Footer

SALAYSAY: Naangrag a daga idi, nalangton a demo farm ita (Umuna a paset)

Manipud  naitanem ti industria ti kapas iti Kailokuan idi ngalay ti dekada ’80, in-inut metten a nabaybay-an ti ag-sangapulo ket innem nga ektaria a lote ti Phil Cotton iti Brgy. Labnig, San Juan, Ilocos Sur.

Nagtalinaed a naangrag ken nabaybay-an daytoy a daga  nga adda iti ima ti Departamento ti Agrikultura iti uneg ti agduapulon a tawen.

Iti panagdaliasatna manipud iti ilina a Cabugao nga agturong iti provincial capitol, dandani inaldaw a maimatangan ni Gob. Deogracias Victor “DV” Savellano ti lugar. Masayangan la unay iti lugar a saanen a matartaripato.

Kalpasan a nagtugaw ni Gov. Savellano kas  local chief executive ti probinsia itay napan a tawen, nakipinnirma iti Departamento ti Agrikultura tapno ti gobierno probinsial laengen ti mangtarawidwid ken mangpadur-as iti lugar. Kadua ni Gob. Savellano ni Dr.Cesar Soller, consultant on agriculture ti Ilocos Sur, a nangaramid iti plano tapno ad-adu ti pakausaran ti 16 ektaria a daga.

Rinugianda a sukayen ti nagkalaegan a daga idi Disiembre 2007. Biningbingayda ti lugar para iti agduduma a model farms kas iti pinakbet  farm a nakaimulaan ti agduduma a variety ti karabasa, tarong, kamatis, sili a pimmasayan, okra, utong, paria, petsay ken balangeg. Adda payen dragon fruit ditoy. Paset daytoy ti Development of Various Biological Scheme.

Adda pay  paset a namulaan iti sweet corn, sweet sorghum wenno bukakaw a mabalin a pagtaudan ti biofuel, sunflower, balatong, ken dadduma a nateng. Nagmulada pay iti marunggay, katuday ken papaya iti igid dagiti sinilong. Ita, nupay kalgaw, mangrugin a bumerde dagiti naintar a mula.

Adda pay binangonda a bassit a nursery tapno adda pagalaanda iti bunubon. Maysa pay a paset ti demo farm ti namulaan iti tabako babaen ti pannakikammayet ti National Tobacco Adminis-tration (NTA Vigan ken Candon). Iti igid ti alad, namulaan metten iti latex free a langka a ginatang da Gob. Savellano iti Teresa Orchard ni Zac Zarian iti probinsia ti Rizal. Tallo wenno uppat a tawen manipud ita,  agbunganton dagitoy.

Saan laeng a nateng ken kayo ti masarakan iti BArang-ay. Adda ditoy ti Ober Hasley, American ken Australian Boer a kalding a maiwarwaras iti tunggal ili a pakaangayan ti KABSAT outreach program. Paset daytoy ti programa ti gobernador a Development of Various Breeders Stocks wenno ti pannakaital-o ti puli dagiti kalding a native. Adda pay baka a Senopol a naggapu pay sadiay Chicago iti Estados Unidos.

        (Maigibusto)