SALAYSAY: Kannawidan Ylocos Festival: Uppat a Tawenen a Mangitantandudo kadagiti Kultura ken Tradision ti Ilocos Sur (Tuloyna)

Naangay pay itoy nga aldaw ti salisal iti panagpinta ken panagdisenio, slogan making contest, kasta metten ti danga-dang ken saririt a pakairamanan ditan ti quiz bee, on the spot Ilocano poem writing contest ken dadduma pay. Naiyawat ti premio dagitoy iti kamalmanna a pannakaangay ti  SIGLAT ESKWELA a nakapilian ti Alilem Elementary School kas Safest Elementary School; Pudoc Elementary School, San Vicente kas Best Managed School Canteen ken Las-ud Elementary School, Tagudin kas Best PTCA. Napadayawan pay itoy nga okasion dagiti Outstanding Boy Scouts ken Girl Scouts.

Dagiti met annak ti Ilocos Sur a nakaited iti pammadayaw ken nagballigi iti pilida a tay-ak ti narekorgnisar iti Fr. Jose Burgos Achievement Awards a naangay iti karabianna. Siam a mabigbig nga Ilocos Surian ti pinadayawan ti gobierno probinsial itoy kangatuan a pammadayaw a maipaay iti annak ti Ilocos Sur kas pangbigbigna iti panagballigi dagitoy.

Naiyawat ti tropeo kada Cirilo Lao (business); DPWH Secretary Rogelio Lazo Singson,  (Engineering and Construction); Atty. Emil Jurado (Journalism); Dr. Leocadio Sebastian (Agri-culture and Research); Grace Urbien Salvatus (Academe); Gen. (ret.) Diomedio Villanueva (Military Services); Clemencia Parde (Food Processing Industry); Mary Ann Armovit (Music) ken Department of Finance Cesar Purisima, (Public Accountancy).

Iti awarding ceremony, kinuna ni Vice Gov. Deogracias Victor “DV” Savellano a ti nadakamat nga award ti kangatuan a pammigbig nga ipaay ti gobierno probinsial kadagiti maipagpannakkel a taga-Ilocos Sur. Nupay kaaduanen kadagiti awardees ti agnaeden iti sabali a lugar, agsublida nga agsubli iti nakayanakanda a daga gapu iti daytoy a pammadayaw.

Daytoyen ti maikapat a tawen a marekognisar dagiti achievers a taga-Ilocos Sur sipud naipasa iti sangguniang panlalawigan ti resolusion a mangpadayaw kadagiti illus-trious sons and daughters ti probinsia tunggal Kanna-widan Ylocos Festival.

Saan met a naawan ti panag-pabuya dagiti opisial kas siguden a maar-aramid iti tinawen. Tinapatan da Vice Gov. Savellano, dagiti bokal ken dadduma pay nga opisial dagiti agbuybuya babaen ti kankanta. Mangipakita a saanda laeng a nalaing nga agpanday linteg no di pay ammoda met ti mangray-aw kadagiti tattao nga iturayanda.

Naisaruno ditoy ti panagsasalip dagti lokal a banda a nangipangeganda saan laeng a dagiti Original Pilipino Music (OPM) ken Ilocano songs no di pay ti bukodda a komposision. Malaksid kadagiti napili a kalaingan a banda, naipaayan pay iti premio dagiti nagbalin a Best Guitarist, Best Vocalist, Best Drummer ken Best Original Composition.

Naiparada dagiti nagkauna a military jeep  ken bisikleta iti bigat ti Sabado, maikanem nga aldaw ti parambak. Nagrikus dagitoy iti Metro Vigan tapno iparangda no kasano a napapintas ken napagtalinaedda dagitoy iti laksid ti kinadaandan.                   Iti rabii, nakoronaan kas Saniata ti Ilocos Sur itoy a tawen ni Dorothy Joy Pagurayan ti ili a Sinait bayat ti pageant night. Inawat ti balasang ti premio a P50,000, libre a trip to Bangkok ken ibagiannanto ti Ilocos Sur iti sumaruno a Miss Philippines. Napili pay isuna kas Best in Gown idinto a ti designerna a ni Danica Damo ti napili kas Best Designer.

Napili met kas Saniata ti Ilocos Sur Tourism ti taga-Bangui, Ilocos Norte a ni Juliane Aurine Flores idinto a ni Diana Rose Santos manipud iti Batac, Ilocos Norte ti nangiyalat iti korona ti Saniata ti Ilocos Sur Environment. First Runner-up ni Diane Bernardo ti San Juan, La Union ken Second runner-up ni Daniella Jose ti Caoayan.

Naited met ti gundaway ken ni Nancy Palomares ti San Ildefonso a mangirepresentar iti Ilocos Sur iti sumaruno a Ms. Tourism Intercontinental kalpasan a naited kenkuana ti Ms. Tourism Intercontinental Philippines award.

Iti minor awards, napili kas Miss Congeniality ni Daniella Jose; Miss Talent ni Diane Bernardo; Ilocanos’ Choice ni Jennylyn Deluria (Dagupan City); Best in Swimsuit ni Diane Rose Santos;  ken Miss Photogenic ni Juliane Aurine Flores.

Sakbay ti koronasion, pinagsapata ni Vice Gov. Deogracias Victor “DV” Savellano dagiti opisial ti kabuangbuangay nga Ilocos Sur Designers Guild. Kinuna ni Savellano a maysa metten daytoy a wagas tapno madiskobre ti talento dagiti local designers ken maitandudo dagiti lokal a produkto ti ilocos Sur a maaramat ti panagdisenio.

(Adda tuloyna)