SALAYSAY: Kasano kapudno dagiti politiko iti partidoda? (Maikadua iti tallo a paset)

Ngem iti panagsalip da Vice President Joseph Estrada ken ni House Speaker Jose de Venecia para iti kinapresidente idi 1998, naisualit ni de Venecia. Nupay kasta, nangabak ni Sen. Gloria Macapagal-Arroyo a kas presidente.

Kas ninamnama, kasla uong a nagtubo dagiti “kulibangbang” iti aglawlaw ti partido ni Estrada a Partido ng Masang Pilipino (PMP) ket naipatakder ti sabali pay a koalision.

Ngem iti pannakapadisi ni Estrada iti puestona babaen ti rebolusion iti Edsa ken iti pannakaipatugaw ni Vice Pres. Gloria Macapagal-Arroyo a kasukatna, bulon metten ti irarangpaya ti partidona a Kampi babaen ti pannakikoalision ti Lakas-NUCD ni Ramos ken ni de Venecia. Bayat ti administrasion ni Arroyo, in-inut a nagbalin a dominante ti partidona babaen ti suporta dagiti dadduma a babassit a partido.

Iti eleksion idi 2007, napaliiw ti panangraut dagiti kapartiduan ni Pres. Arroyo iti partido Lakas-NUCD babaen ti panangallukoyna kadagiti lider daytoy a  partido a tumipon wenno agkandidato iti babaen ti wagayway ti Kampi. Kadagiti dadduma a probinsia, sinango dagiti kandidato ti partido Kampi dagiti opisial a kandidato ti Lakas-NUCD iti baet nga agpada dagitoy nga adda iti babaen ti tiket ti administrasion.

Iti laengen distrito ni de Venecia, taga-Kampi ti kapigsaan a kinabalubalna para iti kinadiputado iti baet nga ipetpetteng ti Malakaniang a suportado iti House Speaker. Iti imatang dagiti agpalpaliiw iti politika, maysa daytoy a panangpadas a mangtippuog iti liderato ni de Venecia tapno bumilbileg pay ti partido ti Presidente. Posible a nasirip daytoy ni de Venecia ngem mabalin a kinutina laeng ti abagana gapu ta nagkammatalek a saan nga ibbatan ni Pres. Arroyo a kaaliadona.

Dagiti simmarsaruno a pasamak ti mangpaneknek a nagbiddut ni de Venecia iti panangipapanna ken nagtalek unay.

Nalawag dagiti pagilasinan iti pader a kayat dagiti kaaliado ni Pres. Arroyo a patapuaken ni de Venecia iti puesto.

Kalpasan ti eleksion idi 2007, di pay napudotan no ar-arigen dagiti agilinlinteg iti tugawda, nairusat ti tignay a  panangtippuog iti liderato ni de Venecia iti Kamara babaen ken ni Diputado Pablo Garcia ti Cebu.

Saan a nagballigi daytoy a tignay ta saan nga intuloy da Garcia ti panggepda. Nakuentada ngamin nga agkurangda iti numero a mangpaksiat ken ni de Venecia.

Ngem iti panangibulgar ni Joey de Venecia nga anak ti Speaker nga adda mapapati a pannakaibiang ni First Gentleman Miguel Arroyo iti kontrobersial a National Broadband Network deal, naparnuay ti ganna iti relasion iti nagbaetan ni Pres. Arroyo ken ni de Venecia iti baet dagiti balikas ti administrasion a solido ti suportana iti speaker.

Manen, nagkammatalek ni de Venecia iti pammatibker ti Presidente uray idi naglusulos ti maysa nga anak ti Presidente a kas kameng ti Lakas-NUCD ken ti mapapati a “panangkaradap” dagiti kaaliado ti Presidente babaen dagiti dua a diputado nga annakna ken ti kabsat ni First Gentleman Arroyo kadagiti kameng iti Lakas para iti pannakasukatna a kas speaker ken iti pannakaikkatna a kas dadaulo ti partido Lakas.

Ket idi dupagen ti napigsa a tignay a mangisualit kenkuana manipud iti puestona, nagtignay ni de Venecia tapno salaknibanna ti puestona. Ngem naladawen ti panagtignayna ket saanna a nadaeran ti arrabis dagiti tinaltalekna a kaaliadoda ken ni Pres. Arroyo.

       (Adda tuloyna)