SALAYSAY: Naangrag a daga idi, nalangton a demo farm ita (Maudi a paset)

Ngem no ti yaadu ti bilang dagiti dinguen ti probinsia ti puntiria ni Gob. Savellano, ti met pannakaawan ti madi nga angot iti panagtaraken ti baboy ti  itantandudona, nangruna dagiti native a baboy wenno tay aw-awaganda iti kababoyan. Gapu ta ngalog laeng ti pagpakpakan kadakuada, awan ti angot iti kulungan malaksid a nganngani awan ti gastosda iti pagpakan.

Agit-itlog metten dagiti sasso ken tatadien a manok nga inggapuda sadiay Bacolod ken Iloilo. Nairanta a maiwaras dagitoy tapno adda nayon a pamataudan dagiti inna ti pagtaengan. Inawagan met daytoy ti gobernador iti Development of Various Breeder Seed Fowls. Pinagbalinda metten dagiti saan a maus-usar a pasdek tapno pagpaaduanda iti uong idinto a maysa pay a paset ti paspasayaaten ita ti PhilRice para iti “Palayamanan” model farm.

“Masapul ngamin a “back to basic” itan dagiti appo a mannalon. Imbes nga intay pay makitienda, agmulatayo laengen iti arubayan tapno adda libre a pagalaan iti nateng. Mapadarastayo pay a masolbar ti malnutrision iti Ilocos Sur,” kinuna ni Gob. Savellano.

Ita, kalpasan laeng ti apagsurok sangagasut nga aldaw, nalangton ken naberde ti  BArang-ay demo farm. Mang-rugidan nga aglako kadagiti nateng ken sweet corn a patanorda. Ditoy metten nga ang-angayen ni Gob. Savellano dagiti miting ken kaaduan a pasken ti kapitolio tapno ipakitana ti dakkel a nagbaliwan ti lugar. Ket sakbay nga aggawid dagiti bisita, aggatangdan kadagiti iyawidda a nateng.

Adda payen dagiti ekskursionista manipud Batangas, Bohol, ken dadduma pay a paset ti pagilian a pimmasiar iti BArang-ay. Dinaydayawda daytoy a proyekto ti Ilocos Sur.

Adda met latta dagiti parikut iti pannakatarawidwid ti  demo farm. Nupay adda walo a bubon a saan a mabbatan uray kangitingitan ti kalgaw, saan nga umdas dagitoy a mangsuplay iti danum iti sibubukel a lugar. Plano ngarud ita dagiti opisial a masimpa ti daan a pamupokan iti likud ti demo farm tapno agbalin a water impounding ken pagtaraknanda metten iti tilapia tapno agbalin a provincial fish hatchery. Babaen itoy, masupusopan ti panagkurang ti suplay ti sida iti Ilocos Sur idinto a mausar ti waste water a pagsibog kadagiti mula. Nagkomit metten ni Bureau of Fisheries and Aquatic Resources Regional Director Nestor Domenden a tumulong itoy a paset ti demo farm.

Ipakita ti BArang-ay demo farm a saan a balbalatong dagiti programa pang-agrikultura nga iwarwaragawag dagiti agtuturay ti probinsia tunggal panagbitlada. Kadagiti appo a mannalon iti probinsia ken uray dagiti saan a taga-Ilocos Sur, padasentayo ti pumasiar iti BArang-ay demo farm ta sumakdotayo iti adal sadiay. Malaksid iti dayta, adda latta kalutluto a sweet corn a sisasagana nga iparaman kadakayo da Gob. Savellano ken Dr. Soller bayat ti inkay panagpasiar iti aglawlaw ti demo farm.#