SALAYSAY: Kannawidan Ylocos Festival: Uppat a Tawenen a Mangitantandudo kadagiti Kultura ken Tradision ti Ilocos Sur (Maudi a paset)

Iti maudi nga aldaw ti Kannawidan, naisayangkat met ti agduduma a tradisional nga ay-ayam kas iti kadang-kadang, ginnuyodan iti tali, sinnippawan iti itlog, sack race, palo sebo ken tinniliwan iti burias.

Iti malem, napno ti Quirino Grandstand kadagiti tattao a agbuya iti lumba ti kabalio. Napigsa a riaw ken sipsipat ti impabalonda tunggal agiskape dagiti kabalio a sinakayan dagiti lokal a horse jockeys wenno kabalieros.

Iti rabii ti Pebrero 6, pinadayawan ti gobierno probinsial ti Ilocos Sur dagiti kapintasan a sarsuela ken kalaingan a nagakem iti maikadua a Zarzuela Ilocana Festival.

Napili kas Best Story ti “Dana a Kasiitan” a sinurat daydi Barbaro Paat ken imparang ti Paat Dramatic Troupe. Napili met ni Myrna Fabie kas Best Director babaen ti “Bay-am ta Agsagabaak Gapu ken Ayat” nga impabuya ti Solid North Production. Inyalat met ti AVQ Vaquilar Dramatic Troupe ti dua a pammadayaw teknikal babaen ti Best in Musical Scoring ken Best Art Direction.

Iti indibidual a pammadayaw, napili kas Best Actor ni Reynold Reyes (“Dana a Kasiitan” ti Paat Dramatic Troupe) idinto a Best Actress ni Zyra Astrologio (“Bay-am nga Agsagabaak Gapu ken Ayat” ti Solid North Production).

Inyalat met ni Mike Quitoriano (“Supapak ti Kinadawel ni Ayat”  ti AVQ Vaquilar Dramatic Troupe) ti Best Supporting Actor Award ken Lita Lopez (“Bay-am nga Agsagabaak Gapu ken Ayat” ti Solid North Production) ti Best Supporting Actress Award.

Best Male Child Actor ni Christian Aruejo (“Agbabawika ngem Naladawen” ti PTJ Production); Best Female Child Actress ni Justin Faye Ragasa (“Dana a Kasiitan” ti Paat Dramatic Troupe); Best Male Comedian ni Wilson Rabena (“Dana a Kasiitan” ti Paat Dramatic Troupe) ken Best Female Comedian ni Rosa Romano (“Bay-am nga Agsagabaak Gapu ken Ayat”  ti Solid North Production).

Immawat amin dagiti nangabak iti tropeo ken premio a kuarta manipud iti gobierno probinsial a nangesponsor iti maikadua a Zarsuela Festival. Buklen ti akademia, media, kapitolio, local artists ken dagiti opisial ti probinsia dagiti kameng ti hurado itoy a pammadayaw a maipaay kadagiti aktibo pay a grupo dagiti sarsuelista iti Ilocos Sur.

Iti panagsarita ni Vice Gov. Deogracias Victor “DV” Savellano, kinunana a ti pannakaisalakan ti sarsuela iti pannakapukawna ti kangrunaan a gagem ti awards night.

Kalpasan ti pammadayaw, kinasarita a dagus ni Vice Gov. Savellano dagiti sarsuelista nga isaganadan dagiti ipabuyada para iti maikatlo a Zarzuela Ilokana Festival a mairugi itoy a kalgaw a pakapilianto manen dagiti kapipintasan nga istoria ken agakem.

Dinawat met ni Jerome Vaquilar, mangidaulo iti AVQ Vaquilar Production kadagiti padana a sarsuelista a lipatendan ti panagkikinnupetensia ket ipamaysada a parangrangen daytoy a literatura.

Naipabuya pay ti maysa a zarzuela iti maudi nga aldaw ti kannawidan kas panggibus iti makalawas a ragragsak. Nairaman kadagiti nagpabuya ti bise gobernador ken dagiti napili nga empleado ti kapitolio. Maysa pay daytoy a wagas tapno maipasagepseep iti panunot dagit umuli ti kinapateg ti zarzuela iti biag ni Ilokano.

Nangabak iti agkakadakkel a premio dagiti nagbuya a napagasatan iti pabingo ken raffle draw.

Malaksid kadagiti naisalaysay, saan met a nailaksid ti pannakipartisipar dagiti artista iti Kannawidan Ylocos Festival. Karaman dagiti nangparagsk kadagiti nagbuya da Blackjack ken kakaduana a komediante, Karylle ken Jimmy Bondoc, Derek Ramsey ken John Pratts, ken dagiti banda a Kamikazee ken Spongecola. Nagbalin dagitoy a bonus kadagiti nakipagpaset tapno lalo pay a nakalallagip ti selebrasion ti Kannawidan Ylocos Festival.

Amin dagitoy, mangipakita ti panagballigi ti Kannawidan Ylocos Festival kas lumatlatak a parambak saan laeng a ditoy probinsia no di ket iti sibubukel a pagilian. Kas ipakita ti kaadu dagiti nakipartisipar, nagbuya ken nakipagragragsak, saanen a mailibak ti agtultuloy a panaglatak ti Kannawidan Ylocos Festival kas maysa nga atraksion ti turismo ken kultura itoy a deppaar ti Kailokuan.#