasursurotan ti nagyaman kenkuana. Iti kamaudianan, maaddaanak met laengen iti trabaho.

Kasla addaak iti tapaw ti ulep idi aggawidkamin ken ni tatang. Intuloddakami pay dagiti soldado.

Kalpasan ti pangngaldaw iti sumuno a bigat, kinuyognak ni tatang a napan iti resthouse ni Heneral Villanueva ta sadiay a makikaluganak kadakuada nga agpa-Manila.

Kunak no iserrekdak iti barko ngem impandak iti kampo dagiti soldado ket pinagsanaydak a kas security guard. Medio naupayak. Nupay kasta, inggaetko ti nagsanay.

Makadominggoak a nag-training iti Camp Bonifacio Security Agency. Kalpasan ti makadomingo, addan lisensiak ket sigida nga inlugandak iti kompania ti Negros Navigation nga inter-island vessel ditoy Pilipinas.

Dandani uppat a tawen  a nagtrabahoak a kas security guard iti nasao a kompania. Nadumaduma a tao ti nakapulpulapolko iti dayta a barko ta pampasahero daytoy. Adda pay naam-ammok a balasang a taga-Iloilo a nag-crush kaniak. Ngem saan a simminged ti langenlangenmi ta napan nagtrabaho idiay Taiwan. Saankamin a nagkita manipud idi.

    (Maigibusto)