SALAYSAY: Kasano kapudno dagiti politiko iti partidoda? (Umuna iti tallo a paset)

IDI pumigpigsa dagiti timek a mangiyik-ikkis iti pannakairuar ti kinapudno mainaig kadagiti anomalia a mapapati a nakaisawsawan ti Presidente ken ti pamiliana, nangruna iti National Broadband Network deal, nagsasaganad dagiti “unity walk” nga insayangkat ti Malakaniang tapno maipakitana ti kaadda ti panagtitipkel dagiti kaaliado ken mangsupsuporta kenkuana.

Addayta ti unity walk nga inwayat ti Malakaniang kadagiti kamengna ti Gabinete tapno ipaneknekna nga awan ti kinapudno ti damag a sumagmamano a dadaulo ti gobiernona ti agpangpanggep nga aglusulos iti takemda.

Simmaruno ti unity walk babaen dagiti kameng ti Kamara kas pammatalged met dagiti diputado iti suportada iti Presidente iti sanguanan ti eskandalo a pinarnuay ti  broadband network.

Saan met a nagpaatiw dagiti dadaulo dagiti soldado ken kapolisan ti pagilian, nagsasanggolda iti takiag a nagna kas panangipakitada iti panagmaymaysada (kano) a mangsuporta iti commander-in-chiefda.

Di nagpaudi dagiti gobernador ken mamayor, nagdudupudopda iti Malakaniang tapno iwayatda met ti kabukbukodanda a unity walk tapno ibandoda iti sangapagilian nga iti sanguanan dagiti agsasaruno a protesta iti Kamanilaan, kadakuada a provincial leaders, ni Pres. Arroyo ti kasayaatan pay la a mangituray agsipud ta dimmur-as ti ekonomia iti babaen ti administrasionna ket adu a grasia ken pagimbagan ti nagtarakitik kadagiti probinsia nga iturayanda.

Kastoy met laeng ti kayat nga iwaragawag dagiti opisial ti barangay ta napanda met nag-unity walk iti Malakaniang a nangipasingked iti sangsangkamaysa a suportada ken ni Pres. Arroyo.

Maymaysa ti kayat nga ipaawat ti Malakaniang babaen dagitoy a unity walk: uray kasano kapigsa dagiti timek dagiti nadumaduma a grupo iti Kamanilaan a mangiyik-ikkis iti panagikkatna iti puestona gapu iti alegasion nga awanen ti kaimudinganna a mangituray iti pagilian, saanto nga agballigi dagitoy a tignay agsipud ta adda iti likudanna dagiti diputado, gobernador, mayor, barangay officials ken dagiti nangangato nga opisial ti militar ken kapolisan.

Ngem masaludsod: Kasano kapudno kenkuana dagiti agilinlinteg, provincial, municipal ken barangay officials? Manamnama kadi ti Presidente ti sibubukel a loyalidad dagitoy inton awanen ti masiripda a pagimbagan manipud kenkuana, no maipasungalngal iti peggad ti pannakapadisi wenno inton awanen ti bilegna kalpasan ti ibababana inton 2010?

Taldiapantayo ti historia  dagiti partido iti pagilian.

Idi panawen ti diktaduria ni dati a Presidente Ferdinand E. Marcos, inalun-on ti Kilusang Bagong Lipunan dagiti nadumaduma a partido. Idi napadisi ni Marcos, timmapuak dagiti kamkameng iti lumlumned a bapor ti KBL a nagtungpal iti pannakarpuogna ket simmublat a nagpayagpag ti partido ni Pres. Cory Aquino a naipatugaw babaen ti “rebolusion dagiti umili”. Kasla simutsimot dagiti dadaulo dagiti nadumaduma a partido a dimket  iti “lawag”, madadaan nga agpasag iti nagan ti “panagkaykaysa”. Kasla tagapulot ni Pres. Aquino a binunar dagiti nadumaduma a partido.

Kalpasan ti panagtakem ni Pres. Aquino, ni Fidel Ramos ti pinilina a mangituloy iti programana. Ditoy a naipasngay ti partido Lakas-NUCD a nagbuligan nga impasdek da Ramos ken ni House Speaker Jose de Venecia. Iti babaen ti rainbow coalition, kasla batombalani dagiti nadumaduma a partido a dimket iti Lakas-NUCD tapno makibingay iti “tinapay” nga agtaud iti administrasion ni Pres. Ramos.

   (Maituloyto)