SALAYSAY: Our Lady of Lourdes: Apparition ti Nailangitan nga Ina (Maudi a paset)

Nagasat dagiti mabbasa kabayatan ti misa. Iti sibubukel a lubong, manmano ti pakapasamakan a mabbasa dagiti makimisa. Di kadi sabali nga eksperiensa daytoy a  banag? Apay ketdin nga agalen ti pannakabasa?

Tapno laeng makatalon dagiti mannalon, nasken a mabbasada  manipud iti agsapa agingga iti malem – mabbasada iti tudo no panagtutudo ken ling-et iti kainaran. Dagiti mangngalap, agpatpatnag wenno agmalmalem a makutoranda tapno laeng adda makalapda. Dagiti mangmangged, dagiti drayber ken konduktor, ken dadduma  pay nga adda iti sektor-trabaho ket agmalmalem no di man agpatpatnag nga anusanda ti maslep iti ling-et tapno laeng maisakadda ti pamiliada.

Di kadi nagasgasat dagiti deboto iti Siudad ti Baguio ta malamminda wenno mabbasada iti uneg laeng ti nasurok dua nga oras iti uneg ti sangapulo nga aldaw?

Ti Nainlangitan nga Ina ket isu ti Mediatrix of Graces. Mangibalballaet kadagiti grasia. Ngem no sawiren dayta nasurok dua nga oras a pannakarikna iti lam-ek wenno pannakabasa, kasano koma a maaramid ti “pagayatan ni Apo Jesus?”

“Aramidenyo amin a pagayatanna,” kuna ti Nainlangitan nga Ina, ngem no malamminkan ket nagawidkan, napanka nagkumeg idiay balayyo wenno nakitsismis wenno nakisiat iti kaarrubam ta kalam-ekna, kasano ngarud a maaramidmo ti pagayatan ti Mannakabalin?

Ti pannakaibalballaet ti kangrunaan amin a rason ti panagdebosion ken Ina Maria.  Ta adda aya met ina a mangbaybay-a iti anakna? Sidadaanto latta  nga umarakup ti ina. Arakupenna ti anakna. Andingayenna iti panawen ti rigat, iti panagtuok, ken aniaman a pakarikutan ti biag. Itedna amin a pagnam-ayan ken pakaisalakanan ti anak. Saanna a baybay-an. Isu ti ina ti amin.

Kas anak, asino kadi ti kaunaan a kamangam no panawen ti pannubok, saan kadi a ti inam? Kadagiti deboto, saan laeng a ti ina ti pagtaengan no di pay ti Ina a Nainlangitan.  Saraken ti imeng ni ayat kadakuada babaen ti bara ti pammateg ken panangilala.

Adda nabasak idi a maysa a pakasaritaan. Saan a naibaga no asino ti authorna. Ngem nupay adu dagiti nagputar kadagiti kakastoy a pakasaritaan, saan nga importante ti naganda no di ket ti pinutarda.

Ti istoria: Nadadaelen ti lubong. Panungpalanen. Natay aminen a tattao. Agiinnunan dagiti kararua a sumrek iti ridaw ti dakkel ken nadaeg a Balay. Ngamin, dandanin agserra daytoy.  No nagserran, awanen ti  makastrek pay.

Ngem adtoy ti maysa a kararua  a tumultulong pay laeng iti padana a kararua. Tulonganna dagiti nakapsut. Tulonganna dagiti maidugmam. Atibayenna dagiti marigatan a dumatag iti ridaw. Tumultulong a saanna nga ingginggina a marikpan iti ridaw. Unaenna ti sabali sakbay ti bukodna a bagi.

Dimteng ti kanito ti panagrikep ti ridaw. Awanen ti nakastrek pay a kararua. Tuktokda man a tuktok, saanen a malukatan ta dimtengen ti panawen a pannakaiyabut dagiti itta iti yakayakan. Dagiti saan a nakastrek, isuda ti silnaban ken lamuten ti apuy ket ditadan nga agnanayon. Dagiti adda iti uneg ti inaladan ket isuda ti agsagrap iti kinaagnanayon a kinaimbag.

Nairaman iti ruar ti  mannakitinnulong a kararua. Ngem imbes nga agpulkok, napan iti suli ket nagkararag ketdi ken Ina Maria. Nagpaaklolo ken nagpasaranay: “…toy anakmo, paaklolo, ti saranay nga itedmo. Siksika ti pagkamangak, ken sikat’ pakatayak…”

Natapik ti kararua. Timmaliaw. Ti Nainlangitan nga Ina!

“Saankan nga agsangit, anakko. Umayka, umiggemka iti imak…”

“Ina, nagrikepen ti ridaw ti Balay….”

“Wen, ammok dayta. Ngem iti kaanoman, saankayo a baybay-an nga annakko. Umayka, iti likud, darsem sakbay a magabay ti amin. Magnata iti tawa…”

No nakarikepen ti ridaw, adda pay laeng ti tawa a sumrekan. Kasta ti pammateg ti Ina a Nainlangitan kadagiti annakna.

Pasikenen ti debosion ti pammati. Saan a mailawlawag no apay. Maysa a nauneg a misterio. Misterio a ti laeng Nailangitan nga Ina ti makalansad!#