Footer

SALAYSAY: Iti maika-250 a tawenna, Arkidioses ti Nueva Segovia nagtalinaed a natibker (Tuloyna)

Kinuna ni Apo Salgado a no adda man maymaysa a balikas a mangibaga amin dagitoy, isu ti "panagyaman”. Ta tumibtibker latta ti pammati ken linnangen ti gobierno ken simbaan.

Inyarig pay ni Apo Salgado ti gobierno ken simbaan iti riles ti tren.  Dagitoy ti mangaw-awit kadagiti tattao a nakalugan iti tren.  Saan dagitoy nga agtupa no di ket agbinnayabayda a mangsaluad ken mangtapaya kadagiti tattao.

Pinasingkedan met  ni Mayor Singson-Medina bayat iti panagbitlana ti nasinged a langenlangen ti simbaan ken ti gobierno. Ti panagbinnulig ti simbaan ken ti gobierno ti siudad iti pannakaselebrar iti maika-250 a tawen ti Nueva Segovia ken ti siudad ti Vigan ti mangpaneknek iti kinalagda dayta a panaglangen. 

Kinuna pay ni Mayor Singson-Medina a ti panagtipon ti napalabas ken agdama ket mangipaay iti pagsayaatan dagiti umili.

“Maparmek dagiti adu a karit ti panawen… impapatitayo ti pananggun-od iti pagsayaatan dagiti agindeg iti Vigan ken Nueva Segovia… agkikibintayo ita a mangsurot iti dalan nga iturong ti Apo,” kinuna ni Mayor Singson-Medina.

Inladawan pay ti mayora ti panagtinnulong ti dua a benneg a kas iti umbilical cord ti ina iti ubing.

Naminsan pay a naibasa ti dekreto ti Ari ti Espania a namagbalin ti Vigan kas Siudad Fernandina de Vigan.

Iti met biang ni Mayor Pascual, kinunana a saan a panangisuko no di ket maysa a panangipakita iti respeto ken kinatulnog iti eklesiastika iti panangiyawatda iti simboliko a krus iti Nueva Segovia.

Kinuna ti mayora a ti iyaayda iti siudad ti Vigan ket panangitultuloy iti pagrebbenganda iti katolisismo.

Kinuna ni Mayor Pascual a nalukay ti riknada iti panangipaimada iti krus kadagiti Biguenio “iti nagan dagiti umili ti Cagayan, nangruna iti Lallo, ” idinto nga inyunay-unayna nga “iyawatko ti replika ti kina-ebanghelio ti krus kas simbolo iti suporta dagiti umili ti Lallo, Cagayan iti dioses ti Nueva Segovia.”

Kinuna ti mayora nga inaramidda ti rebbengenda kas katoliko a mangipatpateg iti katolisismo,  ket “pakalaglagipanyo daytoy kadakami iti Lallo which is the former Ciudad de Nueva Segovia.”

Dagiti Aktibidad

Kas kinuna ni Mayor Eva Marie S. Medina, saanen a maulit pay daytoy a pagteng  iti daytoy a henerasion agsipud ta no adda man dagiti sumarsaruno a panagrambak, isayangkatto dagiti sumarsaruno a kaputotan.  Innayon ti mayora  nga aramidenton dagiti “appoko” ti parambak ti sumaruno a 50 wenno 100 a tawen.

Tapno ad-adda a namaris ti parambak,  adda dagiti naangay a gannuat a saan laeng a makatulong iti agdama no di pay agpaay a pakalaglagipan dagiti sumaruno nga annak kas iti pannakaimula ti 2,500 a seedlings iti amin a barangay ti Vigan City. Naisayangkat daytoy kas pangsaluad iti aglawlaw, ken dedikado ken napasnek a panangaywan iti natural a kinabaknang ti aglawlaw.

Naaramid pay ti panangbirok iti umuna a maipasngay a maladaga iti Setiembre 7, 2008.  Naited ti pammadayaw ken ni Derick Dinand Borilla ti Cabaroan Daya, Vigan City a  naipasngay iti alas singko iti agsapa iti Setiembre 7. Saan laeng binisita dagiti city officials, impaayanda pay ni ubing a Derick iti regalo kas iti scholarship grant iti University of Northern Philippines.  Kayatna a sawen, nakaseguron ti panagbasana manipud iti pre-school agingga iti kolehio nga awan ti bayadanna.  Siguradon ti naraniag a masakbayanna.

Nainaguraran met iti daytoy nga aldaw ti Buridek  Museum, kaunaan a museo  dagiti ubbing iti Ilocandia ken maikatlo iti Filipinas. Kangrunaan a panggep iti pannakaipasdek daytoy ti  pannakasuportar iti intellectual curiosity dagiti ubbing babaen iti cultural conservation approach.

Daytoy ti agbalin a balay dagiti ubbing tapno dida malipatan ti kultura ti maysa nga Ilokano.

             (Adda tuloyna)