SALAYSAY: Panagsubli iti Molokai: nariknami manen ti kinamanagsangaili dagiti kailian

Saan a nagbiddut ti tao a nangbirngas iti Isla ti Molokai a “Friendly Isle” wenno “Mannakigayyem nga Isla” kadagiti walo a kangrunaan a puro a mangbukel iti Estado ti Hawaii. No kitaen iti mapa, kasla sukog ti palloka wenno naidisso a sinelas wenno sapatos ti Molokai. Indian moccassin, kunada man.

Idi dandani aglanding ti naglugananmi nga Island Air iti daytoy nga aldaw, Hulio 26, 2009, nadumaduma a buya ti natannawaganmi. Adda dagiti naangrag a paset idinto a naberde ken nalangto ti dadduma. Nakunami ti unegmi: dita a paset ti bakir ti yan dagiti mountain deer ken dagiti adu a nabiag.

Iti sallukod dagiti balbalay, adda dagiti kadaraan ken dadduma a puli nga agindeg kadagitoy. Ngem awanen dagiti pinia.

Impaspasigud ni Benny Piros, agdama a presidente ti Molokai Filipino Communiity Council sakbay ti kombension: “Umaykayo. Ur-urayendakayo. Ituloytayo ti kombension kas nakaisigudan a tradision ti UFCH manipud pay idi nabangon idi Hunio 1959.”

Ti Molokai Filipino Community Council ti nangisagana ken nagsangaili iti maika-51 a panagkombension ti UFCH ken pannakapaliiw iti maikalimapulo nga anibersariona.

Nagsublikami iti Molokai iti daytoy a gundaway a kas maysa a kandidato ken delegado a mangibagi iti Ilocos Surian Association of Hawaii ken iti DWCLCAAH. Hulio 1997 daydi naudi a pannakikombensionko ditoy.

Malaksid nga adda panagbaliw dagiti opisial ti gunglo, awanen dagiti dadduma a sigud nga am-ammomi kas kada Appo Tony Abrahano, Ireneo Vergara, ken Councilman Acoba ta nadamagko a napandan iti sabali a biag.

Nupay kasta, adda ni Benny Piros, presidente ti MFCC, taga-Sagayaden, Cabugao, Ilocos Sur nga asideg laeng iti beddeng ti Bacsil, San Juan, ken ni Fely Piros a kasimpungalanna, ni Apo Johnny Trinidad, taga-San Juan (Lapog idi), Ilocos Sur a maysa kadagiti oldtimer iti kapiniaan idi sibibiag pay ti pinia ditoy ken maysa kadagiti lider ti union ken dadaulo ti Molokai Filipino Community Council ken ni Rosario “Sayong” Ragasa, tubo ti Sta. Cruz, Sinait, Ilocos Sur a dati nga empleado ti Benguet Auto Lines (BAL).

Iti panagsublik iti Molokai, nariknak manen ti kinamanagayat ni Ilokano ken ti kinamanagsangailina Naragsakda amin a kapatpatang. Napudot la ngaruden ti abrasada, napudpudot pay ti insaganada a kaldo a karne, tultulang ken ulo ti ugsa. Adda pay impasangoda a kuros.

Iti report ti Apo Piros, imbinsabinsana dagiti nagapuanan ti konseho kadagiti napalpalabas a tawen.

Idi sakbay ti Paskua idi Disiembre 2008, inangayda ti maysa a piknik iti One Alii Park Pavilion a tunggal maysa “balonna bangana”. Maysa a kalding ti indonar dagiti agassawa a Johnny Trinidad.

“Its full of fun and fellowship”, innayon ni Piros.

Nakipartisipar met ti gunglo iti pannakaselebrar ti Rizal Day iti taripungos ti 2008 a naangay iti Home Pumehana a panangipabuya dagiti agtutubo ken nataengan dagiti folk dances ken kankanta. Nagsapata iti daytoy nga aldaw dagiti opisial ti Molokai Filipino Community Council ken ti Molokai Filipino Cultural Club babaen ken Maui County Council Chairman Danny Mateo.

Ni Miss Ashley Ringo Ponce ti kinoronaanda a Miss Molokai Filipina idi Hunio 13, 2009, ket isu metten ti nakisalip iti Miss Hawaii Filipina Scholarship Pageant 2009.

Saanda met a nagpaudi nga agpataud iti pondoda para kadagiti scholarship programda kas iti panaglakoda iti lumpia, kaskaron, binagkal, spam musubi, pansit, pinggan ken dadduma pay a pamataudan iti pondo. Uppat nga estudiante ti tultulonganda nga agbasa babaen ti panangipaayda iti abastoda a sag-P500.

Dagiti agdama nga opisial ti Molokai FCC: Benny Piros, presidente; Pedro Venenciano, bise presidente; Yolanda Reyes, sekretaria; Tina Habon, corresponding secretary; Debbie Naeole, tesorera; Ida Reyes, auditor;

Hunta Direktiba: Moses Luczon, Annabelle Clemente, Adelina Cera, Nazario Ragonton, Jr., Maria Watanabe, ken Johnny Trinidad,

Mamagbaga: Sgt. Eugene Santiago, Fely Piros, ken Dr. Darryl Salvador,

Ni Debbie Davis ti pasado a presidente.#