Footer

SALAYSAY: ITI INDAYON NI LAGIP: No Manangikulbo ni Ayat (Maudi a Paset)

Marso 20, 2005. Aldaw ti Domingo, oras ti alas dies iti bigat  ti naituding a panagsarakmi ken ni Pretty Anne iti KEA Shopping Mall iti Candon City.

Sinapak ti nagrubbuat. Inaruatko ti kapintasan a badok ken pantalonko. Nagbangbangloak pay.

Bayat nga agtartaray  ti nagluganak a mini-bus, diak nagawidan ti nagarapaap. No kaskasano, makanobiaak iti nalapsat a kas ken ni Pretty Anne. Dakkel ti pammatik nga ikut ni Pretty Anne dagiti saguday nga arapaapko iti maysa a babai.

Dimsaagak iti  batog ti KEA Shopping Mall ti Candon.  Inwarasko ti panagkitak iti aglawlaw  bareng addan ni Pretty Anne nga agur-uray kaniak. Iti textna kaniak, agtayag iti lima kadapan ken innem a pulgada. Atiddog ti buokna nga agsaringgayad agingga iti siketna. Iti dayta a deskripsion, nalaka laeng a mailasin ni Pretty Anne iti aniaman nga ummong.

Ngem agalas onsen ti aldaw, awan met laengen ti mapasungadak a kas iti deskripsion ni Pretty Anne.

Inawagak tapno penkek no agtuloy nga agkitakami. Adda kanon iti dalan.  

“Asidegakon dear, urayennak dita,” kinunana.

Iti panangawagna kaniak iti dear, kasla naitayokak iti langit. Kayatna kadi a sawen nga adda met rikna kaniak ni PrettyAnne?

“Urayenka ngarud iti nagtulaganta a pagkitaan,” kinunak a siraragsak.

Ngem adun a minibus ti napalabasko, awan met laengen ti makitak a dumsaag a babai nga atiddog  ti  buokna ken natayag.

Naguni ti selponko. Naggapu kenkuana ti mensahe. Adda kanon iti asidegko. 

 Inwarasko ti panagkitak iti aglawlaw ngem awan ti makitak a balasang iti asideg.  Sinaludsodko no ania a kolor ti kawesna ngem dinamagna ketdi no ania ti inaruatko. Pasaray iddepenna ti selponna no adda damagek kenkuana.

Nagpagnapagnaak iti sango ti KEA ngem kaskasdi a diak makita ni Pretty Anne. Mangrugin a makariknaak iti panagduadua.

Pagammuan, naguni ti selponko. Ni Pretty Anne.

“Saanen a matuloy ti panagkitata. Agawidakon. Sorry a talaga, “ dayta ti mensahena kaniak.

“Apayen?” nakunak. Ngem awanen ti sungbatna. Uray dagiti nagsasaruno a textko kenkuana, saanen a nasungbatan. Idi tinawagak, diakon nakontak. Iniddepna payen ti selponna.

Iti dayta a darikmat, nariknak manen ti dakkel a pannakapaay. Ammok, dimteng ni Pretty Anne, pinaliiwnak nga immuna ngem idi makitana ti pakabuklak, saanen a nagtuloy a nagpakita. Gapu ta saannak a nataer a kas iti ninamnamana?

Akuek nga adu dagiti pakaupayan ti maysa a babai kaniak. Ngem no pudno nga adda panangilala ni Pretty Anne kaniak, inwalinna koma dagiti pagkurangak ket tinungpalna ti karina nga agkitakami a personal. Saan a pisikal a langa ti pakarukodan ti maysa a tao, saan kadi?

Iti dayta a Biernes Santo, nagmanto ti langit kaniak.

Napanak iti igid iti baybay tapno iyaw-awanko dagiti dagensen ti barukongko ngem kasano a malipatak ti babai a nasursurok nga ayaten iti nalimed?

Naglabas dagiti bulan a diak napupuotan. Nakaawatak iti text manipud ken ni Pretty Anne.

“Hi Rodel, andito me sa Pangasinan.  D2 me napangasawa. Ikaw mzta na?  Ano ginagawa mo ngaun? Nagasawa k na rn ba?  Pwde ba mag-fren na lang tau?”

“Kyln ka napnta jan?” sinaludsodko.

“Kinaumagahan ng Linggo,” insungbatna.

Ad-adda manen a nariknak ti panakalemmes, Manong Danny.  Namrayak laengen ti nagsennaay.

Iti sumuno nga aldaw, adda manen teksna:“Masarap pala mi asawa lalo kng lagi magkasama sa kama. Ikaw, kmusta k na ngaun, gud mrning na lng sau.” 

Apay nga adda babai a kas ken ni Pretty Anne, Manong Danny? Adda gayam babai a manangikulbo. Adda gayam mangay-ayam a babbai a kasla ketdin pakaragsakanda ti mangipas iti rikna ti maysa nga agraem kadakuada.

Ala kastan, Manong Danny, Ditoyen ti pangigibusak iti suratko kenka. Sapay koma ta addanto met la masarakak a babai a mangipatpateg kaniak iti baet dagiti adu a pakapilawak.

Toy pagayammo

           Rodel

            Santa Cruz, Ilocos Sur