Footer

SALAYSAY: ITI INDAYON NI LAGIP: Sulisog (Tuloyna)

Kalpasan ti dua a lawas manipud adda napasamak iti nagbaetanmi ken ni Jim, simmangpet ni lakayko.  Naamirisko ti dakkel a nagbasolak iti asawak. Sinidirnak ti konsensiak.  Agbabawiak iti kinalupoyko ngem saankon a maisubli pay dagiti napasamak.

Nagpakadaak kenkuana a sumbrekak a katulong iti ili ti Santa Lucia.  Dinak  palubosan ngem impettengko ti kayatko. Ngem kinapudnona, diak kayat ti agtalinaed iti balay ta al-aliaennak ti panangliputko iti asawak.

Kunada nga awan ti sekreto a saan a lumtuad. Naammuan ni lakayko kaagiti tsismosa iti lugarmi ti panagpukawko iti tallo nga aldaw.  Pinagawidnak idiay balaymi.

“Agpudnoka! kinunana. “Pudno ti nadamagko nga adda kinasinnarakmo a lalaki idiay Candon ket nagdennakayo iti tallo nga aldaw?”

 “S-saan nga agpayso dayta!” inlibakko.

  Dua a tungpa ti nagdisso iti rupak.  Urayak la naariweng iti pigsa ti dakulapna a nagdisso iti agsumbangir a pingpingko.  Iti pungtotna, imbarsak ni lakayko amin a mapidutna.  Imburang-itna pay dagiti alikamenmi. Namrayak laengen ti nagsangit iti suli.

Manipud idin, patinayonen a mabartek ni lakayko. 

“Rinabii met laengen a mabartekka,” nakunak. Inatibayko iti iseserrekna iti kadaklan ngem inwalinnak.

“Dinak sagiden. Saanko a masapul ti tulongmo,” kinunana ketdi.

Nagtarus iti kuartona. Imbaltogna lattan ti bagina iti papag. Nagwasangwasang. Madamdama, nakaturogen.

Awanen daydi sigud nga urnos ti pamiliami.  Inaldaw ti dimi panagkinnaawatan. Napukawen ti panagtalekna kaniak. 

Agyamanak ken ni Elma gapu iti ibaballaetna tapno maurnos ti marpuogen a pamiliami. Iti sanguanan ti kapitan ti barangay,  immannugot ni lakayko nga agtiponkami met laeng. Impagpagapuna siguro kadagiti annakko.

Ngem saanen a kas iti dati a naragsak ti panaglinnangenmi ken ni lakayko. Nagbalin a natamnay kaniak. Sabalin ti pagiddaanna. Masapa a rummuar iti balay ket rabiinton no sumangpet a kaaduanna a nakainom.

Ngem saanko a mapabasol ni lakay. Ammok nga adda dagiti kanito nga agay-ayam iti suli ti panunotna ti panagpukawko iti tallo nga aldaw. Saanna a malipatan nga iti maysa a tiempo, liniputak ti kinalalakina.  Dakkel ti sugat nga impalayko kenkuana iti diak pannakasarked iti sulisog ti lasag.  Wen, Manong Danny, dakkel a biddut ti naaramidko a nakaigapuan ti pannakapukaw ti panagraem ti asawak kaniak.  Agbabawiak man ngem namansaakon ti nagan ti pamiliami. 

Nagtuloy dagiti dimi panagkinnaawatan. Nagbalinkami a kasla aso ken pusa nga agnginnernger iti bassit laeng a biddut ti maysa.

Idi diak masarkedanen ti kasta a kasasaadmi, nagpakadaak a mapan idiay Manila agsapul ti trabaho.  Dinak inggawid. Kasla awan aniaman kenkuana no agawidak pay wenno saanen.

Nakastrekak a sales lady iti maysa a pagtagilakuan. Nababa ti sueldo ken nangina ti upak iti pagkaseraak ket awan ti maurnongko nga ipaw-itko para kadagiti napanawak iti probinsia.

Nagsurat kaniak ni Elma: masansan kano a mabartek ni lakay ket nabaybay-annan dagiti annakmi. 

Nakagatko ti bibigko, Manong Danny tapno saan a matnag ti luak. Ammok ti pagkaskastaan ni lakay. Ngem apay a dinak ikkan iti gundaway a mangsulnit iti nagbasolak? Nagbiddutak, wen. Ngem dinak la kadin mapakawan?

  (Maigibusto)