Footer

SALAYSAY: Panagkikinnaawatan ti mangsebseb iti apoy ti riribuk

No saan a maala iti nadiplomasiaan a wagas wenno masungbatan dagiti timmaud nga isyo iti nagbaetan ti North Korea ken ti USA, South Korea ken dadduma pay a nasion gapu iti panagitesting ti immuna kadagiti armasna a nuklear, posible ti ibebettak ti susik no di man gubat. Iti laksid a nagtimeken dagiti kapadana a komunista a nasion a kas iti China , saan a nagkir-in ti North Korea ti naing-inget pay nga embargo a naipataw kenkuana. Saan a dimngeg kadagiti nadiplomasiaan a pannakisarita. Saan a dimngeg kadagiti ballaag. Iti daytoy a situasion, pinataudna ti gumaygayebgeb nga apuy ket nasken la unay ti panagpaliiw ken panagsiput ta iti kanito nga adda biddut a tignay iti uray asino kadakuada, posible a bumtak ti gubat.

Lalo a nadegdegan ti tension idi Marso 17 daytoy a tawen iti pannakatiliw dagiti dua a babbai a kameng ti media, da Euna Lee ken Laura Ling, agpada a kameng ti telebision, ti San Francisco-based Current TV a kukua ni sigud a bise presidente Al Gore iti sakup ti North Korea-China border. Dagiti dua ket nairakurak a naglabsing ti linteg ti North Korea ken posible a panagespia ken iseserrek iti pagilian nga awanan iti pammalubos. Posible ti pannakaipasidong dagitoy iti labor camp.

Narikna ti USA ti panagpeggad dagiti natiliw nga umilina, ket napaneknekannan a saan a mabalin a maala iti kinnilgaan ti North Korea. Saan a mabalin ti pinnuersaan no di nadiplomasiaan a saritaan. Kas iti napasamak idi 1994 a sipakumbaba ti USA iti pannakisaritana para iti pannakawayawaya ti maysa a piloto ti helicopter a naiyaw-awan iti North Korean airspace, ken idi 1996 a naalumamay ti pannakipatangna para pannakawayawaya ti maysa nga Amerikano a balud gapu iti panagespia.

Babaen ti “humanitarian and peace loving policy” sipakumbaba ti USA a mapalubosan koman dagiti natiliw nga agirakrakurak ta agur-urayen ti madanagan a pamiliada. Babaen ken ni dati a Presidente Bill Clinton a sitatallugod a nakisarita ken ni North Korean leader Kim Jong Il iti mismo a pagilian, nawayawayaan dagiti agirakrakurak a nakabalud iti 140 nga aldaw,

Naalay-ayan ti tension ti sibubukel a lubong. Limmukay ti aangsan. Babaen ti pannakisarita a sipapakumbaba ken nadiplomasia, mapagsasaritaan dagiti tumaud nga isyo. Ket mangnamnama ti sangalubongan a masolbar ti isyo maipapan ti armas-nuklear babaen ti sangsangkamaysa a panagtugaw ti agsumbangir ket pagsaritaanda a naimbag dagiti timmaud a saanda a panagkinnaawatan. Masurotanda koma ti dana nga ipatawidda iti sumaruno a kaputotanda.

Awan ti tension wenno riribuk a maparnuay no ibbatan la ketdi dagiti dinadarudos ken awan turongenna nga addang. Agduma man ti pammati ken panirigan, dakkel ti maited ti sipapakumbaba a wagas ti pannakisarita iti nagan ti linak ken kappia.

Kalpasan ti panagkinnaawatan dagiti dua a nasion iti isyo maipapan kadagiti nga agirakrakurak iti telebision, sumaruno koman ti panagkinnaawatanda maipapan ti armas nuklear tapno masebsebanen ti agpeggad a masulnitan nga apuy ti riribuk iti sibubukel a lubong.#