Footer

SALAYSAY: Nakapudnoka idi napalabas a tawen?

Kasapulan a taliawentayo ti kalkalpas a tawen tapno amirisentayo dagiti nagbiddutan, nakaidaramudoman wenno nangitag-ay iti kinataotayo.  Saludsodentayo iti bagitayo no natungpaltayo dagiti inkaritayo nga aramiden iti isasangbay ti baro a tawen, kasta met nga analisarentayo dagiti nakaitibkolantayo a masapul nga aturentayo iti isasangbay ti tawen 2011.

Padasem ngarud a sungbatan dagiti sumaganad tapno maammuam no nakapudnoka iti bagim ken iti padam a tao iti napalabas a tawen:

1.  Managparaburka kadi? Naparsuaka a nakaukrad ti dakulapna. Nagtultuloy kadi a nakaukrad dagiti dakulapmo? Wenno nagbalinka a boxer a nakakaem ti gemgemna gapu iti ayatmo a nadardaras pay a makadanon iti tapaw ti arapaapmo a balligi, kinadur-as ken naraniag a masakbayan?

2. Mapnekkan iti klase ti biagmo? Mapnekka kadin iti agdama a kita ti biagmo?  Naragpatmo kadin ti balligi nga inar-arapaapmo? Kasano dagiti nakapaayam? Ngem ania man ti nadanonmo iti biag, nasursurom kada ti mapnek kadagiti simple a nagapuanam? Wenno nagukkonka iti ad-adu  ngem ti kasapulam ket awanen ti pagbibingayan dagiti nakurkurang ti gasatna ngem sika?

4.  Nakipasetka iti kagimongan? Pinilpilim kadi dagiti  pakilangenam? Ania ti nagbalin a takdermo mainaig kadagiti problema ti pagilian?  Ania met ti pagtaktakderam iti imatang dagiti tattao ken iti kagimongan a paggargarawam? Raraemendaka kadi wenno naikayda kenka gapu ta adda idaddadumam?

5. Managdillawka kadi? Mamatika kadi iti pagsasao nga uray ni Perfecto ket saanka a perpekto? Matengngelmo kadi ti dilam a saan nga agdillaw iti kinatao ti kalangenlangenmo? Nasursurom kadi ti mangitalimeng dita barukongmo aniaman a makitam a pagkurangan ti padam a tao tapno saanka a makasugat iti rikna?

8.  Adu kadi ti bisiom? Nasursurom kadi a gesdan ti bagim nga agbisio? Naamirismo kadi a kayarigan ti bisiom ti anay a mangkibkib iti pigsam, a no dimo parmeken, daytoy ti mangiduron kenka iti panungpalan? Maannugotmo kadi nga uray no baknangmo amin a baknang, dinaka maisalakan ti kuartam iti sakit a mangidalit kenka gapu iti bisio?

9.  Ammom kadi a taliawen dagiti empleadom?  Mairamanka kadi kadagiti  employer a dina ammo a kitaen ti pagsayaatan dagiti empleadona? A ti la kitkitaenna dagiti masepsepna a parabur wenno pagimbagan manipud iti ling-et dagiti trabahadorna?  Mamatika kadi a no ilalaem dagiti empleadom, raemen, isakitdaka met ken agtrabahoda iti amin a kabaelanda?

10. Agsusukot kadi ti utangmo? Karamanka kadi kadagiti nadaras a masulisog nga umutang uray ammom a narigatka a makabayad gapu ta naggastoka iti  nalablabes ngem iti matgedam?

11. Ammom kadi ti agyaman? Pinagbalinmo kadi a paset ti inaldaw a biagmo ti panangibisikmo iti panagyaman iti Dios kadagiti parabur a dimteng kenka? Annugotem kadi nga aniaman dagiti bendision ken grasia a naited kenka ket nagtaud iti Managparabur a Dios? Maibilangka kadi kadagiti parsua nga ammoda ti mangtaldiap iti likudanda ken ammoda ti agyaman iti Nalukay a Dakulap a nangtapaya kadakuada iti rigat ken pannakapaay, iti lulem ken leddaang, ken nangpatibker iti pakinakemda kadagiti nadagsen a pannubok a dimteng iti biagda?

No makapnek amin a sungbatmo kadagita a saludsod, ammomon no nakapudnoka iti padam a tao ken iti Namarsua iti napalabas a tawen!#