SALAYSAY: Kaunaan a lumba ti bisikleta iti Ilocos Sur: saan laeng a pang-sports, pangturismo pay

Inyalat latta ni Rolando Burgos ti umuna a puesto babaen ti orasna a 3 nga oras, 10 a minutos ken 19 a segundo. Maikadua a puesto ni Garillo (3 oras 10 a minutos ken 26 a segundo).

Kinuna ni Burgos a ti kinabeterano ken eksperiensana iti namindua a pannakisalipna iti Padyak Pinoy (2006-2007) ti  nagbalin a bentahena itoy a lap. Impalgakna a gapu iti kinaatiddog ti lap, inurnongna ti pigsana tapno saan nga agluba.

“No atidddog ti karera,  nasken ti panangmantiner iti body stamina,” kinunana bayat ti panaginanana ken dagiti padana a siklista. 

Inannugot ketdi ni Burgos a dina gamgamen a tagikuaen ti maikatlo a lap nga aw-awaganda iti killer lap gapu iti kaadu ken kangato dagiti dalan a sang-atenda nga agturong iti San Emilio gapu ta ad-adda a nasanay iti flat race ken lumakay metten.

Kas iti maikadua, mass start met laeng ti 50 kilometro  a Tagudin-San Emilio lap idi Mayo 2.

Naannayas ti lumba agingga a nagkakarambola a natulid dagiti lima a siklista iti paset ti Sta. Cruz. Iti laksid ti adu a gasgas ken garumiad, nagtuloy latta dagiti tallo idinto a naitaray iti Candon City Hospital da Carlo Gazmen a nabsil ti makinkanawan a sikona ken ni Jessie Riambon a taga Lira, San Juan a naawanan iti puot gapu iti pannakapilid dagiti sumarsaruno a siklista kenkuana.

Nai-confine ni Riambon gapu ta inagalna ti sakit iti tengngedna. Sinungbatan  amin ti organizers dagiti nagastosda ken mismo a ni Bokal Bonuan ti nangbantay kadakuada agingga a naibaga a nasayaaten ti kasasaadda. 

Kabayatanna, nasapa nga immadayo da Kevin Mendoza (16 anios)  ti Team Fire Red ken Dolar Lea (26 anios) ti Team Maroon ket isuda ti lead sakbay a makadanonda iti ili a Sta. Lucia. Didan pinalusposan pay a makamatan ida ti chase team a pakaibilangan ni Burgos.

Iti laksid ti kinarigat ti agsang-at ken sikkosikko a dalan nga umuli, immanayen ti  kaadayo ti distansiada tapno iyalat ni Mendoza a taga-Quinarayan, Narvacan ti umuna a puesto ken  ti titulo a king of the mountains. Maikadua ni Leal ti Balingaoan, Candon City. Nagpuesto iti maikatlo ni Jason Aquino ti San Pedro, Narvacan idinto a maikapat ni Burgos.

Iti maudi nga aldaw ti lumba,  inyalat ni Jemico Brioso  17, ti Lungog, Narvacan ti 70 kilometro a San Emilio-Vigan lap. Nupay kasta, saanen a naapektaran pay ti oras ni Burgos.

Kalpasan a madagup ti oras dagiti siklista, naideklara ni Rolando Burgos kas ari ti kaunaan a Lumba ti Ilocos Sur ket inyawidna ti P20,000 a premio. Maikadua ni Jason Garillo, ken maikatlo ni Kelvin Mendoza. Adda iti maikapat agingga iti maikasangapulo a puesto da Jason Aquino, Ryan Serapio, Dolar Leal,  RJ Pescador, Jemico Brioso, Carlo Gazmen ken Leonardo Palor Jr.

Iti team standing, immuna iti standings ti Team Maroon. Inyawidda ti premio a P40,000. Maikadua ti Team Fire Red ken maikatlo ti Team Dark Yellow.

“Itoy a panangabakko ipakitana a kabaelan pay laeng dagiti kas kaniak a nataengan ti agballigi iti tay-ak ti sports basta la ketdi awan ti bisio,” kinuna ni Burgos.

Innayonna a saan a makaanay ti kinapartak nga agpedal tapno mangabak ngem kangrunaan ti estratehia ken puso tapno agballigi.

“Para iti pamiliak daytoy. Kalpasan daytoy, agsubliak manen iti panagkarpinterok,” agkatkatawa a kinuna pay ni Burgos a maysa nga allawagi. 

Gapu iti naballigi a pannakairussuat ti kaunaan a LUMBA TI ILOCOS SUR, kinuna ni Bokal Bonuan a mapasarunuan daytoy inton umay a tawen ken at-atiddogto pay no malpas ita a tawen ti Tagudin-Suyo-Cervantes-Quirino-San Emilio circumferencial road a mamagsisilpo kadagiti upland municipalities ti probinsia. Dakdakkelto ti karit kadagiti siklista agsipud ta ad-adu dagiti sang-atan iti dalanen dagiti siklista iti probinsia a pakairamanan ti Bagolandia, Bessang Pass, Yamashita Cave, Skyline View Deck ken dadduma pay a ecohistourism destinations iti Ilocos Sur.

Impalgak pay ti bokal a kalpasan ti tallo a tawen, mabalindanto metten nga ilukat ti torneo para kadagiti siklista manipud iti Ilocos Norte, La Union, Pangasinan ken uray pay iti Abra tapno agbalin nga Open daytoy. Dakkel ti panagtalek dagiti opisial ti Ilocos Sur nga addanton naan-anay a pannakasanay dagiti siklista ket  makibinnalubaldan iti kinasiglat kadagiti agkakalaing a siklista ti pagilian.#   

 

SALAYSAY: Kaunaan a lumba ti bisikleta iti Ilocos Sur: saan laeng a pang-sports, pangturismo pay

Kas tarigagay dagiti opisial ti Ilocos Sur nga adda mapa-tanor ti probinsia a nalaing a bumibisikleta a mabalin a mangdomina kadagiti national ken international cycling competitions iti masakbayan, insingasing ni Bokal ken sportsman Jose Bonoan Jr. ti pannakaangay ti provincewide a lumba ti bisikleta a pagsa-salipan dagiti cycling enthusiasts ti probinsia.

Continue reading “SALAYSAY: Kaunaan a lumba ti bisikleta iti Ilocos Sur: saan laeng a pang-sports, pangturismo pay”