SALAYSAY: Maymaysa ti ina

Kunada, namaris ti biag gapu ken ni nanang, wenno inang, wenno mommy, mama, mamang ken ania la ditan a pangawag iti dakkel a babai. Nagtaudan koma ti biag no saan a ni inang? Asino koma ti naasi a nangaw-awit iti anak iti siam a bulan iti saklolona sakbay a naipasngay? Kalpasan ti pannakaipasngay, akinbarukong ti pagturogan ni bebi kalpasan ti panaggatasna? Ti kamang ken sakduanna iti bileg ken puersa? Gayyem a pangibagaanna iti parikutna ken sidadaan a dumngeg iti amin a kanito?

Wen, maymaysa ti ina.

Maipalagip la ket ngarud kaniak ti maysa a naisangsangayan nga ina, ni Birhen Maria. Ni Birhen Maria ti kaindaklanan nga ina iti sangalubongan.

Kasla naipinta ditoy panunotko idi inawitna iti saklulona ni Hesus. Kadagidi a panawen, dakkel a pakababalawan ti maysa a babai nga agsikog nga awan ti asawana. Ngem imbaklay ni Birhen Maria amin dagiti pannakalais ken libbi tapno laeng matungpal ti padto a maysa a nasudi a babai ti mangiyanak iti Mesias a mangisalakan iti lubong.

Kasta met a naipinta iti panunotko ti maysa a buya iti Kalbario idi agtutuok ti Anak ket tangtangaden ti Ina ti anakna, awan ti mabalinna no di aglua. Sa idi ibabada ti bangkay manipud iti krus, idi arakupen ti Ina ti anakna a nupay anak ti Dios, dina sinamir ti nagtuok tapno laeng maisalakan ti managbasol a tao iti sangalubongan.

Malagipko met ita daydiay Mother Mary iti nalatak a kanta dagiti Beatles a pinutar ni Paul McCarthy: “When I find myself in times of trouble, Mother Mary comes to me/ Speaking words of wisdom, let it be. There will be an answer, let it be…”

Paboritomi a kansion daytoy aglalo no adda pakarikutanmi, no adda ipampanunotanmi iti sungbat kadagiti ngatangatami, kadagiti tiempo a kasaritami ti bukodmi a bagi. Dikayo ngata mamati ngem adda latta “words of wisdom” nga umappayaw kadakami. Adda latta dumteng a sungbat kadagiti pagparikutanmi.

Mamatikami a nagtaud dagiti “nainsiriban a balikas” manipud iti maysa nga Ina. Saanen a masapul a sukisokenmi ti kinaasino dayta nga Ina. Ngem mamatikami nga isu ti Nailangitan nga Ina. Ta kas kuna ti linia ti kanta: Mother Mary comes to me!

Ngem iti kansion ni Paul McCarthy, naammuanmi idi agangay a sabali a Mary ti dakdakamatenna: ti biological nga inana. Ti inana a mismo.

Ti nakaskasdaaw, sangapulo ket duan a tawen ti napalabas a pimmusay ti inana. Ngem gapu iti panagayat ti ina iti anak, nagsubli daytoy tapno itedna dagiti nainsiriban a balikas ken ni McCarthy.

Napasamak daytoy idi mangrugin ti panagsisina ti Beatles. Adda bukod a direksion a kayat ti tunggal maysa a turongen. Dayta ti parikut a di pakaturturogan ni McCarthy. Dina ammo ti aramidenna tapno saan a mawara ti grupoda.

Iti dayta a pannaturogna, natagtagainepna ti inana. Imbaga ti ina ti kansion a mamaglatak manen iti grupo. Imbagana a suraten ni Paul dayta kansion.

Ania ti kuna ti ina? “Be gentle, don’t fight things, just try and go with the flow and it all will work out.”

Idi makariing, bimmangon ni McCarthy ket nagtugaw iti sango ti piano. Apagbiit laeng a kinomposna ti kansion.

Nagbalin daytoy a kansion a dinto maumag.

Mabalin nga adu ti saan a mamati iti daytoy nga estoria ni McCarthy. Ngem makunami met: saantayo a tagibabaen ti panagayat ti ina iti anakna. Kayarigan ti ayat ti ina iti anakna ti maysa a silaw a mangpaksiat iti sipnget tapno di maidaleb daytoy iti daldaliasatenna a dalan.#