Salaysay: Madrigal Foundation: katulongan ti gobierno probinsia kadagiti proyekto

“Anghel iti rabaw ti daga,” dayta ti pangibilangan ita dagiti taga-Ilocos Sur iti naubing pay a milionaria (agtawen la iti tallopulo) ken pilantropo a ni Ma. Ferl Lalaine Madrigal, presidente ti MFLM  Foundation, gapu iti panangsupsuportana kadagiti proyekto ti gobierno probinsial ti Ilocos Sur. Adun ti naipaay ti MFLM Foundation nga idauluanna a pagsayaatan dagiti agindeg iti probinsia nangruna iti benneg ti salun-at.

Manipud nagam-ammo da Gob. Deogracias Victor “DV” Savellano ken ni Madam Lalaine iti maysa a pasken iti PNP Regional Office sadiay siudad ti San Fernando, La Union idi Agosto idi napan a tawen, nangrugi metten ti pannakikammayet ti MFLM Madrigal Foundation kadagiti medical, dental ken surgical missions iti probinsia. Adun a marigrigat nga umili iti  Ilocos Sur, nangruna dagiti agnaed iti upland municipalities ti nawarasan iti libre nga agas ken bitamina manipud iti Foundation. Uray dagiti kameng ti Media ditoy ket immawatda metten iti libre a bitamina manipud ken ni Madam Lalaine.

Instrumento pay ti pilantropo iti pannakagatang ti walo a baro nga ambulansia para iti Gabriela Silang General Hospital ken amin a district hospitals iti probinsia babaen ti installment basis a bayadan ti probinsia iti uneg ti lima a tawen iti 0% interest rate.

Idi Nobiembre 28, 2007,  nagpinnirma ti Foundation ken ti provincial government ti Ilocos Sur nga imbagian ni Gob. Savellano iti maysa a memoramdum of agreement (MOA) iti mismo nga opisina ni Madam Lalaine iti siudad ti Makati a nakailanadan ti itutulong ti immun-una kadagiti sumaganad a proyekto ti Ilocos Sur kas iti micro financing wenno panagpautang iti provincial government iti 4%   per annum para iti programa ti livelihood; edukasion ken public information,  pannakaingato ti kalidad dagiti mangisursuro babaen ti libre a training ken seminar, kasta metten ti panagtuloy ti scholarship program para kadagiti  nakurapay ngem nasaririt nga ubbing,  panagmula iti kawayan iti igid ti karayan ken mangrove iti kabaybayan nga agserbi kas proteksion iti pannakadadael dagiti lugar a dalanan ti danum iti benneg ti environmental protection, pannakaisayangkat ti panagsanay dagiti trainors ken coaches ken pannakaiyendorso ti  archery iti Ilocos Sur kas paset  ti sports development ken ti panagtultuloy ti Project KABSAT iti benneg ti social services ken public health.

        (Adda tuloyna)